ಸಮಾಜ ಮತ್ತೆ ಕೆಟ್ಟ ಆಚರಣೆಗಳತ್ತ ಮರಳುತ್ತಿದೆಯೇ? ಯುಜಿಸಿಯ ಹೊಸ ರೂಲ್ಸ್​ಗೆ ಬ್ರೇಕ್​ ಹಾಕಿದ ಸುಪ್ರೀಂಕೋರ್ಟ್​! New UGC Equity Rules

ನವದೆಹಲಿ: ಭಾರೀ ವಿವಾದಕ್ಕೀಡಾಗಿರುವ ಹಾಗೂ ವಿದ್ಯಾರ್ಥಿಗಳಿಂದ ತೀವ್ರ ವಿರೋಧಕ್ಕೆ ಗುರಿಯಾಗಿರುವ ಯುನಿವರ್ಸಿಟಿ ಗ್ರಾಂಟ್ಸ್ ಕಮಿಷನ್ ( UGC ) ನ ಹೊಸ ನಿಯಮಗಳಿಗೆ ( New UGC Equity Rules ) ದೇಶದ ಉನ್ನತ ನ್ಯಾಯಾಲಯ ಸುಪ್ರೀಂ ಕೋರ್ಟ್ ಇಂದು (ಜ.29)​ ತಡೆ ನೀಡಿದೆ.

ಯುಜಿಸಿ ನೋಟಿಫಿಕೇಶನ್​ ಬಗ್ಗೆ ಖಡಕ್​ ಮಾತುಗಳನ್ನಾಡಿದ ಮುಖ್ಯ ನ್ಯಾಯಮೂರ್ತಿ ಸೂರ್ಯಕಾಂತ್​, ದೇಶದಲ್ಲಿ ಸ್ವಾತಂತ್ರ್ಯ ಬಂದ 75 ವರ್ಷಗಳ ನಂತರ ಜಾತಿ ವ್ಯವಸ್ಥೆಯನ್ನು ತೊಡೆದುಹಾಕಿ, ಸಮಾನತೆಯ ಸಮಾಜ ನಿರ್ಮಾಣ ಮಾಡಲು ನಡೆದಂತಹ ಎಲ್ಲಾ ಪ್ರಯತ್ನಗಳ ಹೊರತಾಗಿಯೂ, ಸಮಾಜವು ಮತ್ತೆ ಹಳೆಯ ಕೆಟ್ಟ ಆಚರಣೆಗಳ ಕಡೆಗೆ ಮರಳುತ್ತಿದೆಯೇ? ಎಂದು ಬೇಸರ ಹೊರಹಾಕಿದರು. ಅಲ್ಲದೆ, ಭಾರತದ ಏಕತೆ, ದೇಶದ ಶಿಕ್ಷಣ ಸಂಸ್ಥೆಗಳಲ್ಲಿ ಪ್ರತಿಫಲಿಸಬೇಕು ಎಂದರು. ಯುಜಿಸಿ ನಿಯಮಗಳನ್ನು ದುರುಪಯೋಗಪಡಿಸಿಕೊಳ್ಳುವ ಸಾಧ್ಯತೆ ಇದೆ ಎಂದ ನ್ಯಾಯಾಲಯ, ಕೇಂದ್ರ ಮತ್ತು ಯುಜಿಸಿಗೆ ನೋಟಿಸ್ ನೀಡಿತು.

ರ್ಯಾಗಿಂಗ್​ನಲ್ಲಿ ನಡೆಯುತ್ತಿರುವ ಅತ್ಯಂತ ಕೆಟ್ಟ ಸಂಗತಿ ಏನೆಂದರೆ, ದಕ್ಷಿಣ ಮತ್ತು ಈಶಾನ್ಯ ಭಾಗದಿಂದ ಬರುವ ವಿದ್ಯಾರ್ಥಿಗಳು ತಮ್ಮೊಂದಿಗೆ ಅವರ ಸಂಸ್ಕೃತಿ ಮತ್ತು ಇನ್ನಿತರ ವಿಚಾರಧಾರೆಗಳನ್ನು ಹೊತ್ತು ತರುತ್ತಾರೆ. ಈ ವೈವಿಧ್ಯತೆಯ ಅರಿವೇ ಇಲ್ಲದವರು ಅವರ ವಿರುದ್ಧ ಕಾಮೆಂಟ್​ಗಳನ್ನು ಮಾಡುತ್ತಾರೆ. ಆ ಸಮಯದಲ್ಲಿ ನೀವು ಪ್ರತ್ಯೇಕ ಹಾಸ್ಟೆಲ್​ಗಳ ಬಗ್ಗೆ ಮಾತನಾಡುತ್ತೀರಿ. ದೇವರ ದಯೆಯಿಂದ ನಮ್ಮ ಸಮಾಜದಲ್ಲಿಂದು ಅಂತರ್ಜಾತಿಯ ವಿವಾಹಗಳನ್ನು ಹೊಂದಿದ್ದೇವೆ. ನಾವು ಹಾಸ್ಟೆಲ್​ಗಳನ್ನು ಸಹ ಹೊಂದಿದ್ದೇವೆ ಮತ್ತು ಅಲ್ಲಿ ಎಲ್ಲರು ಒಟ್ಟಾಗಿ ಇರುತ್ತೇವೆ ಎನ್ನುವ ಮೂಲಕ ಯುಜಿಸಿ ಹೊಸ ನಿಯಮಗಳನ್ನು ಮುಖ್ಯ ನ್ಯಾಯಮೂರ್ತಿ ಸೂರ್ಯಕಾಂತ್​ ಅವರು ಕಟುವಾಗಿ ಟೀಕಿಸಿದರು.

ಅಂದಹಾಗೆ, ಕ್ಯಾಂಪಸ್​ನಲ್ಲಿ ನಡೆಯುವ ತಾರತಮ್ಯ ವಿರುದ್ಧ ದಾಖಲಾಗುವ ದೂರುಗಳನ್ನು ವಿಚಾರಣೆ ಮಾಡಲು ಮತ್ತು ಸಮಾನತೆ ಹಾಗೂ ಎಲ್ಲರೂ ಒಳಗೊಳ್ಳುವಿಕೆಯನ್ನು ಉತ್ತೇಜಿಸಲು ದೇಶದ ಎಲ್ಲ ಯೂನಿವರ್ಸಿಟಿಗಳು ಮತ್ತು ಕಾಲೇಜುಗಳಲ್ಲಿ ಸಮಾನ ಅವಕಾಶ ಕೇಂದ್ರ (ಇಒಸಿ) ಮತ್ತು ಕ್ಯಾಂಪಸ್ ಮಟ್ಟದ ಸಮಿತಿಯನ್ನು ಸ್ಥಾಪಿಸುವುದು ಕಡ್ಡಾಯ ಎಂದು ಯುಜಿಸಿಯ 2026ರ ಹೊಸ ನಿಯಮಗಳಲ್ಲಿ ತಿಳಿಸಿದೆ. ಇದನ್ನು ಪ್ರಶ್ನಿಸಿ ದಾಖಲಾಗಿದ್ದ ಸಾಕಷ್ಟು ಅರ್ಜಿಗಳ ವಿಚಾರಣೆಯನ್ನು ನ್ಯಾಯಾಲಯ ಇಂದು ನಡೆಸಿತು. ಬಳಿಕ ಈ ಮೇಲಿನಂತೆ ಅಭಿಪ್ರಾಯಗಳನ್ನು ವ್ಯಕ್ತಪಡಿಸಿತು.

ಅಂದಹಾಗೆ, ಯುಜಿಸಿಎ ಹೊಸ ನಿಯಮಗಳಲ್ಲಿ ಜನರಲ್​ ಕ್ಯಾಟಗರಿಯ ವಿದ್ಯಾರ್ಥಿಗಳು ದೂರು ಸಲ್ಲಿಸಲು ಸ್ಪಷ್ಟವಾದ ಕಾರ್ಯವಿಧಾನವಿಲ್ಲ ಎಂಬ ಆರೋಪ ಇದೆ. ಹೀಗಾಗಿ, ಹೊಸ ನಿಯಮಗಳ ವಿರುದ್ಧ ಕಾಲೇಜು ಕ್ಯಾಂಪಸ್​ಗಳಲ್ಲಿ ವಿದ್ಯಾರ್ಥಿಗಳು ಪ್ರತಿಭಟನೆಗಳನ್ನು ನಡೆಸಿದರು. ಯುಜಿಸಿಯ ಹೊಸ ನಿಯಮಗಳಿಂದ ಅಸಮಾನತೆ ಇನ್ನಷ್ಟು ಹೆಚ್ಚಾಗಬಹುದು ಎಂದು ವಿದ್ಯಾರ್ಥಿಗಳು ಎಚ್ಚರಿಸಿದ್ದಾರೆ. ಅಲ್ಲದೆ, ಹೊಸ ನಿಯಮಗಳನ್ನು ಮರಿಪರಿಶೀಲಿಸಬೇಕೆಂದು ಒತ್ತಾಯ ಮಾಡಿದ್ದಾರೆ. ಇದರ ನಡುವೆ ಸುಪ್ರೀಂ ಕೋರ್ಟ್​ ಹೊಸ ನಿಯಮಗಳಿಗೆ ತಡೆ ನೀಡಿದೆ, (ಏಜೆನ್ಸೀಸ್​).