ಮತದಾನಕ್ಕೂ ಮುನ್ನವೇ ರಣರಂಗವಾಯ್ತು ಭವಾನಿಪುರ; ಭಾಷಣ ಅರ್ಧಕ್ಕೇ ನಿಲ್ಲಿಸಿ ವೇದಿಕೆಯಿಂದ ಹೊರನಡೆದಿದ್ದೇಕೆ ದೀದಿ..? | Bhabanipur Politics

ಸಿಎಂ ಮಮತಾ ಬ್ಯಾನರ್ಜಿ ಭಾಷಣ ಮಾಡುತ್ತಿದ್ದಾಗ ಈ ವಿವಾದ ಆರಂಭವಾಗಿದ್ದು, ಹತ್ತಿರದಲ್ಲೇ ನಿಗದಿಯಾಗಿದ್ದ ಸುವೇಂದು ಅಧಿಕಾರಿ ಸಾರ್ವಜನಿಕ ಸಭೆಗಾಗಿ ಬಿಜೆಪಿ ಬಳಸುತ್ತಿದ್ದ ಧ್ವನಿವರ್ಧಕಗಳು ತನ್ನ ಭಾಷಣಕ್ಕೆ ಅಡ್ಡಿಪಡಿಸುತ್ತಿವೆ ಎಂದು ಬ್ಯಾನರ್ಜಿ ಆರೋಪಿಸಿದರು. ಈ ಗದ್ದಲದಿಂದ ತೀವ್ರ ಅಸಮಾಧಾನಗೊಂಡ ಅವರು, ಹಠಾತ್ತನೆ ತಮ್ಮ ಭಾಷಣವನ್ನು ಕೊನೆಗೊಳಿಸಿ, ಸ್ಥಳದಿಂದ ನಿರ್ಗಮಿಸುವ ಮೊದಲು ಅಲ್ಲಿ ನೆರೆದಿದ್ದ ಜನಸಮೂಹದ ಕ್ಷಮೆಯಾಚಿಸಿದರು.

ಮುಖ್ಯಮಂತ್ರಿಗಳ ನಿರ್ಗಮನದ ಬೆನ್ನಲ್ಲೇ ಪರಿಸ್ಥಿತಿ ಮತ್ತಷ್ಟು ಹದಗೆಟ್ಟಿತು. ಬಿಜೆಪಿಗರ ವರ್ತನೆಯಿಂದ ಕೋಪಗೊಂಡ ಟಿಎಂಸಿ ಕಾರ್ಯಕರ್ತರು, ಸುವೇಂದು ಅಧಿಕಾರಿ ಪ್ರಚಾರ ಸಭೆಯ ಕಡೆಗೆ ಪ್ರತಿಭಟನಾ ಮೆರವಣಿಗೆ ನಡೆಸಿದರು. ಈ ಸಂದರ್ಭದಲ್ಲಿ ಉಭಯ ಪಕ್ಷಗಳ ಬೆಂಬಲಿಗರ ನಡುವೆ ಘೋಷಣೆಗಳ ವಿನಿಮಯ ನಡೆದು, ವಾತಾವರಣ ಉದ್ವಿಗ್ನಗೊಂಡಿತು. ತಕ್ಷಣವೇ ಭದ್ರತಾ ಪಡೆಗಳು ಮಧ್ಯಪ್ರವೇಶಿಸಿ ಪರಿಸ್ಥಿತಿ ತಿಳಿಗೊಳಿಸಿದವು.