ಭವಿಷ್ಯದ ಪ್ರಧಾನಿ ರೇಸ್‌ನಿಂದ ಫಡ್ನವೀಸ್ ಹೊರದಬ್ಬಲು ಅಮಿತ್ ಷಾ ಸಂಚು; ಮಹಾರಾಷ್ಟ್ರದಲ್ಲಿ ಆಪರೇಷನ್ ಟೈಗರ್ ರಹಸ್ಯ ಬಿಚ್ಚಿಟ್ಟ ಉದ್ಧವ್! Uddhav Thackeray

ಈ ಬಗ್ಗೆ ಹಿಂಗೋಲಿಯಲ್ಲಿ ಶನಿವಾರ ನಡೆದ ಬೃಹತ್ ಕಾರ್ಯಕರ್ತರ ಸಮಾವೇಶವನ್ನುದ್ದೇಶಿಸಿ ಮಾತನಾಡಿದ ಠಾಕ್ರೆ, ಬಿಜೆಪಿ ಮತ್ತು ಏಕನಾಥ್ ಶಿಂದೆ ಬಣದ ವಿರುದ್ಧ ತೀವ್ರ ವಾಗ್ದಾಳಿ ನಡೆಸಿದ್ದಾರೆ. ಅಲ್ಲದೆ, ಇತ್ತೀಚೆಗಷ್ಟೇ ಉದ್ಧವ್ ಬಣದ 6 ಜನ ಲೋಕಸಭಾ ಸಂಸದರು ಏಕನಾಥ್ ಶಿಂದೆ ನೇತೃತ್ವದ ಶಿವಸೇನೆಗೆ ಜಿಗಿದ ಬೆನ್ನಲ್ಲೇ ಈ ಸ್ಫೋಟಕ ಹೇಳಿಕೆ ನೀಡಿದ್ದಾರೆ.

ಸಮಾವೇಶದಲ್ಲಿ ಘರ್ಜಿಸಿದ ಮಾಜಿ ಸಿಎಂ ಉದ್ಧವ್ ಠಾಕ್ರೆ, ಇದು ಶಿವಸೇನೆಯನ್ನು ಮುಗಿಸಲು ಮಾಡಿದ ಆಪರೇಷನ್ ಟೈಗರ್ ಅಲ್ಲ, ಬದಲಿಗೆ ಫಡ್ನವೀಸ್​ರನ್ನು ಮಟ್ಟಹಾಕಲು ನಡೆಸಿದ ಆಪರೇಷನ್ ದೇವೇಂದ್ರ ಎಂದಿದ್ದಾರೆ. ಭವಿಷ್ಯದಲ್ಲಿ ಫಡ್ನವೀಸ್ ರಾಷ್ಟ್ರ ರಾಜಕಾರಣಕ್ಕೆ ಬರದಂತೆ ಮತ್ತು ಪ್ರಧಾನಿ ಹುದ್ದೆಯ ರೇಸ್‌ನಲ್ಲಿ ಅಮಿತ್ ಷಾ ಅವರಿಗೆ ಪೈಪೋಟಿ ನೀಡದಂತೆ ತಡೆಯಲು ಅವರನ್ನು ಒಂದು ನಿರ್ದಿಷ್ಟ ಮಟ್ಟದಲ್ಲೇ ಕಟ್ಟಿಹಾಕುವ ತಂತ್ರ ಇದಾಗಿದೆ. ನಾಳೆ ದಿನ ದೇಶದಲ್ಲಿ ಅಂತಹ ಪರಿಸ್ಥಿತಿ ಬಂದರೆ, ನಮ್ಮಿಂದ ಪಕ್ಷಾಂತರ ಮಾಡಿದ ಸಂಸದರು ದೇವೇಂದ್ರ ಫಡ್ನವೀಸ್ ಬದಲಿಗೆ ಅಮಿತ್ ಷಾ ಅವರನ್ನೇ ಪ್ರಧಾನಿ ಮಾಡಲು ವೋಟ್ ಹಾಕುತ್ತಾರೆ. ಇದಕ್ಕಾಗಿಯೇ ಷಾ ಈ ಇಡೀ ಆಟ ಆಡಿದ್ದಾರೆ ಎಂದು ಆರೋಪಿಸಿದ್ದಾರೆ.

ನಮ್ಮ ಪಕ್ಷದಿಂದ ಬಂಡಾಯ ಎದ್ದ ಸಂಸದರು ನೇರವಾಗಿ ಬಿಜೆಪಿಗೆ ಸೇರದೆ, ಶಿಂದೆ ನೇತೃತ್ವದ ಶಿವಸೇನೆಗೇ ಏಕೆ ಸೇರಿದರು ಎಂದು ಪ್ರಶ್ನಿಸಿದ ಉದ್ಧವ್, ಇದು ಪ್ರಾದೇಶಿಕ ಪಕ್ಷಗಳನ್ನು ಒಡೆದು ತನ್ನ ಬೇಳೆ ಬೇಯಿಸಿಕೊಳ್ಳುವ ಬಿಜೆಪಿಯ ಮುಖವಾಡವನ್ನು ಬಯಲು ಮಾಡಿದೆ ಎಂದರು.

'ಆಪರೇಷನ್ ಟೈಗರ್' ಹಿಂದೆ ಬಿಜೆಪಿಯ ಮತ್ತೊಂದು ಹಿಡನ್ ಅಜೆಂಡಾ ಇದೆ ಎಂದು ಉದ್ಧವ್ ಠಾಕ್ರೆ ವಿವರಿಸಿದ್ದಾರೆ. ಸಂಸತ್ತಿನಲ್ಲಿ ದೇಶದ ಲೋಕಸಭಾ ಕ್ಷೇತ್ರಗಳ ಮರುವಿಂಗಡಣೆ ಮಸೂದೆಯನ್ನು ಸುಲಭವಾಗಿ ಅಂಗೀಕರಿಸಲು ಬಿಜೆಪಿ ನೇತೃತ್ವದ ಎನ್‌ಡಿಎ ಮೈತ್ರಿಕೂಟಕ್ಕೆ ಮೂರನೇ ಎರಡರಷ್ಟು (2/3rd) ಬಹುಮತದ ಅಗತ್ಯವಿದೆ. ಅದಕ್ಕಾಗಿ ಸಣ್ಣ ಪಕ್ಷಗಳ ಸಂಸದರನ್ನು ಇವರು ಸೆಳೆಯುತ್ತಿದ್ದಾರೆ. ಆದರೆ, ಇದೇ ಆಡಳಿತ ಪಕ್ಷಗಳು ರಾಜ್ಯದಲ್ಲಿ ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿರುವ ರೈತರ ಆತ್ಮಹತ್ಯೆ ಮತ್ತು ಇತ್ತೀಚಿನ TET ಪರೀಕ್ಷೆಯ ಪ್ರಶ್ನೆಪತ್ರಿಕೆ ಸೋರಿಕೆಯಂತಹ ಗಂಭೀರ ಸಮಸ್ಯೆಗಳನ್ನು ಸಂಪೂರ್ಣವಾಗಿ ಕಡೆಗಣಿಸಿವೆ ಎಂದು ತರಾಟೆಗೆ ತೆಗೆದುಕೊಂಡಿದ್ದಾರೆ.

ಇತ್ತೀಚಿನ ಲೋಕಸಭಾ ಚುನಾವಣೆಯಲ್ಲಿ 9 ಸ್ಥಾನಗಳನ್ನು ಗೆದ್ದಿದ್ದ ಉದ್ಧವ್ ಬಣಕ್ಕೆ ಕಳೆದ ಸೋಮವಾರ ಭಾರಿ ಆಘಾತ ಎದುರಾಗಿತ್ತು. ಒಟ್ಟು 9 ಸಂಸದರ ಪೈಕಿ 6 ಜನ ಸಂಸದರು ಶಿಂದೆ ಬಣಕ್ಕೆ ಸೇರ್ಪಡೆಯಾಗಿದ್ದರು. ಇದರಿಂದ ಶಿಂದೆ ಬಣದ ಸಂಸದರ ಬಲ 7 ರಿಂದ 13 ಕ್ಕೆ ಏರಿಕೆಯಾಗಿದೆ.

ಈ ಪಕ್ಷಾಂತರಿಗಳ ವಿರುದ್ಧ ಆಕ್ರೋಶ ಹೊರಹಾಕಿದ ಉದ್ಧವ್, ಇವರೆಲ್ಲರೂ ಶಿವಸೇನೆಯ ಸಂಸ್ಥಾಪಕ ಬಾಳಾಸಾಹೇಬ್ ಠಾಕ್ರೆ ಅವರಿಗೆ ದ್ರೋಹ ಬಗೆದಿದ್ದಾರೆ. ಈ ಹಿಂದೆ ಹಿಂಗೋಲಿ ಮತ್ತು ಪರಭಣಿ ಕ್ಷೇತ್ರಗಳಲ್ಲಿ ಸಂಸದರು ಪಕ್ಷ ಬದಲಾಯಿಸಿದಾಗಲೂ ಸಾಮಾನ್ಯ ಕಾರ್ಯಕರ್ತರು ನಮ್ಮೊಂದಿಗೇ ಉಳಿದಿದ್ದರು ಮತ್ತು ಬಂಡಾಯವೆದ್ದವರು ಮಣ್ಣು ಮುಕ್ಕಿದ್ದರು. ಈಗಲೂ ಹಿಂಗೋಲಿಯಲ್ಲಿ ಅದೇ ಇತಿಹಾಸ ಮರುಕಳಿಸಲಿದೆ. ದ್ರೋಹಿಗಳನ್ನು ಜನರೇ ಸೋಲಿಸಲಿದ್ದಾರೆ ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ. ಅಲ್ಲದೆ, ಅಸಮಾಧಾನಗೊಂಡು ಪಕ್ಷ ಬಿಟ್ಟಿರುವ ಸಾಮಾನ್ಯ ಕಾರ್ಯಕರ್ತರು ಮರಳಿ ತಾಯ್ನಾಡಿಗೆ ಬರುವಂತೆ ಕರೆ ನೀಡಿದ್ದಾರೆ,(ಏಜೆನ್ಸೀಸ್).