ಬಿಜೆಪಿ ಐಟಿ ಸೆಲ್​​ ಮುಖ್ಯಸ್ಥ ಸ್ಥಾನದಿಂದ ಅಮಿತ್ ಮಾಳವೀಯ ಔಟ್; ನೂತನ ಮುಖ್ಯಸ್ಥರಾಗಿ ದೀಪಕ್ ಮಾಸ್ಕಿ ನೇಮಕ | Amit Malviya

ನವದೆಹಲಿ: ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷರಾಗಿ ನಿತಿನ್ ನಬಿನ್ ಅಧಿಕಾರ ವಹಿಸಿಕೊಂಡ ಬಳಿಕ ಪಕ್ಷದಲ್ಲಿ ಭಾರಿ ಬದಲಾವಣೆ ನಡೆದಿದ್ದು, ಇಂದು(ಆ. 17) ಪಕ್ಷ ತನ್ನ ನೂತನ ಪದಾಧಿಕಾರಿಗಳ ಪಟ್ಟಿ ಬಿಡುಗಡೆ ಮಾಡಿದೆ. ಕಳೆದ 11 ವರ್ಷಗಳಿಂದ ಐಟಿ ಸೆಲ್​ ಮುಖಸ್ಥರಾಗಿದ್ದ ಅಮಿತ್ ಮಾಳವೀಯ(Amit Malviya) ಅವರನ್ನು ಸ್ಥಾನದಿಂದ ಕೈಬಿಟ್ಟಿದ್ದು, ಛತ್ತೀಸ್​ಗಢದ ದೀಪಕ್ ಮಾಸ್ಕಿ ಅವರನ್ನು ನೂತನ ಸಾಮಾಜಿಕ ಮಾಧ್ಯಮ ಸಂಚಾಲಕರನ್ನಾಗಿ ನೇಮಿಸಲಾಗಿದೆ.

ದೀಪಕ್ ಮಾಸ್ಕಿ ಅವರ ಜೊತೆಗೆ ಪ್ರೀತಿ ಗಾಂಧಿ, ಶಿವಾನಂದ ದ್ವಿವೇದಿ, ಅಲೋಕ್ ಭಟ್ ಮತ್ತು ಅರುಣ್ ಯಾದವ್ ಅವರನ್ನು ಸಾಮಾಜಿಕ ಮಾಧ್ಯಮ ಸಹ-ಸಂಚಾಲಕರನ್ನಾಗಿ ನೇಮಿಸಲಾಗಿದೆ.

ಎಕ್ಸ್​​ನಲ್ಲಿ ಬಿಜೆಪಿ ಪಕ್ಷದ ನೂತನ ಸಾಮಾಜಿಕ ಜಾಲತಾಣದ ತಂಡವನ್ನು ಅಭಿನಂದಿಸಿರುವ ಅಮಿತ್ ಮಾಳವೀಯ, ಬಿಜೆಪಿಯ ಸಾಮಾಜಿಕ ಮಾಧ್ಯಮ ವಿಭಾಗದ ಮುಖ್ಯಸ್ಥರಾಗಿ ನನ್ನಿಂದ ಅಧಿಕಾರ ವಹಿಸಿಕೊಳ್ಳಲಿರುವ ಶ್ರೀ ದೀಪಕ್ ಮಾಸ್ಕಿ ಜಿ ಮತ್ತು ಸಹ-ಸಂಚಾಲಕರಾದ ಶ್ರೀಮತಿ ಪ್ರೀತಿ ಗಾಂಧಿ ಜಿ, ಶ್ರೀ ಶಿವಾನಂದ ದ್ವಿವೇದಿ ಜಿ, ಶ್ರೀ ಅಲೋಕ್ ಭಟ್ ಜಿ ಮತ್ತು ಶ್ರೀ ಅರುಣ್ ಯಾದವ್ ಜಿ ಅವರನ್ನು ನಾನು ವಿಶೇಷವಾಗಿ ಅಭಿನಂದಿಸುತ್ತೇನೆ ಎಂದು ಹೇಳಿದ್ದಾರೆ.

ಕಳೆದ ಒಂದು ದಶಕದಲ್ಲಿ ಇವರೆಲ್ಲರೊಂದಿಗೆ ನಿಕಟವಾಗಿ ಕೆಲಸ ಮಾಡುವ ಸೌಭಾಗ್ಯ ನನಗೆ ದೊರೆತಿದೆ. ನೂತನ ತಂಡದ ನೇತೃತ್ವದಲ್ಲಿ ಬಿಜೆಪಿಯ ಡಿಜಿಟಲ್ ಸಂವಹನವು ಹೊಸ ಮೈಲಿಗಲ್ಲುಗಳನ್ನು ಸಾಧಿಸಲಿದೆ. ಮತ್ತು ದೃಢತೆ, ಸೃಜನಶೀಲತೆ ಹಾಗೂ ಸ್ಪಷ್ಟತೆಯೊಂದಿಗೆ ಭಾರತದ ಸಾರ್ವಜನಿಕ ಚರ್ಚೆಯನ್ನು ರೂಪಿಸುವುದನ್ನು ಮುಂದುವರಿಸಲಿದೆ ಎಂಬ ವಿಶ್ವಾಸ ನನಗಿದೆ ಎಂದಿದ್ದಾರೆ.

ಮುಂದುವರೆದು, 11 ವರ್ಷಗಳ ಕಾಲ ಇಲಾಖೆಯ ಮುಖ್ಯಸ್ಥರಾಗಿದ್ದ ಅವಧಿಯಲ್ಲಿ ಬಿಜೆಪಿಯ ಸಾಮಾಜಿಕ ಮಾಧ್ಯಮ ಬೆಂಬಲಿಗರು ನೀಡಿದ ಬೆಂಬಲಕ್ಕಾಗಿ ಕೃತಜ್ಞತೆಯನ್ನು ವ್ಯಕ್ತಪಡಿಸಿದ್ದು, ಸಾಮಾಜಿಕ ಜಾಲತಾಣಗಳಲ್ಲಿ ಬಿಜೆಪಿಯನ್ನು ಬೆಂಬಲಿಸುವ ಬೃಹತ್ ಸಮುದಾಯಕ್ಕೆ ಬದ್ಧತೆ, ಶಕ್ತಿ ಮತ್ತು ಹೊಸ ಆಲೋಚನೆಗಳಿಂದ ತುಂಬಿರುವ ಈ ಸಮುದಾಯಕ್ಕೆ ನನ್ನ ತುಂಬು ಹೃದಯದ ಧನ್ಯವಾದಗಳು. ಈ ಕುಟುಂಬವು ಕಷ್ಟ-ಸುಖದ ಸಮಯದಲ್ಲೂ ಒಗ್ಗಟ್ಟಾಗಿ ನಿಂತಿದೆ. ಮತ್ತು ಭಾರತದ ಸಾರ್ವಜನಿಕ ಚರ್ಚೆಯನ್ನು ಮರುರೂಪಿಸುವಲ್ಲಿ ನಿರ್ಣಾಯಕ ಪಾತ್ರ ವಹಿಸಿದೆ.

ವೈಯಕ್ತಿಕವಾಗಿ ನನಗೆ ಹಾಗೂ ಪಕ್ಷದ ಉದ್ದೇಶಕ್ಕೆ ನೀವು ಅಪಾರ ಶಕ್ತಿಯ ಮೂಲವಾಗಿದ್ದೀರಿ. ಈ ವಿಭಾಗದ ಮುಖ್ಯಸ್ಥನಾಗಿ ಕಳೆದ ಹನ್ನೊಂದು ವರ್ಷಗಳಲ್ಲಿ ನಿಮ್ಮಲ್ಲಿ ಅನೇಕರನ್ನು ಭೇಟಿಯಾಗುವ ಮತ್ತು ಸಂವಾದ ನಡೆಸುವ ಅವಕಾಶ ನನಗೆ ಸಿಕ್ಕಿದೆ; ಆ ಸಂವಾದಗಳು ಯಾವಾಗಲೂ ವಿಶೇಷವಾಗಿ ಉಳಿದುಕೊಳ್ಳುತ್ತವೆ. ಮುಂದಿನ ದಿನಗಳಲ್ಲಿಯೂ ಪಕ್ಷಕ್ಕೆ ಮತ್ತು ನನ್ನ ನಂತರದ ಉತ್ತರಾಧಿಕಾರಿಗಳಿಗೆ ಇದೇ ರೀತಿಯ ಅಚಲ ಬೆಂಬಲವನ್ನು ನೀವು ಮುಂದುವರಿಸುತ್ತೀರಿ ಎಂದು ನಾನು ಭಾವಿಸುತ್ತೇನೆ ಎಂದು ಬರೆದುಕೊಂಡಿದ್ದಾರೆ.

ದೀಪಕ್ ಮಾಸ್ಕಿ ಅವರು ರಾಯ್‌ಪುರದ ಹಿರಿಯ ಬಿಜೆಪಿ ನಾಯಕರಾಗಿದ್ದಾರೆ. ರಸಾಯನಶಾಸ್ತ್ರದಲ್ಲಿ ಎಂ.ಎಸ್ಸಿ. ಪದವಿ ಪಡೆದಿರುವ ಅವರು, ಸಿಮೆಂಟ್ ತಂತ್ರಜ್ಞಾನದಲ್ಲಿ ಡಿಪ್ಲೊಮಾ ಮತ್ತು ಕಂಪ್ಯೂಟರ್ ಪ್ರೋಗ್ರಾಮಿಂಗ್‌ನಲ್ಲಿ ಪ್ರಮಾಣೀಕರಣವನ್ನು ಪಡೆದಿದ್ದಾರೆ. ಸಾಂಸ್ಥಿಕ ಮತ್ತು ರಾಜಕೀಯ ಕೆಲಸಗಳಲ್ಲಿ ಆಳವಾಗಿ ಪ್ರವೇಶಿಸುವ ಮೊದಲು, ಅವರು ರಸಾಯನಶಾಸ್ತ್ರದ ಕಾಲೇಜು ಪ್ರಾಧ್ಯಾಪಕರಾಗಿ ಕೆಲಸ ಮಾಡಿದ್ದಾರೆ.