ಸೆಕೆಂಡ್​ ಹ್ಯಾಂಡ್ ಇವಿ​ ಕಾರುಗಳಿಗೆ ಡಿಮಾಂಡ್​ ಜೋರು! ಪೆಟ್ರೋಲ್​​ ವಾಹನಕ್ಕಿಂತ ದುಬಾರಿ ಬೆಲೆ; ಹೀಗಿದೆ ವರದಿ ​

EV Cars: ಅಮೆರಿಕ-ಇರಾನ್​ ಯುದ್ಧದಿಂದ ತೈಲ ಬಿಕ್ಕಟ್ಟು ಇಡೀ  ವಿಶ್ವಕ್ಕೆ ಕಾಡಿದ ಬೆನ್ನಲ್ಲೇ ಜನರು ಒಂದಷ್ಟು ಬದಲಾವಣೆಗಳತ್ತ ಮುಖ ಮಾಡಿದ್ದಾರೆ. ಗ್ಯಾಸ್​ ಸಿಲಿಂಡರ್​ಗಳ​ ಕೊರತೆ, ಪೆಟ್ರೋಲ್​-ಡಿಸೇಲ್​ ಬೆಲೆಗಳ ಏರಿಕೆ ಬೆನ್ನಲ್ಲೇ ಅದಕ್ಕೆ ಪರ್ಯಾಯ ಮಾರ್ಗಗಳ ಬೆನ್ನತ್ತಿದ್ದಾರೆ. ಈ ಪೈಕಿ ಇವಿ (ಎಲೆಕ್ಟ್ರಿಕ್​ ವಾಹನ) ಕಾರುಗಳ ಖರೀದಿಗೆ ಮುಂದಾಗುತ್ತಿದ್ದಾರೆ. 

ವಿದ್ಯುತ್ ಚಾಲಿತ ವಾಹನಗಳ ಬಗ್ಗೆ ಹೆಚ್ಚುತ್ತಿರುವ ಆಸಕ್ತಿ ಮತ್ತು ಕಾಲಕ್ಕೆ ತಕ್ಕಂತೆ ಬದಲಾವಣೆ ಅಗತ್ಯ ಎನ್ನುವ ಮಾತನ್ನು ಜನರು ಬಹಳ ಶಿಸ್ತಿನಿಂದ ಅನುಸರಿಸುತ್ತಿರುವಂತೆ ಕಾಣುತ್ತಿದೆ. ಯುದ್ಧದ ಪರಿಣಾಮ, ಲೀ. ಪೆಟ್ರೋಲ್ ಬೆಲೆಗಳು 110 ರೂ. ಗಡಿದಾಟಿ ಹೋಗಿದೆ. ಇದು ಜನರ ಜೇಬಿಗೆ ಕತ್ತರಿ ಹಾಕಿದೆ. ಈಗಾಗಲೇ, ಗ್ಯಾಸ್​ ಸಿಲಿಂಡರ್​ ಅಭಾವದಿಂದ ಸೌದೆ ಒಲೆ ಮತ್ತು ಬೇರೆ ವ್ಯವಸ್ಥೆಗಳನ್ನು ಹುಡುಕಿರುವ ಜನರು, ಅಂತೆಯೇ ಪೆಟ್ರೋಲ್​-ಡಿಸೇಲ್​ ಕಾರುಗಳನ್ನು ಬಿಟ್ಟು ಇವಿ ಕಾರುಗಳ ಖರೀದಿಗೆ ಮುಗಿಬಿದ್ದಿದ್ದಾರೆ.

ಅದರಲ್ಲೂ ಸೆಕೆಂಡ್ ಹ್ಯಾಂಡ್ ವಿದ್ಯುತ್ ಚಾಲಿತ ವಾಹನಗಳಿಗೆ ಹೆಚ್ಚಿನ ಬೇಡಿಕೆ. ಇತ್ತೀಚಿನ ಮಾರುಕಟ್ಟೆ ಮಾಹಿತಿಯ ಪ್ರಕಾರ, ಬಳಸಿದ ಇವಿ ವಾಹನಗಳ ಬೆಲೆಗಳು ಪ್ರಸ್ತುತ ಗ್ಯಾಸೋಲಿನ್ ಮತ್ತು ಪೆಟ್ರೋಲ್ ಕಾರುಗಳಿಗಿಂತ ವೇಗವಾಗಿ ಹೆಚ್ಚುತ್ತಿವೆ. ಇಂಧನ ಬೆಲೆಗಳು ದಿನದಿಂದ ದಿನಕ್ಕೆ ಹೆಚ್ಚಳವಾಗುತ್ತಿರುವುದೇ ಈ ಪರಿಸ್ಥಿತಿಗೆ ಮೂಲ ಕಾರಣ ಎಂದು ವರದಿಯಾಗಿದೆ.  ಜನರು ಕೂಡ ಈ ದಿಕ್ಕಿನತ್ತಲೇ ಸಾಗುತ್ತಿರುವುದು ಗಮನಾರ್ಹ. 

'ಕಾಕ್ಸ್ ಆಟೋಮೋಟಿವ್' ಬಿಡುಗಡೆಗೊಳಿಸಿದ ಇತ್ತೀಚಿನ ವರದಿಯ ಪ್ರಕಾರ, ಕಳೆದ ವರ್ಷಕ್ಕೆ ಹೋಲಿಸಿದರೆ ಸೆಕೆಂಡ್ ಹ್ಯಾಂಡ್ ಇವಿ ವಾಹನಗಳ ಸಗಟು ಬೆಲೆಗಳು ಸುಮಾರು ಶೇ.12ರಷ್ಟು ಹೆಚ್ಚಾಗಿದೆ. ಅದೇ ಸಮಯದಲ್ಲಿ, ಪೆಟ್ರೋಲ್ ಮತ್ತು ಸಿಎನ್​ಜಿ ಚಾಲಿತ ವಾಹನಗಳ ಬೆಲೆಗಳು ಶೇ.3ರಷ್ಟು ಹೆಚ್ಚಾಗಿದೆ. ಈ ಅಂಕಿಅಂಶಗಳು ಮಾರುಕಟ್ಟೆಯಲ್ಲಿ ವಿದ್ಯುತ್ ಚಾಲಿತ ವಾಹನಗಳಿಗೆ ಬೇಡಿಕೆ ಎಷ್ಟಾಗಿದೆ ಎಂಬುದನ್ನು ಸ್ಪಷ್ಟವಾಗಿ ತೋರಿಸುತ್ತಿವೆ. 

ಇಂಧನ ಬೆಲೆಗಳ ಏರಿಕೆಯಿಂದ ತತ್ತರಿಸಿರುವ ಅನೇಕ ಗ್ರಾಹಕರು, ಕಡಿಮೆ ನಿರ್ವಹಣಾ ವೆಚ್ಚವನ್ನು ಹೊಂದಿರುವ ವಾಹನಗಳನ್ನು ಹುಡುಕುತ್ತಿದ್ದಾರೆ. ವಿಶೇಷವಾಗಿ ಪ್ರತಿದಿನ ಹೆಚ್ಚು ದೂರ ಪ್ರಯಾಣಿಸುವವರು ಪೆಟ್ರೋಲ್ ವೆಚ್ಚವನ್ನು ಕಡಿತಗೊಳಿಸಲು ವಿದ್ಯುತ್ ವಾಹನಗಳತ್ತ ಮುಖ ಮಾಡುತ್ತಿದ್ದಾರೆ. ಡೀಲರ್‌ಗಳಲ್ಲಿ, ಮುಖ್ಯವಾಗಿ ಟೆಸ್ಲಾ ಮಾಡೆಲ್ 3, ವೈ, ಫೋರ್ಡ್ ಮಸ್ತಾಂಗ್ ಮ್ಯಾಕ್-ಇ, ಚೆವ್ರೊಲೆಟ್ ಬೋಲ್ಟ್, ಹುಂಡೈ ಅಯೋನಿಕ್ 5 ನಂತಹ ಮಾದರಿಗಳಿಗೆ ಮಾರುಕಟ್ಟೆಯಲ್ಲಿ ತೀವ್ರ ಬೇಡಿಕೆಯಿದೆ. 

ಸಗಟು ಮಾರುಕಟ್ಟೆಯಲ್ಲಿ ಬೆಲೆಗಳ ಹೆಚ್ಚಳದಿಂದಾಗಿ, ಬಳಸಿದ ಇವಿಗಳ ಬೆಲೆಗಳು ಡೀಲರ್‌ಶಿಪ್‌ಗಳಲ್ಲಿ ಕ್ರಮೇಣ ಹೆಚ್ಚುತ್ತಿವೆ. ಹೊಸ ಕಾರು ಖರೀದಿಸಲು ಸಾಧ್ಯವಾಗದ ಗ್ರಾಹಕರು, ಸೆಕೆಂಡ್​ ಹ್ಯಾಂಡ್​ ಎಲೆಕ್ಟ್ರಿಕ್ ವಾಹನಗಳತ್ತ ಗಮನ ಹರಿಸುತ್ತಿದ್ದಾರೆ. ಇದು ಮಾರುಕಟ್ಟೆಯಲ್ಲಿ ಬೇಡಿಕೆಯನ್ನು ಮತ್ತಷ್ಟು ಹೆಚ್ಚಿಸುತ್ತಿದೆ. ಭವಿಷ್ಯದಲ್ಲಿ ಇವಿ ಯುಗ ಎಂಬುದನ್ನೂ ಅರಿತಿರುವ ಜನರು, ಪೆಟ್ರೋಲ್​-ಡಿಸೇಲ್​ ಬೆಲೆ ಏರಿಕೆಯ ಹಿನ್ನೆಲೆ ಮುಖ ಮಾಡುತ್ತಿರುವುದು ಗಮನಾರ್ಹ. 

ಮತ್ತೊಂದೆಡೆ, ಎಲ್ಲಾ ಪ್ರದೇಶಗಳಲ್ಲಿಯೂ ಎಲೆಕ್ಟ್ರಿಕ್ ವಾಹನಗಳ ಬಳಕೆ ಒಂದೇ ಆಗಿರುವುದಿಲ್ಲ. ಉತ್ತಮ ಚಾರ್ಜಿಂಗ್ ಸೌಲಭ್ಯಗಳನ್ನು ಹೊಂದಿರುವ ನಗರಗಳು ಮತ್ತು ಪ್ರದೇಶಗಳಲ್ಲಿ ಇವಿಗಳಿಗೆ ಬೇಡಿಕೆ ಹೆಚ್ಚಿರುತ್ತದೆ. ಅದೇ ಕಳಪೆ ಚಾರ್ಜಿಂಗ್ ಮೂಲಸೌಕರ್ಯ ಹೊಂದಿರುವ ಪ್ರದೇಶಗಳಲ್ಲಿ, ಬೇಡಿಕೆ ಅಷ್ಟಾಗಿ ಇರುವುದಿಲ್ಲ. ಇದರಿಂದಾಗಿ, ಪ್ರದೇಶವಾರು ಬೆಲೆಗಳಲ್ಲಿ ವ್ಯತ್ಯಾಸಗಳು ಕಾಡಬಹುದು.

ಒಟ್ಟಾರೆಯಾಗಿ, ಏರುತ್ತಿರುವ ಇಂಧನ ಬೆಲೆಗಳು ಸೆಕೆಂಡ್ ಹ್ಯಾಂಡ್ ಎಲೆಕ್ಟ್ರಿಕ್ ವಾಹನ ಮಾರುಕಟ್ಟೆಗೆ ಬೇಡಿಕೆಯನ್ನು ಸೃಷ್ಟಿಸಿದೆ. ಆದಾಗ್ಯೂ, ಭವಿಷ್ಯದಲ್ಲಿ ಪೂರೈಕೆ ಹೆಚ್ಚಾದಂತೆ ಬೆಲೆಗಳು ಬದಲಾಗುವ ಸಾಧ್ಯತೆಯಿರುವುದರಿಂದ ಖರೀದಿದಾರರು ಸ್ವಲ್ಪ ಯೋಚಿಸಿ, ಕಾದು, ಕೊಳ್ಳುವತ್ತ ಮುಂದಾಗುವುದು ಒಳಿತು,(ಏಜೆನ್ಸೀಸ್).