ಜೀವನ ನಾವು ಅಂದುಕೊಂಡಂತೆ ನಡೆಯುವುದಿಲ್ಲ... ಅವತ್ತು ಕ್ಲಾಸ್ ಟಾಪರ್, ಇವತ್ತು ರಾಪಿಡೋ ರೈಡರ್! | Rapido

ಹೌದು.. ಉಮರ್ ಎಂಬ ಯುವಕ ತಡವಾಗುತ್ತಿದೆ ಎಂಬ ಕಾರಣಕ್ಕೆ ಆತುರದಲ್ಲಿ ರಾಪಿಡೋ ಬೈಕ್ ಬುಕ್ ಮಾಡಿದ್ದನು. ಬುಕ್ಕಿಂಗ್ ವಿವರಗಳಲ್ಲಿ ರೈಡರ್ ಹೆಸರು 'ಚಂದನ್' ಎಂದು ಕಂಡಾಗ ಉಮರ್ ಗೆ ಒಂದು ಕ್ಷಣ ಹಳೆಯ ನೆನಪು ಮರುಕಳಿಸಿತು. ತನ್ನ ಶಾಲೆಯಲ್ಲಿ ಸದಾ ಮೊದಲ ಸ್ಥಾನದಲ್ಲಿರುತ್ತಿದ್ದ ಚಂದನ್ ಇವನೇ ಇರಬಹುದೇ ಎಂಬ ಕುತೂಹಲ ಮೂಡಿತು. ಬೈಕ್ ಹತ್ತಿರ ಬಂದಾಗ ಉಮರ್ ಗೆ ಅಚ್ಚರಿ ಕಾಯುತ್ತಿತ್ತು. ಅದು ನಿಜಕ್ಕೂ ಅದೇ ಚಂದನ್ ಆಗಿದ್ದನು!

ಬೈಕ್ ಏರುತ್ತಿದ್ದಂತೆ ಉಮರ್ ತಮಾಷೆಯಾಗಿ "ಹೇ ರಾಪಿಡೋ ಭಯ್ಯಾ!" ಎಂದು ಕರೆದಾಗ, ಚಂದನ್ ನಗುತ್ತಲೇ "ಮೊದಲು ಒಟಿಪಿ (OTP) ಹೇಳು" ಎಂದು ಉತ್ತರಿಸಿದನು. ಪ್ರಯಾಣದ ಅವಧಿಯಲ್ಲಿ ಉಮರ್, "ನೀನು ಯಾವಾಗ ಈ ಕೆಲಸ ಆರಂಭಿಸಿದೆ?" ಎಂದು ಕೇಳಿದಾಗ, ಚಂದನ್ ನೀಡಿದ ಉತ್ತರ ಬದುಕಿನ ಪಾಠದಂತಿತ್ತು. "ಜೀವನ ನಾವು ಅಂದುಕೊಂಡಂತೆ ನಡೆಯುವುದಿಲ್ಲ, ಆದರೆ ನಾನು ಚೆನ್ನಾಗಿದ್ದೇನೆ. ಹಳೆಯ ಗೆಳೆಯನಿಂದ ನಾನು ಹಣ ಪಡೆಯುವುದಿಲ್ಲ" ಎಂದು ಚಂದನ್ ಹಾಸ್ಯ ಚಟಾಕಿ ಹಾರಿಸಿದನು.

ಒಂದಾನೊಂದು ಕಾಲದಲ್ಲಿ ಇಡೀ ಕ್ಲಾಸ್‌ಗೆ ಟಾಪರ್ ಆಗಿದ್ದ ವಿದ್ಯಾರ್ಥಿ ಇಂದು ಬೈಕ್ ರೈಡರ್ ಆಗಿರುವುದನ್ನು ಕಂಡು ಉಮರ್ ಭಾವುಕನಾದನು. ಇದಕ್ಕೆ ಪ್ರತಿಕ್ರಿಯಿಸಿದ ಚಂದನ್, "ಬದುಕು ಅನಿರೀಕ್ಷಿತ, ನನ್ನ ಕ್ಲಾಸ್‌ಮೇಟ್ ನನ್ನ ಗ್ರಾಹಕನಾಗಿ ಸಿಗುತ್ತಾನೆ ಎಂದು ನಾನು ಎಂದು ಊಹಿಸಿರಲಿಲ್ಲ" ಎಂದು ಬದುಕಿನ ಏರಿಳಿತಗಳನ್ನು ಮೆಲುಕು ಹಾಕಿದನು.

'ಭಾರತ್ ಮಾತಾ ಕೆ ಸೇವಕ್' ಎಂಬ ಎಕ್ಸ್ (X) ಖಾತೆಯಲ್ಲಿ ಹಂಚಿಕೊಳ್ಳಲಾದ ಈ ಕಥೆ ಈಗ ಸಾವಿರಾರು ಜನರ ಮನ ಗೆದ್ದಿದೆ. "ಕೇವಲ ಪರೀಕ್ಷೆಯ ಅಂಕಗಳು ವ್ಯಕ್ತಿಯ ಭವಿಷ್ಯವನ್ನು ನಿರ್ಧರಿಸುವುದಿಲ್ಲ. ಪ್ರಾಮಾಣಿಕವಾಗಿ ಮಾಡುವ ಯಾವುದೇ ಕೆಲಸವೂ ಗೌರವಕ್ಕೆ ಅರ್ಹ" ಎಂಬ ಸಂದೇಶವನ್ನು ಈ ಘಟನೆ ಸಾರುತ್ತಿದೆ. ಅನೇಕರು ತಮ್ಮದೇ ಜೀವನದ ಇಂತಹ ಕಹಿ ನೆನಪುಗಳನ್ನು ಕಾಮೆಂಟ್ ಬಾಕ್ಸ್‌ನಲ್ಲಿ ಹಂಚಿಕೊಳ್ಳುತ್ತಿದ್ದಾರೆ,(ಏಜೆನ್ಸೀಸ್).