ಇರಾನ್​ ವಿರುದ್ಧ ಅಮೆರಿಕದ ಎಲ್ಲಾ ಮಿಲಿಟರಿ ಪ್ಲಾನ್ ರದ್ದು: ಷೇರು ಮಾರುಕಟ್ಟೆಯಲ್ಲಿ ಸಂಚಲನ; ಸೆನ್ಸೆಕ್ಸ್ 1,500 ಪಾಯಿಂಟ್ಸ್ ಜಿಗಿತ! | Sensex jumps

ಮುಂಬೈ: ಇರಾನ್ ವಿರುದ್ಧದ ಎಲ್ಲಾ ಸೇನಾ ಕಾರ್ಯಾಚರಣೆಗಳನ್ನು ರದ್ದುಗೊಳಿಸುವುದಾಗಿ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಘೋಷಣೆ ಮಾಡಿದ ಬೆನ್ನಲ್ಲೇ ಶುಕ್ರವಾರದ(ಜೂ. 12) ಷೇರು ಮಾರುಕಟ್ಟೆಯಲ್ಲಿ ಸಂಚಲನ ಸೃಷ್ಟಿಯಾಗಿದ್ದು, ಕಳೆದ ಎರಡು ದಿನಗಳಿಂದ ಬೀಳುತ್ತಿದ್ದ ಮಾರುಕಟ್ಟೆ ಇಂದು ಭಾರಿ ಏರಿಕೆಯಾಗಿದ್ದು, ಸೆನ್ಸೆಕ್ಸ್​​ನಲ್ಲಿ(Sensex jumps) ಸುಮಾರು 1,500 ಪಾಯಿಂಟ್ಸ್ ಜಿಗಿತ ಕಂಡಿವೆ.

ಶುಕ್ರವಾರದ ವಹಿವಾಟಿನಲ್ಲಿ ನಿಫ್ಟಿ50 ಮತ್ತು ಬಿಎಸ್‌ಇ ಸೆನ್ಸೆಕ್ಸ್ ಬಲವಾದ ಏರಿಕೆ ಕಂಡವು. ಸೆನ್ಸೆಕ್ಸ್ 1,500 ಕ್ಕೂ ಹೆಚ್ಚು ಅಂಕಗಳನ್ನು ಗಳಿಸಿದರೆ, ನಿಫ್ಟಿ50 ಮತ್ತೆ 23,500 ಅಂಕಗಳನ್ನು ತಲುಪಿದೆ. ಈ ತೀವ್ರ ಏರಿಕೆಯು ಬಿಎಸ್‌ಇ-ಪಟ್ಟಿಮಾಡಿದ ಸಂಸ್ಥೆಗಳ ಸಂಚಿತ ಮಾರುಕಟ್ಟೆ ಬಂಡವಾಳೀಕರಣವನ್ನು 7 ಲಕ್ಷ ಕೋಟಿ ರೂ.ಗಳಿಗೂ ಹೆಚ್ಚು ಹೆಚ್ಚಿಸಿದೆ.

ಸೆನ್ಸೆಕ್ಸ್‌ನ ಎಲ್ಲಾ 30 ಷೇರುಗಳು ಏರಿಕೆಯೊಂದಿಗೆ ಖರೀದಿ ವಹಿವಾಟು ನಡೆದಿದ್ದು, ಟಾಟಾ ಸ್ಟೀಲ್, ಇಂಡಿಗೊ, ಎಲ್ & ಟಿ, ಎಟರ್ನಲ್, ಎಸ್‌ಬಿಐ ಮತ್ತು ಟೆಕ್ ಮಹೀಂದ್ರಾಗಳು ಗರಿಷ್ಠ ಲಾಭ ಗಳಿಸಿವೆ. ಒಂದೇ ದಿನದಲ್ಲಿ ಶೇ. 3% ರಷ್ಟು ಏರಿಕೆ ಕಂಡಿವೆ.

ಸಂಭಾವ್ಯ ಅಮೆರಿಕ-ಇರಾನ್ ಯುದ್ಧ ನಿಲ್ಲುವ ಮುನ್ಸೂಚನೆ ಬಂದಿದ್ದು, ಈ ವಾರಂತ್ಯದಲ್ಲಿ ಎರಡೂ ದೇಶಗಳ ನಡುವೆ ಶಾಂತಿ ಒಪ್ಪಂದ ಅಂತಿಮಗೊಳಿಸಲಾಗುವುದು ಎಂದು ಅಧ್ಯಕ್ಷ ಟ್ರಂಪ್ ಘೋಷಣೆರ ಮಾಡಿದ್ದಾರೆ. ಜೊತೆಗೆ ಹಾರ್ಮುಜ್ ಜಲಸಂಧಿಯನ್ನು ಜಾಗತಿಕ ಹಡಗು ಸಾಗಣೆಗೆ ಮುಕ್ತಗೊಳಿಸುವ ಸಾಧ್ಯತೆ ಇರುವ ಹಿನ್ನೆಲೆ ಮಾರುಕಟ್ಟೆಯಲ್ಲಿ ಏರಿಕೆಗೆ ಕಾರಣವಾಗಿದೆ.

ಮತ್ತೊಂದು ಬೆಳವಣಿಗೆಯಲ್ಲಿ, ಸಂಘರ್ಷವನ್ನು ಕೊನೆಗೊಳಿಸುವ ಗುರಿಯನ್ನು ಹೊಂದಿರುವ ರಾಜತಾಂತ್ರಿಕ ಪ್ರಯತ್ನಗಳಲ್ಲಿನ ಪ್ರಗತಿಯನ್ನು ಉಲ್ಲೇಖಿಸಿ ಟ್ರಂಪ್ ಇರಾನ್ ವಿರುದ್ಧದ ಎಲ್ಲಾ ಹೆಚ್ಚುವರಿ ಮಿಲಿಟರಿ ಕ್ರಮದ ಯೋಜನೆಗಳನ್ನು ಹಿಂತೆಗೆದುಕೊಂಡಿದ್ದು ಪ್ರಮುಖ ಕಾರಣ.

ಇರಾನ್ ಮತ್ತು ಅಮೆರಿಕ ನಡುವಿನ ಮಾತುಕತೆಗಳಲ್ಲಿ ಸಂಭವನೀಯ ಪ್ರಗತಿಯ ಬಗ್ಗೆ ಆಶಾವಾದ ಬೆಳೆದ ಕಾರಣ ತೈಲ ಬೆಲೆಗಳು ತೀವ್ರ ಕುಸಿತ ಕಂಡಿವೆ. ಪ್ರತಿ ಬ್ಯಾರೆಲ್‌ಗೆ $90 ಕ್ಕಿಂತ ಕಡಿಮೆಯಾಗಿದೆ. ಬ್ರೆಂಟ್ ಕಚ್ಚಾ ತೈಲದ ಬೆಲೆ ಸುಮಾರು 4% ರಷ್ಟು ಕುಸಿದು ಬ್ಯಾರೆಲ್‌ಗೆ $87 ಕ್ಕಿಂತ ಕಡಿಮೆಯಾದರೆ, WTI ಕಚ್ಚಾ ತೈಲದ ಬೆಲೆ 4% ಕ್ಕಿಂತ ಹೆಚ್ಚು ಕುಸಿದು ಬ್ಯಾರೆಲ್‌ಗೆ $83 ಕ್ಕೆ ತಲುಪಿದೆ. ಈ ವರ್ಷದ ಆರಂಭದಲ್ಲಿ ಹಾರ್ಮುಜ್ ಜಲಸಂಧಿ ಮುಚ್ಚಿದ ನಂತರ ತೈಲ ಬೆಲೆಗಳು ಬ್ಯಾರೆಲ್‌ಗೆ $120 ದಾಟಿತ್ತು (ಏಜೆನ್ಸೀಸ್).