ಕೂದಲೆಳೆ ಅಂತರದಲ್ಲಿ ತಪ್ಪಿದ ದುರಂತ! ಏರ್ ಇಂಡಿಯಾ - ಇಂಡಿಗೋ ವಿಮಾನಗಳ ರೆಕ್ಕೆಗಳು ಡಿಕ್ಕಿ.. | Air India IndiGo Collision

ಮಂಗಳವಾರ ಸಂಜೆ ಸುಮಾರು 7:30ರ ಸುಮಾರಿಗೆ ಈ ಘಟನೆ ಸಂಭವಿಸಿದೆ. ಮುಂಬೈಯಿಂದ ಕೊಯಮತ್ತೂರಿಗೆ ಹೊರಟಿದ್ದ ಏರ್ ಇಂಡಿಯಾ ವಿಮಾನವು (AI 2732) ರನ್‌ವೇಗೆ ತೆರಳಲು 'ಟ್ಯಾಕ್ಸಿಂಗ್' (C1 ನಿಂದ M4 ಕಡೆಗೆ) ಮಾಡುತ್ತಿತ್ತು. ಇದೇ ವೇಳೆ ಹೈದರಾಬಾದ್‌ನಿಂದ ಆಗಮಿಸಿದ್ದ ಇಂಡಿಗೋ ವಿಮಾನವು ಲ್ಯಾಂಡಿಂಗ್ ಮುಗಿಸಿ ಪಾರ್ಕಿಂಗ್ ಬೇ (B1) ಕಡೆಗೆ ಬರುತ್ತಿತ್ತು. ಎರಡೂ ವಿಮಾನಗಳು ಸಂಧಿಸುವ ಹಾದಿಯಲ್ಲಿ ಪೈಲಟ್‌ಗಳ ಅಂದಾಜು ತಪ್ಪಿದ ಪರಿಣಾಮ, ಎರಡೂ ವಿಮಾನಗಳ ಬಲಪಕ್ಕದ ರೆಕ್ಕೆಯ ತುದಿಗಳು (Right Wingtips) ಪರಸ್ಪರ ಸ್ಪರ್ಷಿಸಿವೆ.

ಅದೃಷ್ಟವಶಾತ್, ಎರಡೂ ವಿಮಾನಗಳು ಬಹಳ ಕಡಿಮೆ ವೇಗದಲ್ಲಿ ಚಲಿಸುತ್ತಿದ್ದವು. ಹೀಗಾಗಿ ಯಾವುದೇ ಪ್ರಾಣಾಪಾಯ ಸಂಭವಿಸಿಲ್ಲ. ಆದರೂ, ಡಿಕ್ಕಿಯ ರಭಸಕ್ಕೆ ವಿಮಾನದ ರೆಕ್ಕೆಗಳ ತುದಿಗಳು ಜಖಂಗೊಂಡಿವೆ. ಘಟನೆ ಸಂಭವಿಸಿದ ತಕ್ಷಣ ಪೈಲಟ್‌ಗಳು ವಿಮಾನವನ್ನು ಸ್ಥಗಿತಗೊಳಿಸಿದರು. ನಂತರ ಎರಡೂ ವಿಮಾನಗಳನ್ನು ತಪಾಸಣೆಗಾಗಿ ಪಾರ್ಕಿಂಗ್ ಬೇಗೆ ಹಿಂತಿರುಗಿಸಲಾಯಿತು.

ಘಟನೆಯ ಗಂಭೀರತೆಯನ್ನು ಪರಿಗಣಿಸಿ, ನಾಗರಿಕ ವಿಮಾನಯಾನ ಮಹಾನಿರ್ದೇಶನಾಲಯದ (DGCA) ಅಧಿಕಾರಿಗಳು ತಕ್ಷಣವೇ ಸ್ಥಳಕ್ಕೆ ಧಾವಿಸಿದ್ದಾರೆ. ಈ ಅನಾಹುತಕ್ಕೆ ಏರ್ ಟ್ರಾಫಿಕ್ ಕಂಟ್ರೋಲರ್ (ATC) ನೀಡಿದ ತಪ್ಪು ಸೂಚನೆ ಕಾರಣವೇ? ಅಥವಾ ಪೈಲಟ್‌ಗಳ ನಿರ್ಲಕ್ಷ್ಯವೇ? ಎಂಬ ಬಗ್ಗೆ ತನಿಖೆ ನಡೆಯುತ್ತಿದೆ.

ಸುರಕ್ಷತಾ ದೃಷ್ಟಿಯಿಂದ ಎರಡೂ ವಿಮಾನಗಳನ್ನು ಈಗ ನೆಲದಲ್ಲೇ ಸ್ಥಗಿತಗೊಳಿಸಲಾಗಿದೆ (Grounded). ಪ್ರಯಾಣಿಕರಿಗೆ ಪರ್ಯಾಯ ವಿಮಾನಗಳ ವ್ಯವಸ್ಥೆ ಮಾಡಲಾಗಿದೆ ಎಂದು ಏರ್ ಇಂಡಿಯಾ ಮತ್ತು ಇಂಡಿಗೋ ಸಂಸ್ಥೆಗಳು ತಿಳಿಸಿವೆ,(ಏಜೆನ್ಸೀಸ್​).