ಎಲ್ಲೆಲ್ಲೂ AI ಆತಂಕ: ಕೆಲಸ ಹೋಗುವ ಭೀತಿ ಡೆನ್ಮಾರ್ಕ್‌ಗೆ ಏಕೆ ಇಲ್ಲ? ಭಾರತಕ್ಕೆ ಈ ಮಾದರಿ ಸಾಧ್ಯವೇ?

ಹೌದು, ಆದರೆ, ಈ ಆತಂಕದ ನಡುವೆಯೂ ಯುರೋಪಿನ ಒಂದು ಪುಟ್ಟ ದೇಶ 'ಡೆನ್ಮಾರ್ಕ್' ಮಾತ್ರ ವಿಭಿನ್ನವಾಗಿ ಕಾಣಿಸುತ್ತಿದೆ. ಅಲ್ಲಿನ ಕಾರ್ಮಿಕರು ಎಐ ತಂತ್ರಜ್ಞಾನದ ಬಗ್ಗೆ ಎಳ್ಳಷ್ಟೂ ಹೆದರುತ್ತಿಲ್ಲ. ಹಾಗಾದರೆ, ಇಡೀ ಜಗತ್ತನ್ನೇ ಕಾಡುತ್ತಿರುವ ಈ ಭೀತಿಗೆ ಡೆನ್ಮಾರ್ಕ್ ಕಂಡುಕೊಂಡ ಮದ್ದು ಯಾವುದು? ಭಾರತದಂತಹ ಬೃಹತ್ ದೇಶದಲ್ಲಿ ಅದನ್ನು ಜಾರಿಗೆ ತರಲು ಸಾಧ್ಯವೇ? ಎನ್ನುವ ಕುರಿತ ಒಂದು ವಿಶ್ಲೇಷಣೆ ಇಲ್ಲಿದೆ.

ಡೆನ್ಮಾರ್ಕ್ 1990ರ ದಶಕದಲ್ಲೇ 'ಫ್ಲೆಕ್ಸಿಕುರಿಟಿ' (Flexicurity) ಎಂಬ ಅದ್ಭುತ ಮಾದರಿಯನ್ನು ಜಾರಿಗೆ ತಂದಿದೆ. ಇದು 'ಫ್ಲೆಕ್ಸಿಬಿಲಿಟಿ' (Flexibility - ನಮ್ಯತೆ) ಮತ್ತು 'ಸೆಕ್ಯುರಿಟಿ' (Security - ಭದ್ರತೆ) ಎಂಬ ಎರಡು ಪದಗಳ ಸಮ್ಮಿಲನ. ಇದನ್ನು ಅಲ್ಲಿ 'ಗೋಲ್ಡನ್ ಟ್ರಯಾಂಗಲ್' ಅಥವಾ 'ಸುವರ್ಣ ತ್ರಿಕೋನ' ಎಂದು ಕರೆಯಲಾಗುತ್ತದೆ. ಈ ಮಾದರಿಯು ಮೂರು ಮುಖ್ಯ ಸ್ತಂಭಗಳ ಮೇಲೆ ನಿಂತಿದೆ.

ಉದ್ಯೋಗದಾತರಿಗೆ ಸ್ವಾತಂತ್ರ್ಯ (Flexibility): ಕಂಪನಿಗಳಿಗೆ ಹೊಸ ತಂತ್ರಜ್ಞಾನಗಳನ್ನು ಅಳವಡಿಸಿಕೊಳ್ಳಲು ಪೂರಕವಾಗಿ ಉದ್ಯೋಗಿಗಳನ್ನು ಸುಲಭವಾಗಿ ಕೆಲಸಕ್ಕೆ ತೆಗೆದುಕೊಳ್ಳಲು ಮತ್ತು ತೆಗೆದುಹಾಕಲು ಇಲ್ಲಿ ಮುಕ್ತ ಅವಕಾಶವಿದೆ.

ಬಲಿಷ್ಠ ಸಾಮಾಜಿಕ ಭದ್ರತೆ (Security): ಕೆಲಸ ಕಳೆದುಕೊಂಡ ಉದ್ಯೋಗಿಗಳಿಗೆ ಅಲ್ಲಿನ ಸರ್ಕಾರವು ಹಳೆಯ ಸಂಬಳದ ಶೇ. 90ರಷ್ಟು ಹಣವನ್ನು ನಿರುದ್ಯೋಗ ಭತ್ಯೆಯಾಗಿ ನೀಡುತ್ತದೆ. ಇದು ತಿಂಗಳಿಗೆ ಗರಿಷ್ಠ 22,041 ಡ್ಯಾನಿಶ್ ಕ್ರೋನ್ (ಅಂದಾಜು 3.30 ಲಕ್ಷ ರೂಪಾಯಿ) ವರೆಗೆ ಇರುತ್ತದೆ. ಇಂತಹ ಸಹಾಯವು ಸುಮಾರು ಎರಡು ವರ್ಷಗಳವರೆಗೆ ಸಿಗುತ್ತದೆ.

ಮರು-ತರಬೇತಿ (Retraining): ಕೆಲಸ ಕಳೆದುಕೊಂಡವರು ಮನೆಯಲ್ಲಿ ಸುಮ್ಮನೆ ಕೂರದಂತೆ, ಬದಲಾದ ತಂತ್ರಜ್ಞಾನಕ್ಕೆ ತಕ್ಕಂತೆ ಅವರಿಗೆ ಸರ್ಕಾರವೇ ಉಚಿತವಾಗಿ ಹೊಸ ಕೌಶಲ್ಯಗಳನ್ನು ಅಥವಾ ಮರು-ತರಬೇತಿಯನ್ನು ನೀಡುತ್ತದೆ.

ನೊಬೆಲ್ ಪ್ರಶಸ್ತಿ ವಿಜೇತ ಅರ್ಥಶಾಸ್ತ್ರಜ್ಞ ಪೀಟರ್ ಹೊವಿಟ್ ಅವರ ಪ್ರಕಾರ, ಈ ವ್ಯವಸ್ಥೆಯಿಂದಾಗಿ ಡೆನ್ಮಾರ್ಕ್‌ನ ಕಾರ್ಮಿಕರು ಹೊಸ ತಂತ್ರಜ್ಞಾನಗಳ ಬಗ್ಗೆ ಭಯಪಡುವ ಬದಲು ಅವುಗಳನ್ನು ಸ್ವಾಗತಿಸುತ್ತಾರೆ.

ಇದು ಕೇಳಲು ಬಹಳ ಆಕರ್ಷಕವಾಗಿದ್ದರೂ, ಭಾರತದಂತಹ ದೇಶದಲ್ಲಿ ಇದನ್ನು ಜಾರಿಗೆ ತರುವುದು ಅಷ್ಟು ಸುಲಭವಲ್ಲ ಎನ್ನುತ್ತಾರೆ ಅರ್ಥಶಾಸ್ತ್ರಜ್ಞರು. ಅವರ ಪ್ರಕಾರ ಭಾರತದಲ್ಲಿ ಸದ್ಯಕ್ಕೆ ಅರ್ಧದಷ್ಟು ಮಾದರಿ ಮಾತ್ರ ಜಾರಿಯಲ್ಲಿದೆ.

ಭಾರತದಲ್ಲಿ ಕೇವಲ 'ಫ್ಲೆಕ್ಸಿಬಿಲಿಟಿ' ಇದೆ: ಭಾರತದಲ್ಲಿ ಕಂಪನಿಗಳು ಉದ್ಯೋಗಿಗಳನ್ನು ಕೆಲಸದಿಂದ ತೆಗೆದುಹಾಕುವುದು ಸುಲಭವಾಗಿದೆ, ಆದರೆ ಅವರಿಗೆ ಯಾವುದೇ ರೀತಿಯ ಭದ್ರತೆ ಸಿಗುತ್ತಿಲ್ಲ.

ಅಸಂಘಟಿತ ವಲಯದ ಸಮಸ್ಯೆ: ಭಾರತದ ಬಹುಪಾಲು ಕಾರ್ಮಿಕರು ಅಸಂಘಟಿತ ವಲಯದಲ್ಲಿದ್ದಾರೆ (Informal Sector). ಇಲ್ಲಿ ಯಾವುದೇ ಉದ್ಯೋಗ ಭದ್ರತೆ ಮೊದಲೇ ಇಲ್ಲ. ಈಗ ಸರ್ಕಾರಿ ಕೆಲಸಗಳು ಮತ್ತು ಕಾರ್ಪೊರೇಟ್ ವಲಯವೂ 'ಗುತ್ತಿಗೆ ಆಧಾರಿತ' (Contractual) ಮಾದರಿಗೆ ಬದಲಾಗುತ್ತಿರುವುದು ಆತಂಕಕಾರಿ.

ಆರ್ಥಿಕ ಹೊರೆ: ಡೆನ್ಮಾರ್ಕ್ ಕೇವಲ 60 ಲಕ್ಷ ಜನಸಂಖ್ಯೆ ಹೊಂದಿರುವ ಪುಟ್ಟ ದೇಶ. ಅಲ್ಲಿ ತೆರಿಗೆ ಸಂಗ್ರಹ ಹೆಚ್ಚು. ಆದರೆ 140 ಕೋಟಿ ಜನಸಂಖ್ಯೆ ಇರುವ ಭಾರತದಲ್ಲಿ ಎಲ್ಲರಿಗೂ ಶೇ. 90ರಷ್ಟು ಸಂಬಳ ಭತ್ಯೆ ನೀಡುವುದು ಬೊಕ್ಕಸಕ್ಕೆ ಅಸಾಧ್ಯದ ಮಾತು. ಭಾರತಕ್ಕೆ ಮೂಲಸೌಕರ್ಯ, ಕೃಷಿ ಸಹಾಯಧನ ಮತ್ತು ಆಹಾರ ಭದ್ರತೆಯಂತಹ ಬೇರೆ ದೊಡ್ಡ ಜವಾಬ್ದಾರಿಗಳಿವೆ.

ಹೊಸ ತಂತ್ರಜ್ಞಾನ ಬಂದಾಗ ಕೆಲಸಗಳು ಹೋಗುವುದು ಇತಿಹಾಸದಲ್ಲಿ ಮೊದಲೇನಲ್ಲ. ಕೈಗಾರಿಕಾ ಕ್ರಾಂತಿ ಬಂದಾಗಲೂ ಲಕ್ಷಾಂತರ ಜನರು ಕೆಲಸ ಕಳೆದುಕೊಳ್ಳುವ ಭೀತಿಯಿಂದ ಯಂತ್ರಗಳನ್ನು ಒಡೆದು ಹಾಕಿದ್ದರು. ಆದರೆ ನಂತರದ ದಿನಗಳಲ್ಲಿ ಅವು ಹೊಸ ಉದ್ಯೋಗಗಳನ್ನು ಸೃಷ್ಟಿಸಿದವು. ಕಂಪ್ಯೂಟರ್ ಬಂದಾಗಲೂ ಇದೇ ಪರಿಸ್ಥಿತಿ ಇತ್ತು.

ಪೀಟರ್ ಹೊವಿಟ್ ಎಚ್ಚರಿಸುವಂತೆ, ಯಾವುದೇ ದೇಶ ಹೊಸ ತಂತ್ರಜ್ಞಾನವನ್ನು ವಿರೋಧಿಸಿದರೆ ಅದು ಆರ್ಥಿಕವಾಗಿ ಹಿಂದೆ ಬೀಳುತ್ತದೆ. ಎಐ ತಂದೊಡ್ಡುವ ಬದಲಾವಣೆ ಈಗ 'ಅನಿವಾರ್ಯ'. ಪ್ರಾರಂಭದಲ್ಲಿ ಇದು ಕೆಲವು ಕಷ್ಟಗಳನ್ನು ನೀಡಬಹುದು, ಆದರೆ ದೀರ್ಘಕಾಲದಲ್ಲಿ ಇದು ಸಮಾಜಕ್ಕೆ ಲಾಭದಾಯಕವಾಗಲಿದೆ. ಕಂಪನಿಗಳು ಎಐ ಮೂಲಕ ಹೆಚ್ಚು ಲಾಭ ಗಳಿಸಿದಂತೆ, ಆ ಹಣ ಮತ್ತೆ ಆರ್ಥಿಕತೆಯಲ್ಲಿ ಹೂಡಿಕೆಯಾಗಿ ಹೊಸ ರೀತಿಯ ಕೆಲಸಗಳು ಹುಟ್ಟಿಕೊಳ್ಳುತ್ತವೆ ಎಂಬುದು ತಜ್ಞರ ಆಶಾವಾದ.

ಎಐ ಹಾವಳಿಯಿಂದ ಉದ್ಯೋಗ ಮಾರುಕಟ್ಟೆಯಲ್ಲಿ ಬದಲಾವಣೆ ಸಂಭವಿಸುವುದು ನಿಶ್ಚಿತ. ಆದರೆ ಭಾರತದಂತಹ ದೇಶಗಳು ಡೆನ್ಮಾರ್ಕ್‌ನಂತೆಯೇ ಪೂರ್ಣ ಪ್ರಮಾಣದ ಭದ್ರತೆ ನೀಡಲು ಸಾಧ್ಯವಾಗದಿದ್ದರೂ, ಕನಿಷ್ಠ ಉದ್ಯೋಗಿಗಳಿಗೆ ಮರು-ತರಬೇತಿ ನೀಡುವ ಮತ್ತು ಸಣ್ಣ ಪ್ರಮಾಣದ ಆರ್ಥಿಕ ರಕ್ಷಣೆ ನೀಡುವ ಬಗ್ಗೆ ಚಿಂತಿಸಬೇಕಾದ ಕಾಲ ಎದುರಾಗಿದೆ,(ಏಜೆನ್ಸೀಸ್​).