ಇತಿಹಾಸ ಸೃಷ್ಟಿಸಲು ಎನ್‌ಡಿಎ ರೆಡಿ!.. ದೇಶದ ರಾಜಕೀಯ ಚಿತ್ರಣವನ್ನೇ ಬದಲಿಸಲಿದೆಯೇ ಆ 'ಆರು' ಮತಗಳ ಮ್ಯಾಜಿಕ್? | Delimitation Bill

ಲೋಕಸಭೆಯಲ್ಲಿ ಈ ಹಿಂದೆ ಕೇವಲ 54 ಮತಗಳ ಕೊರತೆಯಿಂದಾಗಿ ಸ್ಥಗಿತಗೊಂಡಿದ್ದ ಆ ಸಾಂವಿಧಾನಿಕ ಮಸೂದೆಯನ್ನು ಈಗ ಸಂಸತ್ತಿನಲ್ಲಿ ಮತ್ತೆ ಮಂಡಿಸಿದರೆ, ಅದು ಅತ್ಯಂತ ಸುಲಭವಾಗಿ ಅಂಗೀಕಾರವಾಗುವ ಎಲ್ಲಾ ಸಾಧ್ಯತೆಗಳು ಸ್ಪಷ್ಟವಾಗಿ ಕಾಣಿಸುತ್ತಿವೆ. ಪ್ರಸ್ತುತ ಪಶ್ಚಿಮ ಬಂಗಾಳ ಹಾಗೂ ಮಹಾರಾಷ್ಟ್ರ ರಾಜಕಾರಣದಲ್ಲಿ ಸಂಭವಿಸುತ್ತಿರುವ ನಾಟಕೀಯ ಬೆಳವಣಿಗೆಗಳು ಇದಕ್ಕೆ ಪ್ರಮುಖ ಕಾರಣ ಎಂದು ರಾಜಕೀಯ ವಿಶ್ಲೇಷಕರು ಅಭಿಪ್ರಾಯಪಟ್ಟಿದ್ದಾರೆ.

ಇತ್ತೀಚೆಗೆ ನಡೆದ ವಿಧಾನಸಭಾ ಚುನಾವಣೆಯಲ್ಲಿ ತೃಣಮೂಲ ಕಾಂಗ್ರೆಸ್ ಹೀನಾಯ ಸೋಲು ಅನುಭವಿಸಿದ ಬೆನ್ನಲ್ಲೇ, ಆ ಪಕ್ಷವು ಎಲ್ಲಾ ಹಂತಗಳಲ್ಲೂ ಕುಸಿಯತೊಡಗಿದೆ. ಬಂಗಾಳದ ವಿಧಾನಸಭೆಯಲ್ಲಿ ಟಿಎಂಸಿ ಮೊದಲ ಬಾರಿಗೆ ಈ ಮಟ್ಟದ ಭಿನ್ನಮತ ಕಂಡಿತಾದರೂ, ಇದರ ತೀವ್ರ ಸ್ವರೂಪದ ಅಲೆಗಳು ಈಗ ಸಂಸತ್ತಿನಲ್ಲಿ ಪ್ರತಿಧ್ವನಿಸಲು ಆರಂಭಿಸಿವೆ. ಮಮತಾ ಬ್ಯಾನರ್ಜಿ ಪಕ್ಷದ ಒಟ್ಟು 28 ಲೋಕಸಭಾ ಸಂಸದರ ಪೈಕಿ 20 ಸಂಸದರು ಪಕ್ಷದಿಂದ ಹೊರಬಂದು, ನ್ಯಾಷನಲಿಸ್ಟ್ ಸಿಟಿಜನ್ಸ್ ಪಾರ್ಟಿ ಆಫ್ ಇಂಡಿಯಾ (NCPI) ಎಂಬ ಸಣ್ಣ ಪಕ್ಷದೊಂದಿಗೆ ತಮ್ಮ ಬಣವನ್ನು ವಿಲೀನಗೊಳಿಸಿದ್ದಾರೆ. ಈ ಹಿಂದೆ ತ್ರಿಪುರಾದ ಚುನಾವಣಾ ಕಣಕ್ಕೆ ಇಳಿದು ಧೂಳೀಪಟವಾಗಿದ್ದ ಈ ಅನಾಮಧೇಯ ಪಕ್ಷ, ಈಗ ಟಿಎಂಸಿ ಬಂಡಾಯ ಸಂಸದರ ಸೇರ್ಪಡೆಯಿಂದಾಗಿ ನೇರವಾಗಿ ಸಂಸತ್ತನ್ನು ಪ್ರವೇಶಿಸುತ್ತಿರುವುದಲ್ಲದೆ, ಕೇಂದ್ರದ ಆಡಳಿತಾರೂಢ ಎನ್‌ಡಿಎ ಮೈತ್ರಿಕೂಟದ ಪಾಲಾಗುತ್ತಿದೆ.

ಇತ್ತ ಮಹಾರಾಷ್ಟ್ರದಲ್ಲೂ ಉದ್ಧವ್ ಠಾಕ್ರೆ ನೇತೃತ್ವದ ಶಿವಸೇನೆ (UBT) ತೀವ್ರ ಸಂಕಷ್ಟಕ್ಕೆ ಸಿಲುಕಿದಂತೆ ಕಾಣಿಸುತ್ತಿದೆ. ಠಾಕ್ರೆ ಬಣದ ಒಟ್ಟು ಒಂಬತ್ತು ಲೋಕಸಭಾ ಸಂಸದರ ಪೈಕಿ ಆರು ಮಂದಿ ಪಕ್ಷದಿಂದ ಹೊರನಡೆಯುವ ಹಂತದಲ್ಲಿದ್ದು, ಅವರೆಲ್ಲಾ ಉಪ ಮುಖ್ಯಮಂತ್ರಿ ಏಕನಾಥ್ ಶಿಂಧೆ ಬಣವನ್ನು ಸೇರಿಕೊಳ್ಳಲಿದ್ದಾರೆ ಎನ್ನಲಾಗಿದೆ. ಈ ಎಲ್ಲಾ ನಾಟಕೀಯ ಬೆಳವಣಿಗೆಗಳ ಅಂತಿಮ ಲಾಭವು ನೇರವಾಗಿ ಎನ್‌ಡಿಎ ಮೈತ್ರಿಕೂಟಕ್ಕೆ ಸಿಗಲಿದೆ. ಮುಂಬರುವ ಮುಂಗಾರು ಅಧಿವೇಶನ ಆರಂಭವಾಗುವ ಮೊದಲೇ ಲೋಕಸಭೆಯಲ್ಲಿ ಮೂರನೇ ಎರಡರಷ್ಟು ಬಹುಮತದ ಗುರಿಯನ್ನು ಮುಟ್ಟಲು ಎನ್‌ಡಿಎಗೆ ಇದು ಸುವರ್ಣಾವಕಾಶ ಒದಗಿಸಿದೆ. ತಿದ್ದುಪಡಿ ಮಸೂದೆಗಳನ್ನು ಸಂಸತ್ತಿನಲ್ಲಿ ಅಂಗೀಕರಿಸಲು ಈ ಮೂರನೇ ಎರಡರಷ್ಟು ಸಂಖ್ಯಾಬಲ ಅತ್ಯಂತ ನಿರ್ಣಾಯಕವಾಗಿದೆ.

ಸದ್ಯದ ಸಂಸತ್ತಿನ ಸಂಖ್ಯಾಬಲದ ಸ್ಪಷ್ಟ ಚಿತ್ರಣವನ್ನು ನೋಡುವುದಾದರೆ, ಲೋಕಸಭೆಯ ಒಟ್ಟು 543 ಸ್ಥಾನಗಳಲ್ಲಿ ಮೂರನೇ ಎರಡರಷ್ಟು ಎಂದರೆ 362 ಸ್ಥಾನಗಳಾಗುತ್ತವೆ. ಆದರೆ ಪ್ರಸ್ತುತ ಮೂರು ಸ್ಥಾನಗಳು ಖಾಲಿ ಇರುವುದರಿಂದ ಮ್ಯಾಜಿಕ್ ನಂಬರ್ 360 ಕ್ಕೆ ಇಳಿದಿದೆ. ಪ್ರಸ್ತುತ, ತೃಣಮೂಲ ಕಾಂಗ್ರೆಸ್‌ನಿಂದ ಬೇರ್ಪಟ್ಟ ಬಣವನ್ನು ಒಳಗೊಂಡಂತೆ ಎನ್‌ಡಿಎ ಮೈತ್ರಿಕೂಟವು ಲೋಕಸಭೆಯಲ್ಲಿ 318 ಸಂಸದರನ್ನು ಹೊಂದಿದೆ. ವಿರೋಧ ಪಕ್ಷಗಳ ಬಲ 184 ರಷ್ಟಿದ್ದರೆ, ಯಾವುದೇ ಮೈತ್ರಿಕೂಟಕ್ಕೆ ಸೇರದ 38 ತಟಸ್ಥ ಸಂಸದರಿದ್ದಾರೆ. ಹೀಗಾಗಿ, ಸಂವಿಧಾನ ತಿದ್ದುಪಡಿ ಮಸೂದೆಗಳನ್ನು ಅಂಗೀಕರಿಸಲು ಸರ್ಕಾರಕ್ಕೆ ಇನ್ನೂ 42 ಸಂಸದರ ಬೆಂಬಲ ಬೇಕಾಗುತ್ತದೆ. ಆದರೆ, ಸಂಸತ್ತಿನ ನಿಯಮಗಳ ಪ್ರಕಾರ ಮಸೂದೆ ಮಂಡನೆಯಾಗಿ ಮತದಾನ ನಡೆಯುವ ಸಮಯದಲ್ಲಿ ಸದನದಲ್ಲಿ ಹಾಜರಿದ್ದು ಮತ ಚಲಾಯಿಸುವ ಸಂಸದರ ಸಂಖ್ಯೆಯೇ ಇಲ್ಲಿ ಅಂತಿಮವಾಗುತ್ತದೆ.

ಉದಾಹರಣೆಗೆ, ಬಜೆಟ್ ಅಧಿವೇಶನದಲ್ಲಿ ಮಹಿಳಾ ಮೀಸಲಾತಿ ಮತ್ತು ಸಂವಿಧಾನ ತಿದ್ದುಪಡಿ ಮಸೂದೆಯ ಮೇಲಿನ ಮತದಾನದ ಸಮಯದಲ್ಲಿ 540 ಸದಸ್ಯರ ಪೈಕಿ 528 ಮಂದಿ ಮಾತ್ರ ಹಾಜರಿದ್ದರು ಮತ್ತು ಆಗ ಬಹುಮತಕ್ಕೆ 352 ಮತಗಳ ಅಗತ್ಯವಿತ್ತು. ಆಗ ಅಂಕಿಅಂಶಗಳ ಪ್ರಕಾರ ಸರ್ಕಾರದ ಪರವಾಗಿ 298 ಮತಗಳು ಮಾತ್ರ ಚಲಾವಣೆಯಾಗಿದ್ದರಿಂದ, ಮಸೂದೆಯು ಲೋಕಸಭೆಯಲ್ಲಿ 54 ಮತಗಳ ಕೊರತೆಯಿಂದ ಸೋಲನ್ನು ಅನುಭವಿಸಿತ್ತು. ಆ ಹಳೆಯ ಸನ್ನಿವೇಶವನ್ನು ಗಮನದಲ್ಲಿಟ್ಟುಕೊಂಡು ಲೆಕ್ಕ ಹಾಕಿದರೆ, ಮತದಾನದ ದಿನ 12 ಸಂಸದರು ಗೈರುಹಾಜರಾಗಿದ್ದ ಕಾರಣ ಸರ್ಕಾರಕ್ಕೆ ತನ್ನ ಪರವಾಗಿ ಒಟ್ಟು 54 ಸಂಸದರನ್ನು ಸೆಳೆಯುವ ಅನಿವಾರ್ಯತೆ ಇದೆ.

ಈ ಅಗತ್ಯವಿರುವ 54 ಸಂಸದರ ಪೈಕಿ, ಈಗ ಎನ್‌ಸಿಪಿಐ ಪಕ್ಷದ ಭಾಗವಾಗಿರುವ ತೃಣಮೂಲ ಕಾಂಗ್ರೆಸ್‌ನ 20 ಬಂಡಾಯ ಸಂಸದರು ಎನ್‌ಡಿಎ ಜೊತೆಗಿದ್ದಾರೆ. ಇದರೊಂದಿಗೆ ಮಹಾರಾಷ್ಟ್ರದ ಶಿವಸೇನೆ ಯುಬಿಟಿಯ ಆರು ಬಂಡಾಯ ಸಂಸದರು ಕೂಡ ಕೈಜೋಡಿಸಿದರೆ ಈ ಸಂಖ್ಯಾಬಲ 26 ಕ್ಕೆ ಏರಲಿದೆ. ಇದರ ಬೆನ್ನಲ್ಲೇ, ಕಾಂಗ್ರೆಸ್ ಜೊತೆಗಿನ ಭಿನ್ನಾಭಿಪ್ರಾಯದ ಕಾರಣದಿಂದಾಗಿ ವಿರೋಧ ಪಕ್ಷಗಳ ಇಂಡಿಯಾ ಒಕ್ಕೂಟದಿಂದ ಹೊರಬಂದಿರುವ ಎಂ ಕೆ ಸ್ಟಾಲಿನ್ ನೇತೃತ್ವದ ಡಿಎಂಕೆ ಪಕ್ಷವು ಕೂಡ ಕೇಂದ್ರ ಸರ್ಕಾರಕ್ಕೆ ಬೆಂಬಲ ನೀಡುವ ಮುನ್ಸೂಚನೆ ಸಿಗುತ್ತಿದೆ. ಕೇಂದ್ರ ಸರ್ಕಾರವು ಈಗಾಗಲೇ ಡಿಎಂಕೆ ನಾಯಕರೊಂದಿಗೆ ಮಾತುಕತೆ ನಡೆಸುತ್ತಿದ್ದು, ಅವರ ಬೇಡಿಕೆಗಳಿಗೆ ಒಪ್ಪಿಗೆ ಸೂಚಿಸಿದರೆ ಡಿಎಂಕೆಯ 22 ಸಂಸದರ ಬಲವೂ ಸರ್ಕಾರಕ್ಕೆ ಸಿಗಲಿದೆ. ಆಗ ಎನ್‌ಡಿಎ ಸಂಖ್ಯಾಬಲ 348 ಕ್ಕೆ ತಲುಪಲಿದ್ದು, ಬಹುಮತಕ್ಕೆ ಕೇವಲ ಆರು ಮತಗಳ ಕೊರತೆಯಷ್ಟೇ ಬಾಕಿ ಉಳಿಯುತ್ತದೆ.

ಹೀಗೆ ಬಾಕಿ ಉಳಿಯುವ ಕೊನೆಯ ಆರು ಮತಗಳು ಎಲ್ಲಿಂದ ಬರಬಹುದು ಎಂಬ ಪ್ರಶ್ನೆಗೆ ಉತ್ತರ ಪ್ರದೇಶದ ಸಚಿವ ಓಂ ಪ್ರಕಾಶ್ ರಾಜ್‌ಭರ್ ಅವರು ಸಮಾಜವಾದಿ ಪಕ್ಷದ ಕಡೆಗೆ ಬೆರಳು ತೋರಿಸಿದ್ದಾರೆ. ಆದರೆ ಮುಂದಿನ ವರ್ಷ ಉತ್ತರ ಪ್ರದೇಶದ ವಿಧಾನಸಭಾ ಚುನಾವಣೆ ಇರುವುದರಿಂದ ಸಮಾಜವಾದಿ ಪಕ್ಷದ ಕೋಟೆಗೆ ಲಗ್ಗೆ ಇಡುವುದು ಸದ್ಯಕ್ಕೆ ಅಷ್ಟು ಸುಲಭವಲ್ಲ. ಈ ಕಾರಣದಿಂದಾಗಿ, ಬಿಜೆಪಿ ನಾಯಕರು ಇಂಡಿಯಾ ಒಕ್ಕೂಟದಲ್ಲಿರುವ ಇತರ ಸಣ್ಣ ಪಕ್ಷಗಳ ಮೇಲೆ ಕಣ್ಣಿಟ್ಟಿದ್ದು, ಈಗಾಗಲೇ ಮಹಾರಾಷ್ಟ್ರದ ಕೆಲವು ಸಣ್ಣ ಪಕ್ಷಗಳ ನಾಯಕರೊಂದಿಗೆ ಸಂಪರ್ಕದಲ್ಲಿದ್ದಾರೆ ಎಂದು ತಿಳಿದುಬಂದಿದೆ.

ಇನ್ನು ರಾಜ್ಯಸಭೆಯ ವಿಷಯಕ್ಕೆ ಬಂದರೆ, ಅಲ್ಲಿ ಮೂರನೇ ಎರಡರಷ್ಟು ಬಹುಮತ ಸಾಧಿಸಲು 164 ಸಂಸದರ ಬೆಂಬಲ ಬೇಕಾಗುತ್ತದೆ. ರಾಜ್ಯಸಭೆಯ ಗರಿಷ್ಠ ಮಿತಿ 250 ಸ್ಥಾನಗಳಾಗಿದ್ದರೂ ಸದ್ಯದ ಸದಸ್ಯರ ಬಲ 245 ಆಗಿದೆ. ಇದರಲ್ಲಿ ಎನ್‌ಡಿಎ ಮೈತ್ರಿಕೂಟವು ಸದ್ಯ 150 ಸಂಸದರನ್ನು ಹೊಂದಿದ್ದು, ಡಿಎಂಕೆಯ 8 ಸಂಸದರ ಬೆಂಬಲ ಸಿಕ್ಕರೆ ಈ ಸಂಖ್ಯೆ 158 ಕ್ಕೆ ತಲುಪುತ್ತದೆ ಮತ್ತು ಅಲ್ಲಿಯೂ ಬಹುಮತಕ್ಕೆ ಕೇವಲ ಆರು ಮತಗಳಷ್ಟೇ ಬಾಕಿ ಉಳಿಯುತ್ತವೆ. ತೃಣಮೂಲ ಕಾಂಗ್ರೆಸ್‌ನ ಮೂವರು ಸಂಸದರ ರಾಜೀನಾಮೆಯಿಂದ ತೆರವಾಗಿರುವ ಸ್ಥಾನಗಳಿಗೆ ನಡೆಯಲಿರುವ ಉಪಚುನಾವಣೆ ಮತ್ತು ಕೆಲವು ಸಣ್ಣ ಪಕ್ಷಗಳ ಬೆಂಬಲದೊಂದಿಗೆ ಎನ್‌ಡಿಎ ರಾಜ್ಯಸಭೆಯಲ್ಲೂ ಮ್ಯಾಜಿಕ್ ನಂಬರ್ ತಲುಪುವುದು ಅತ್ಯಂತ ಸರಳವಾಗಿದೆ.

ಒಟ್ಟಿನಲ್ಲಿ ಈ ಎಲ್ಲಾ ಸಂಖ್ಯಾಬಲದ ತಂತ್ರಗಳು ಯಶಸ್ವಿಯಾದರೆ, ಮುಂದಿನ ತಿಂಗಳು ಆರಂಭವಾಗಲಿರುವ ಮುಂಗಾರು ಅಧಿವೇಶನದಲ್ಲೇ ಮಹಿಳಾ ಮೀಸಲಾತಿ ಮತ್ತು ಕ್ಷೇತ್ರ ಪುನರ್ವಿಂಗಡಣೆ ಮಸೂದೆಗಳು ಮತ್ತೆ ಮುಂಚೂಣಿಗೆ ಬರಲಿವೆ. ಇದರ ಬೆನ್ನಲ್ಲೇ ದೇಶಾದ್ಯಂತ ಸಂಚಲನ ಮೂಡಿಸಲಿರುವ ಒಂದು ದೇಶ, ಒಂದು ಚುನಾವಣೆ ಮಸೂದೆಯನ್ನು ಜಾರಿಗೆ ತರಲು ಸರ್ಕಾರ ತಡ ಮಾಡುವುದಿಲ್ಲ ಎಂದು ರಾಜಕೀಯ ವಲಯದಲ್ಲಿ ಚರ್ಚೆಯಾಗುತ್ತಿದೆ(ಏಜೆನ್ಸೀಸ್​).