ಪ್ರಧಾನಿ ಮೋದಿ ಆಪ್ತ ಸಲಹೆಗಾರ ಬಂಗಾಳದ ಮುಂದಿನ ಹಣಕಾಸು ಸಚಿವ..? ಯಾರು ಈ ಸಂಜೀವ್ ಸನ್ಯಾಲ್..? | Sanjeev Sanyal

ಬಂಗಾಳದ ಆರ್ಥಿಕತೆಯನ್ನು ಮುನ್ನಡೆಸಲು ಬಿಜೆಪಿಗೆ ಆರ್ಥಿಕ ತಜ್ಞರ ಕೊರತೆಯಿದೆ ಎಂಬ ಊಹಾಪೋಹಗಳ ನಡುವೆ, ಜನಪ್ರಿಯ ಅರ್ಥಶಾಸ್ತ್ರಜ್ಞ ಸಂಜೀವ್ ಸನ್ಯಾಲ್ ಮೇ 9 ರಂದು ಹಂಚಿಕೊಂಡಿರುವ ಒಂದು ಪೋಸ್ಟ್ ರಾಜ್ಯದ ಮಂತ್ರಿ ಮಂಡಲ ಸೇರಬಹುದು ಎಂಬ ಸುಳಿವನ್ನು ನೀಡಿದೆ. ಸನ್ಯಾಲ್ ಸ್ವತಃ ಬಂಗಾಳಿ ಮೂಲದವರಾಗಿದ್ದು, ಅವರ ಕುಟುಂಬಕ್ಕೂ ರಾಜ್ಯಕ್ಕೂ ದೊಡ್ದ ನಂಟಿದೆ.

ಸದ್ಯ ಪಶ್ಚಿಮ ಬಂಗಾಳದಲ್ಲಿ ಮುಖ್ಯಮಂತ್ರಿ ಸುವೇಂದು ಅಧಿಕಾರಿ ಅವರೊಂದಿಗೆ ಕೇವಲ ಐದು ಸಚಿವರು ಮಾತ್ರ ಪ್ರಮಾಣ ವಚನ ಸ್ವೀಕರಿಸಿದ್ದು, ಸುವೇಂದು ಅವರೇ ಗೃಹ, ಶಿಕ್ಷಣ, ಆರೋಗ್ಯ, ಕೈಗಾರಿಕೆ ಮತ್ತು ವಾಣಿಜ್ಯದ ಜೊತೆಗೆ ಪ್ರಮುಖವಾದ ಹಣಕಾಸು ಖಾತೆಯನ್ನು ಸದ್ಯಕ್ಕೆ ನಿಭಾಯಿಸುತ್ತಿದ್ದಾರೆ. ಉನ್ನತ ಮಟ್ಟದ ಆರ್ಥಿಕ ಪರಿಣತಿ ಹೊಂದಿರುವ ಶಾಸಕರ ಕೊರತೆ ಬಿಜೆಪಿಯನ್ನು ಸಂದಿಗ್ಧತೆಗೆ ತಳ್ಳಿದೆ.

ಈ ಹಿನ್ನೆಲೆಯಲ್ಲಿ, ಪ್ರಧಾನ ಮಂತ್ರಿಗಳ ಆರ್ಥಿಕ ಸಲಹಾ ಮಂಡಳಿಯ (ಇಎಸಿ) ಸದಸ್ಯರಾಗಿರುವ ಸನ್ಯಾಲ್ ಹಣಕಾಸು ಸಚಿವರಾಗಲು ಮುಂಚೂಣಿಯಲ್ಲಿದ್ದಾರೆ ಎಂದು ದಿ ಟೆಲಿಗ್ರಾಫ್ ವರದಿ ಮಾಡಿದೆ. ಕೇಂದ್ರ ಸಚಿವರಾದ ಎಸ್. ಜೈಶಂಕರ್ ಮತ್ತು ಹರ್ದೀಪ್ ಸಿಂಗ್ ಪುರಿ ಅವರಂತೆ ಅನುಭವಿ ಅಧಿಕಾರಿಗಳನ್ನು ರಾಜಕೀಯ ಪಾತ್ರಗಳಿಗೆ ತರುವ ಸಂಪ್ರದಾಯವನ್ನು ಬಿಜೆಪಿ ಅನುಸರಿಸುತ್ತಿರುವುದರಿಂದ ಸನ್ಯಾಲ್ ಆಯ್ಕೆಯಾದರು ಅಚ್ಚರಿಪಡಬೇಕಿಲ್ಲ.

ಇದಷ್ಟೇ ಅಲ್ಲದೆ, ಅವರು ಕ್ರಾಂತಿಕಾರಿ ಸ್ವಾತಂತ್ರ್ಯ ಹೋರಾಟಗಾರ ಸಚೀಂದ್ರ ನಾಥ್ ಸನ್ಯಾಲ್​ರ ಮೊಮ್ಮಗ ಮತ್ತು ಅವರ ಮುತ್ತಜ್ಜ ನಳಿನಾಕ್ಷ ಸನ್ಯಾಲ್ ಅವಿಭಜಿತ ಬಂಗಾಳ ವಿಧಾನಸಭೆಯ ಕಾಂಗ್ರೆಸ್ ಮುಖ್ಯ ಸಚೇತಕರಾಗಿದ್ದರು ಎನ್ನಲಾಗಿದೆ.

ಬಂಗಾಳದ ಆರ್ಥಿಕ ಸ್ಥಿತಿ ಸದ್ಯಕ್ಕೆ ಹೇಳಿಕೊಳ್ಳುವ ಸ್ತಿತಿಯಲ್ಲಿಲ್ಲ ಎಂದು ಮೂಲಗಳು ತಿಳಿಸಿದ್ದು, ದೇಶದ ಜಿಡಿಪಿಯಲ್ಲಿ ರಾಜ್ಯದ ಪಾಲು ಶೇ. 10.5 ರಿಂದ ಈಗ ಶೇ. 5.6 ಕ್ಕೆ ಕುಸಿದಿದೆ. ಕೈಗಾರಿಕೆಗಳ ಮುಚ್ಚುವಿಕೆ, ಯುವ ಪ್ರತಿಭೆಗಳ ವಲಸೆ ಮತ್ತು 7.7 ಲಕ್ಷ ಕೋಟಿ ರೂಪಾಯಿಗಳ ಸಾಲದ ಹೊರೆ ಹೊಸ ಸರ್ಕಾರಕ್ಕೆ ದೊಡ್ಡ ಸವಾಲಾಗಿದೆ. ಸುವೇಂದು ಅಧಿಕಾರಿ ನಂದಿಗ್ರಾಮ ಸ್ಥಾನವನ್ನು ಬಿಟ್ಟು ಭಬಾನಿಪುರವನ್ನು ಉಳಿಸಿಕೊಂಡರೆ, ಸನ್ಯಾಲ್​ರನ್ನು ನಂದಿಗ್ರಾಮದಿಂದ ಉಪಚುನಾವಣೆಯಲ್ಲಿ ಕಣಕ್ಕಿಳಿಸುವ ಸಾಧ್ಯತೆಗಳಿವೆ.

ಮಾಜಿ ಶಾಸಕ ಅಶೋಕ್ ಲಾಹಿರಿ ಅವರ ಹೆಸರು ಕೇಳಿಬಂದಿದ್ದರೂ, ಅವರು ನೀತಿ ಆಯೋಗದ ಉಪಾಧ್ಯಕ್ಷರಾಗಿರುವುದರಿಂದ ಸನ್ಯಾಲ್ ಅವರೇ ಈ ಜವಾಬ್ದಾರಿಗೆ ಪ್ರಮುಖ ಆಯ್ಕೆಯಾಗುವ ಲಕ್ಷಣಗಳಿವೆ. ಮಣ್ಣಿನ ಮಗನಾಗಿ ಸನ್ಯಾಲ್ ಬಂಗಾಳದ ಆರ್ಥಿಕ ಪುನರುಜ್ಜೀವನಕ್ಕೆ ನಾಂದಿ ಹಾಡುತ್ತಾರೆಯೇ ಎನ್ನುವುದನ್ನು ಕೆಲ ತಿಂಗಳುಗಳ ಕಾಲ ಕಾದು ನೋಡಬೇಕಿದೆ(ಏಜೆನ್ಸೀಸ್​).