ದೇಶ

ಜಾತಿ ಗಣತಿ ಹಾಲಿ ಫಾರ್ಮ್‌ ರದ್ದು ಮಾಡಿ! ಮೋದಿ ಸರ್ಕಾರಕ್ಕೆ ಖರ್ಗೆ-ರಾಹುಲ್‌ ಹೊಸ ಡಿಮ್ಯಾಂಡ್ | Cancel the caste census form

ಜಾತಿ ಗಣತಿ ಪ್ರಶ್ನಾವಳಿ ಬದಲಿಸಲು ಪ್ರಧಾನಿ ಮೋದಿಗೆ ರಾಹುಲ್ ಗಾಂಧಿ ಮತ್ತು ಮಲ್ಲಿಕಾರ್ಜುನ ಖರ್ಗೆ ಆಗ್ರಹ
ಜಾತಿ ಗಣತಿ ಪ್ರಶ್ನಾವಳಿ ಬದಲಿಸಲು ಪ್ರಧಾನಿ ಮೋದಿಗೆ ರಾಹುಲ್ ಗಾಂಧಿ ಮತ್ತು ಮಲ್ಲಿಕಾರ್ಜುನ ಖರ್ಗೆ ಆಗ್ರಹ
Published on: 

ಪ್ರಮುಖ ಮುಖ್ಯಾಂಶಗಳು

  • ಜಾತಿ ಗಣತಿಯ ಹಾಲಿ ಪ್ರಶ್ನಾವಳಿ ರದ್ದು ಮಾಡಲು ಖರ್ಗೆ, ರಾಹುಲ್ ಆಗ್ರಹ
  • ಸರ್ವ ಪಕ್ಷಗಳು, ತಜ್ಞರ ಜತೆ ಸಮಾಲೋಚಿಸಿ ಹೊಸ ಪ್ರಶ್ನಾವಳಿ ರೂಪಿಸಿ
  • ತೆಲಂಗಾಣ, ಬಿಹಾರದ ಜಾತಿ ಸಮೀಕ್ಷೆ ಮಾದರಿ ಅನುಸರಿಸಲು ಸಲಹೆ
Caste Census: ಜಾತಿ ಗಣತಿ ವಿಚಾರವಾಗಿ ಕಾಂಗ್ರೆಸ್‌ ನಾಯಕರು ಕೇಂದ್ರ ಸರ್ಕಾರದ ವಿರುದ್ಧ ಮತ್ತೆ ಆಕ್ಷೇಪ ವ್ಯಕ್ತಪಡಿಸಿದ್ದಾರೆ. ಲೋಕಸಭೆ ವಿರೋಧ ಪಕ್ಷದ ನಾಯಕ ರಾಹುಲ್ ಗಾಂಧಿ ಹಾಗೂ ರಾಜ್ಯಸಭೆ ವಿರೋಧ ಪಕ್ಷದ ನಾಯಕ ಮಲ್ಲಿಕಾರ್ಜುನ ಖರ್ಗೆ ಅವರು ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ಪತ್ರ ಬರೆದಿದ್ದಾರೆ. ಜಾತಿ ಗಣತಿ ಹಾಲಿ ಫಾರ್ಮ್‌ ರದ್ದು ಮಾಡಿ, ಹೊಸದಾಗಿ ರೂಪಿಸಿ ಎಂದು ಆಗ್ರಹಿಸಿದ್ದಾರೆ.
ಜಾತಿ ಗಣತಿಯನ್ನು ಈಗ ನಡೆಸುತ್ತಿರುವ ರೀತಿ ಸರಯಿಲ್ಲ ಎಂದಿರುವ ಖರ್ಗೆ ಮತ್ತು ರಾಹುಲ್, ರಾಜಕೀಯ ಪಕ್ಷಗಳು, ತಜ್ಞರು ಹಾಗೂ ಸಾರ್ವಜನಿಕರ ಜೊತೆ ಸಮಾಲೋಚನೆ ನಡೆಸಿ ಹೊಸ ಪ್ರಶ್ನಾವಳಿ ಸಿದ್ಧಪಡಿಸಬೇಕು ಎಂದು ಹೇಳಿದ್ದಾರೆ. ಈ ವಿಚಾರದಲ್ಲಿ ತೆಲಂಗಾಣ ಮತ್ತು ಬಿಹಾರದಲ್ಲಿ ನಡೆದ ಜಾತಿ ಸಮೀಕ್ಷೆಗಳ ಮಾದರಿಯನ್ನು ಅನುಸರಿಸುವಂತೆಯೂ ಸಲಹೆ ನೀಡಿದ್ದಾರೆ.

ಆಗಸ್ಟ್ 20ರಂದು ಖರ್ಗೆ ಮತ್ತು ರಾಹುಲ್ ಬರೆದ ಪತ್ರದ ಬಗ್ಗೆ ಕಾಂಗ್ರೆಸ್ ಪ್ರಧಾನ ಕಾರ್ಯದರ್ಶಿ ಜೈರಾಮ್ ರಮೇಶ್ ಮಾಹಿತಿ ನೀಡಿದ್ದಾರೆ. ಕೇಂದ್ರ ಸರ್ಕಾರ ಜಾತಿ ಗಣತಿ ವಿಚಾರದಲ್ಲಿ ಕೈಗೊಳ್ಳುತ್ತಿರುವ ಕ್ರಮಗಳು ಕೇವಲ ‘ಕಣ್ಣೊರೆಸುವ ತಂತ್ರ’ ಎಂದು ಟೀಕಿಸಿದ್ದಾರೆ. ಈ ಕುರಿತು ಕಾಂಗ್ರೆಸ್ ನಾಯಕತ್ವ, ಪ್ರಧಾನಿ ಮೋದಿಗೆ ಬರೆಯುತ್ತಿರುವ ಮೂರನೇ ಪತ್ರ ಇದಾಗಿದ್ದು, ಈ ಹಿಂದಿನ ಪತ್ರಗಳಿಗೆ ಯಾವುದೇ ಉತ್ತರ ಬಂದಿಲ್ಲವೆಂದು ರಮೇಶ್ ಹೇಳಿದ್ದಾರೆ.

ಹಾಲಿ ಪ್ರಶ್ನಾವಳಿಗೆ ಕಾಂಗ್ರೆಸ್ ಆಕ್ಷೇಪ ಯಾಕೆ?

ಜಾತಿಗಳ ನಿಖರ ಸಂಖ್ಯಾಬಲ ಮತ್ತು ಸಾಮಾಜಿಕ-ಆರ್ಥಿಕ ಸ್ಥಿತಿಯ ಬಗ್ಗೆ ಸ್ಪಷ್ಟ ಮಾಹಿತಿ ಸಿಗದಿದ್ದರೆ ಸಾಮಾಜಿಕ ನ್ಯಾಯವನ್ನು ಪರಿಣಾಮಕಾರಿಯಾಗಿ ಜಾರಿ ಮಾಡಲು ಸಾಧ್ಯವಿಲ್ಲ ಎಂದು ಖರ್ಗೆ ಮತ್ತು ರಾಹುಲ್ ಪತ್ರದಲ್ಲಿ ತಿಳಿಸಿದ್ದಾರೆ. ಪ್ರಸ್ತುತ ಜಾತಿ ವಿವರಗಳನ್ನು ಮುಕ್ತ ಮಾದರಿಯಲ್ಲಿ ದಾಖಲಿಸಲಾಗುತ್ತಿದೆ. ಇದರಿಂದ ಒಂದೇ ಜಾತಿಯ ಬೇರೆ ಬೇರೆ ಹೆಸರು, ಉಪಜಾತಿ ಹಾಗೂ ಭಾಷಾ ರೂಪಗಳು ಪ್ರತ್ಯೇಕವಾಗಿ ದಾಖಲಾಗುವ ಸಾಧ್ಯತೆ ಇದೆ. ಪರಿಣಾಮವಾಗಿ ಒಂದೇ ಜಾತಿ ಹಲವು ಹೆಸರುಗಳಾಗಿ ವಿಭಜನೆಯಾಗಿ, ನಿಖರ ಸಂಖ್ಯೆಯನ್ನು ಲೆಕ್ಕಹಾಕುವುದು ಕಷ್ಟವಾಗಬಹುದು ಎಂದು ಕಾಂಗ್ರೆಸ್ ನಾಯಕರು ಹೇಳಿದ್ದಾರೆ.

OBC ಜನಸಂಖ್ಯೆಯ ಮಾಹಿತಿ ಸಿಗುವುದಿಲ್ಲವೇ?

ಖರ್ಗೆ ಮತ್ತು ರಾಹುಲ್ ಪ್ರಕಾರ, ಹಾಲಿ ವಿಧಾನದಲ್ಲಿ ದೇಶದ ಒಬಿಸಿ ಜನಸಂಖ್ಯೆಯ ನಿಖರ ಮಾಹಿತಿ ಸಿಗದಿರುವ ಸಾಧ್ಯತೆ ಇದೆ. ಜಾತಿ ಗಣತಿಯ ಪ್ರಸ್ತುತ ವ್ಯವಸ್ಥೆಯಲ್ಲಿ ‘ಹಿಂದುಳುದ ವರ್ಗಗಳು’ ಎಂಬ ಪದವೇ ಇಲ್ಲನ್ನು ಅವರು ಪ್ರಶ್ನಿಸಿದ್ದಾರೆ. ಇದಕ್ಕೆ ಪರಿಹಾರವಾಗಿ, ಎಸ್​ಸಿ ಮತ್ತು ಎಸ್​ಟಿ ಗಣತಿಯಲ್ಲಿ ಬಳಸುವಂತೆ ಜಾತಿಗಳ ಹೆಸರಿನ ‘ಡ್ರಾಪ್‌ಡೌನ್‌ ಲಿಸ್ಟ್’ ಸಿದ್ಧಪಡಿಸಿ ಗಣತಿ ನಡೆಸಿ ಎಂದು ಇಬ್ಬರೂ ನಾಯಕರು ಸಲಹೆ ನೀಡಿದ್ದಾರೆ.

ಬಿಹಾರ, ತೆಲಂಗಾಣ ಮಾದರಿ ಪ್ರಸ್ತಾಪ

ತೆಲಂಗಾಣ ಮತ್ತು ಬಿಹಾರ ಜಾತಿ ಸಮೀಕ್ಷೆಗಳಲ್ಲಿ ಇದೇ ಮಾದರಿಯ ಜಾತಿ ಪಟ್ಟಿಯನ್ನು ಬಳಸಲಾಗಿದೆ ಎಂದು ಕಾಂಗ್ರೆಸ್ ನಾಯಕರು ಹೇಳಿದ್ದಾರೆ. ಹಾಲಿ ಪ್ರಶ್ನಾವಳಿಯನ್ನು ರದ್ದುಪಡಿಸಿ, ರಾಜಕೀಯ ಪಕ್ಷಗಳು, ತಜ್ಞರು ಹಾಗೂ ಸಾರ್ವಜನಿಕರ ಜೊತೆ ಸಮಾಲೋಚಿಸಿ ಹೊಸ ಪ್ರಶ್ನಾವಳಿ ರೂಪಿಸುವಂತೆ ಖರ್ಗೆ ಮತ್ತು ರಾಹುಲ್ ಆಗ್ರಹಿಸಿದ್ದಾರೆ. ಈ ಮೂಲಕ ಜಾತಿ ಗಣತಿ ಜನರಿಗೆ ಉಪಯುಕ್ತವಾಗಬೇಕು ಎಂಬುದು ಕಾಂಗ್ರೆಸ್ ನಾಯಕರ ಒತ್ತಾಯವಾಗಿದೆ,(ಏಜೆನ್ಸೀಸ್​).
Congress
Rahul Gandhi
Narendra Modi
Caste Census
Mallikarjun Kharge
ಜಾತಿ ಗಣತಿ
obc
Social Justice
india politics
bihar-telangana caste survey
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net