ದೇಶ

ಆಧಾರ್ ಫೋಟೋ ಸರಿ ಇಲ್ಲವೇ? ಎಷ್ಟು ಬಾರಿ ಬದಲಾಯಿಸಬಹುದು ಗೊತ್ತಾ? ಇಲ್ಲಿದೆ ಕಂಪ್ಲೀಟ್ ಡಿಟೇಲ್ಸ್! Aadhaar Photo Update

Aadhaar Photo Update ಸಾಂದರ್ಭಿಕ ಚಿತ್ರ
Aadhaar Photo Update ಸಾಂದರ್ಭಿಕ ಚಿತ್ರ
Published on: 

Aadhaar Photo Update: ಆಧಾರ್ ಎಂಬ ಪದವು 'ಆಧಾರ' ಅಥವಾ 'ಬುನಾಧಿ' ಎಂಬ ಅರ್ಥವನ್ನು ನೀಡುತ್ತದೆ. ಪ್ರಸ್ತುತ ಭಾರತದಲ್ಲಿ ಸರ್ಕಾರಿ ಮತ್ತು ಸಾರ್ವಜನಿಕ ಸೇವೆಗಳನ್ನು ಪಡೆದುಕೊಳ್ಳಲು ಆಧಾರ್ ಕಾರ್ಡ್ ಪ್ರಮುಖ ಆಧಾರವಾಗಿದೆ. ಖಾಸಗಿ ವಲಯದ ಹಲವು ಸೇವೆಗಳಿಗೂ ಇದನ್ನು ಗುರುತಿನ ಚೀಟಿಯಾಗಿ ವ್ಯಾಪಕವಾಗಿ ಬಳಸಲಾಗುತ್ತಿದೆ. ರೈಲು ಟಿಕೆಟ್ ಬುಕ್ ಮಾಡುವುದಿರಲಿ, ಹೊಸ ಸಿಮ್ ಕಾರ್ಡ್ ಪಡೆಯುವುದಿರಲಿ ಅಥವಾ ಮಗುವನ್ನು ಶಾಲೆಗೆ ಸೇರಿಸುವುದಿರಲಿ, ಮೊದಲು ಕೇಳಲಾಗುವ ದಾಖಲೆಗಳಲ್ಲಿ ಆಧಾರ್ ಪ್ರಮುಖವಾದದ್ದು.

ಅನೇಕರಿಗೆ ತಮ್ಮ ಆಧಾರ್ ಕಾರ್ಡ್‌ನಲ್ಲಿರುವ ಫೋಟೋ ಇಷ್ಟವಾಗುವುದಿಲ್ಲ. ಕಾರ್ಡ್ ಮಾಡಿಸುವಾಗ ಗಮನ ಹರಿಸದೆ, ನಂತರ ಫೋಟೋ ಸರಿ ಇಲ್ಲ ಎಂದು ಬೇಸರ ಪಟ್ಟುಕೊಳ್ಳುತ್ತೇವೆ. ಇಂತಹ ಸಂದರ್ಭದಲ್ಲಿ ಆಧಾರ್​ನಲ್ಲಿ ಫೋಟೋ ಬದಲಾಯಿಸಬಹುದೇ ಅಥವಾ ಈಗಾಗಲೇ ಬದಲಾಯಿಸಿದ್ದರೆ ಮತ್ತೆ ಬದಲಾಯಿಸುವ ಅವಕಾಶವಿದಿಯೇ ಎಂಬ ಪ್ರಶ್ನೆಗಳು ಹುಟ್ಟುವುದು ಸಹಜ.

ಆಧಾರ್ ಫೋಟೋ ಬದಲಾವಣೆಯ ನಿಯಮಗಳು ಮತ್ತು ಸೀಮಿತತೆ

Unique Identification Authority of India (UIDAI) ಅಧಿಕೃತ ಮಾಹಿತಿಯ ಪ್ರಕಾರ, ಆಧಾರ್ ಕಾರ್ಡ್‌ನಲ್ಲಿ ನಿಮ್ಮ ಫೋಟೋವನ್ನು ಎಷ್ಟು ಬಾರಿ ಬೇಕಾದರೂ ಬದಲಾಯಿಸಿಕೊಳ್ಳಬಹುದು. ಇದಕ್ಕೆ ಯಾವುದೇ ನಿರ್ದಿಷ್ಟ ಮಿತಿ ಇರುವುದಿಲ್ಲ. ನೀವೇನಾದರೂ ಫೋಟೋ ಬದಲಾಯಿಸಬೇಕಿದ್ದರೆ ಹತ್ತಿರದ ಆಧಾರ್ ಕೇಂದ್ರಕ್ಕೆ ಭೇಟಿ ನೀಡಿ ಬಯೋಮೆಟ್ರಿಕ್ ಅಪ್‌ಡೇಟ್ ನೀಡಿ.

ಫೋಟೋ ಬದಲಾಯಿಸುವ ಪ್ರಕ್ರಿಯೆ ಮತ್ತು ನಿಗದಿತ ಶುಲ್ಕ

ಆಧಾರ್‌ನಲ್ಲಿ ಫೋಟೋ ಬದಲಾಯಿಸುವ ಸೌಲಭ್ಯವಿದ್ದರೂ, ಇದನ್ನು ಮನೆಯಲ್ಲಿಯೇ ಕುಳಿತು ಆನ್‌ಲೈನ್ ಮೂಲಕ ಮಾಡಲು ಸಾಧ್ಯವಿಲ್ಲ. ಈ ಪ್ರಕ್ರಿಯೆಗೆ ಕ್ಯಾಮೆರಾ ಮತ್ತು ಬಯೋಮೆಟ್ರಿಕ್ ಪರಿಶೀಲನೆಯ ಅಗತ್ಯವಿರುವುದರಿಂದ ಕಡ್ಡಾಯವಾಗಿ ಹತ್ತಿರದ ಆಧಾರ್ ಸೇವಾ ಕೇಂದ್ರಕ್ಕೆ ಭೇಟಿ ನೀಡಬೇಕಾಗುತ್ತದೆ.
ಅಲ್ಲಿ ಆಧಾರ್ ಅಪ್‌ಡೇಟ್ ಫಾರಂ ಭರ್ತಿ ಮಾಡಿ ನೀಡಿದ ನಂತರ ಬಯೋಮೆಟ್ರಿಕ್ ಪರಿಶೀಲನೆ ನಡೆಯುತ್ತದೆ. ಬಳಿಕ ಕೇಂದ್ರದಲ್ಲಿರುವ ಕ್ಯಾಮೆರಾದ ಮೂಲಕ ಹೊಸ ಫೋಟೋ ತೆಗೆಯಲಾಗುತ್ತದೆ. ಈ ನವೀಕರಣಕ್ಕಾಗಿ 125 ರೂಪಾಯಿ ಶುಲ್ಕ ಪಾವತಿಸಬೇಕಾಗುತ್ತದೆ. ಈ ಪ್ರಕ್ರಿಯೆ ಪೂರ್ಣಗೊಂಡ ಕೆಲವು ದಿನಗಳಲ್ಲಿ ವಿವರಗಳು ನವೀಕರಣಗೊಳ್ಳಲಿದ್ದು, ಆ ನಂತರ ಹೊಸ ಆಧಾರ್ ಕಾರ್ಡ್ ಅನ್ನು ಡೌನ್‌ಲೋಡ್ ಮಾಡಿಕೊಳ್ಳಬಹುದು.

ಅರ್ಜಿ ತಿರಸ್ಕೃತಗೊಂಡರೆ ದೂರು ಸಲ್ಲಿಸುವ ಮಾರ್ಗಗಳು

ನಿಮ್ಮ ಫೋಟೋ ಬದಲಾವಣೆ ವಿನಂತಿ ತಿರಸ್ಕೃತಗೊಂಡರೆ ದೂರು ನೀಡಲು ಹಲವು ಮಾರ್ಗಗಳಿವೆ. UIDAI ನ 'Grievance Redressal Portal' ಗೆ ಭೇಟಿ ನೀಡಿ ಆನ್‌ಲೈನ್ ಮೂಲಕ ದೂರು ದಾಖಲಿಸಬಹುದು. ಅಥವಾ help[at]uidai[dot]gov[dot]in ಗೆ ಇ-ಮೇಲ್ ಕಳುಹಿಸಬಹುದು. ಉಚಿತ ದೂರವಾಣಿ ಸಂಖ್ಯೆ 1947 ಗೆ ಕರೆ ಮಾಡಿ ಅಥವಾ UIDAI ನ ಪ್ರಾದೇಶಿಕ ಕಚೇರಿಗೆ ನೇರವಾಗಿ ಭೇಟಿ ನೀಡಿಯೂ ದೂರು ಸಲ್ಲಿಸಬಹುದು (ಏಜೆನ್ಸೀಸ್).
AadhaarCard
aadhaarphotoupdate
uidaiupdate
aadhaarcardcorrection
aadhaarsevakendra
biometricupdate
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net