ಅಪರಿಚಿತ ಶವ ಪತ್ತೆಗೆ ಆಧಾರ್ ಆಧಾರ! ಬಯೋಮೆಟ್ರಿಕ್ ಡೇಟಾ ಬಳಸಲು ಪೊಲೀಸರಿಗೆ ಸರ್ಕಾರದಿಂದ ಅನುಮತಿ

| ಕೀರ್ತಿನಾರಾಯಣ ಸಿ. ಬೆಂಗಳೂರು

ರಾಜ್ಯದಲ್ಲಿ ಅಪರಿಚಿತ ಶವಗಳ ಸಂಖ್ಯೆ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಮೃತದೇಹಗಳ ಗುರುತು ಪತ್ತೆಹಚ್ಚಲು ಆಧಾರ್ ಬಯೋಮೆಟ್ರಿಕ್ ಡೇಟಾ ಬಳಸಲು ಪೊಲೀಸರಿಗೆ ಅನುಮತಿ ಸಿಕ್ಕಿದೆ. ಶವ ಪತ್ತೆಯಾದ 72 ಗಂಟೆಗಳಲ್ಲಿ ಲಭ್ಯ ಸಾಕ್ಷ್ಯಾಧಾರದಲ್ಲಿ ಗುರುತು ಪತ್ತೆಹಚ್ಚಲು ಸಾಧ್ಯವಾಗದಿದ್ದರಷ್ಟೇ ಆಧಾರ್ ಮಾಹಿತಿ ಬಳಸಬೇಕೆಂದು ಷರತ್ತು ವಿಧಿಸಲಾಗಿದೆ.

ಕೇಂದ್ರ ಸರ್ಕಾರ ರೂಪಿಸಿರುವ ಮಾರ್ಗಸೂಚಿ ಅನ್ವಯ ಆಧಾರ್ ಕಾಯ್ದೆ 2016ರ ಸೆಕ್ಷನ್ 33ರ ಪ್ರಕಾರ ಆಧಾರ್ ಮಾಹಿತಿ ಬಳಸಲು ಪೊಲೀಸರಿಗೆ ಸರ್ಕಾರ ಅನುಮತಿ ಕೊಟ್ಟಿದೆ. ಇದರಿಂದ ಕ್ರಿಮಿನಲ್ ಪ್ರಕರಣಗಳ ತ್ವರಿತ ತನಿಖೆಗೂ ಪೊಲೀಸರಿಗೆ ನೆರವಾಗಲಿದೆ. ಇದೇ ವೇಳೆ ಆಧಾರ್ ಮಾಹಿತಿ ಬಳಸಲು ಕಟ್ಟುನಿಟ್ಟಿನ ನಿಯಮಗಳನ್ನೂ ಕೇಂದ್ರ ಸರ್ಕಾರ ರೂಪಿಸಿದ್ದು, ಆ ಮಾರ್ಗಸೂಚಿ ಪಾಲಿಸುವ ಮುಖೇನ ಆಧಾರ್ ಬಯೋಮೆಟ್ರಿಕ್ ಡೇಟಾ ಬಳಸುವಂತೆ ರಾಜ್ಯದ ಪೊಲೀಸರಿಗೆ ಲಿಖಿತ ಸೂಚನೆ ಕೊಡಲಾಗಿದೆ. ಆಧಾರ್ ಬಯೋಮೆಟ್ರಿಕ್ ಮಾಹಿತಿ ಬಳಕೆಗೂ ಮುನ್ನ ತನಿಖಾಧಿಕಾರಿಗಳು ಕೆಲವೊಂದು ಸಾಂಪ್ರದಾಯಿಕ ವಿಧಾನಗಳಿಂದ ಮೃತದೇಹಗಳ ಗುರುತು ಪತ್ತೆಹಚ್ಚಲು ಪ್ರಯತ್ನಿಸಬೇಕು.

ಶವ ಸಿಕ್ಕರೆ ಏನು ಮಾಡಬೇಕು?

• ಶವದ ಬಗ್ಗೆ ಮಾಹಿತಿ ಸಿಕ್ಕರೆ ತಕ್ಷಣ ಠಾಣೆಯ ಡೈಲಿ ಡೈರಿಯಲ್ಲಿ ನಮೂದು ಮಾಡಬೇಕು
• ಮೃತದೇಹ ಸಿಕ್ಕ ಸ್ಥಳಕ್ಕೆ ಖುದ್ದು ಠಾಣಾಧಿಕಾರಿ/ತನಿಖಾಧಿಕಾರಿ ಭೇಟಿ ಕೊಡಬೇಕು
• ಸ್ಥಳದಲ್ಲಿ ಲಭ್ಯವಿರುವ ಸಾಂರ್ದಭಿಕ ಸಾಕ್ಷ್ಯಾಧಾರಗಳ ಸಂಗ್ರಹಿಸಿ ವಿಚಾರಣೆ ನಡೆಸಬೇಕು
• ಸ್ಥಳಕ್ಕೆ ವಿಧಿವಿಜ್ಞಾನ ಪ್ರಯೋಗಾಲಯದ ಅಧಿಕಾರಿಗಳನ್ನು ಕರೆಸಿ, ಪರಿಶೀಲಿಸಬೇಕು
• ವಿವಿಧ ಕೋನಗಳಿಂದ ಶವದ ಹೈ ರೆಸಲೂಷನ್ ಫೋಟೋಗಳನ್ನು ತೆಗೆಯಬೇಕು
• ಶವದ ಬೆರಳಚ್ಚು ಹಾಗೂ ಡಿಎನ್​ಎ ಪರೀಕ್ಷೆಗಾಗಿ ಮಾದರಿಯನ್ನು ಸಂಗ್ರಹಿಸಬೇಕು

ಆಧಾರ್ ಬಳಕೆಗೆ ಅನುಮತಿ ಹೇಗೆ?

• ಶವ ಸಿಕ್ಕ 72 ಗಂಟೆಯಲ್ಲಿ ಗುರುತು ಪತ್ತೆಯಾಗದಿದ್ದರಷ್ಟೇ ಬಳಸಬಹುದ
• ಆಧಾರ್ ಬಳಸುವ ಕುರಿತು ಸಂಬಂಧಪಟ್ಟ ಎಸ್​ಪಿಗೆ ವರದಿ ಸಲ್ಲಿಸಬೇಕು
• ಆಧಾರ್ ಬಯೋಮೆಟ್ರಿಕ್ ಡೇಟಾ ಬಳಕೆ ಅನಿವಾರ್ಯತೆ ತಿಳಿಸಬೇಕು
• ಎಸ್ಪಿ ಅದೇ ದಿನ ಮನವಿಯನ್ನು ಪೊಲೀಸ್ ನೋಡಲ್ ಅಧಿಕಾರಿಗೆ ನೀಡಬೇಕು
• ನೋಡಲ್ ಅಧಿಕಾರಿ, ಎಸ್ಪಿ ಶ್ರೇಣಿಗಿಂತ ಕಡಿಮೆಯಿಲ್ಲದ ಅಧಿಕಾರಿ ನೇಮಿಸಬೇಕು
• ಆಧಾರ್ ಕಾಯ್ದೆ 2016ರ ಸೆಕ್ಷನ್ 33ರ ಕಾನೂನು ನಿಬಂಧನೆ ಪಾಲಿಸಬೇಕು
• ಡೇಟಾ ಅಗತ್ಯದ ಬಗ್ಗೆ ಗೃಹ ಸಚಿವಾಲಯದ ಜಂಟಿ ಕಾರ್ಯದರ್ಶಿಗೆ ವರದಿ ಕಳಿಸಬೇಕು
• ಭಾರತದ ವಿಶಿಷ್ಟ ಗುರುತಿನ ಪ್ರಾಧಿಕಾರದೊಂದಿಗೆ ಆಧಾರ್ ಡೇಟಾ ಬಳಕೆಗೆ ಅನುಮತಿ ಬೇಕು
• ಬೇಕಾಬಿಟ್ಟಿ, ಅಸ್ಪಷ್ಟ ಮಾಹಿತಿ, ಅಗತ್ಯವಿಲ್ಲದಿದ್ದರೂ ಆಧಾರ್ ಬಳಕೆಗೆ ಅನುಮತಿ ಕೇಳಬಾರದು