ಬುಧವಾರದಂದು ಸಮೀರ್ ಖಾನ್ ತಮ್ಮ ಮೊಬೈಲ್ ರೀಚಾರ್ಜ್ ಮಾಡುವ ಸಲುವಾಗಿ ಬ್ಯಾಂಕಿಂಗ್ ಆ್ಯಪ್ ಓಪನ್ ಮಾಡಿ ಪಿನ್ ನಮೂದಿಸಿ ಬ್ಯಾಲೆನ್ಸ್ ತಪಾಸಣೆ ನಡೆಸಿದ್ದಾರೆ. ಆದರೆ, ಆ್ಯಪ್‌ನಲ್ಲಿ ಅವರ ಖಾತೆಯಲ್ಲಿ ಜೀರೋ ಬ್ಯಾಲೆನ್ಸ್ ತೋರಿಸಿದೆ. ತಕ್ಷಣವೇ ಗಾಬರಿಗೊಂಡು ಖಾತೆಯ ವಿವರಗಳನ್ನು ಆಳವಾಗಿ ಪರಿಶೀಲಿಸಿದಾಗ, ಅವರ ಖಾತೆಯ ಮೇಲೆ 10,000 ಕೋಟಿಗೂ (1,00,00,00,00,000) ಹೆಚ್ಚು ಮೊತ್ತದ 'ಲಿಯನ್' (Lien/Hold) ವಿಧಿಸಿರುವುದು ಕಂಡುಬಂದಿದೆ. ಇದರಿಂದಾಗಿ ಅವರ ಖಾತೆಯಲ್ಲಿದ್ದ ಸ್ವಂತ ಉಳಿತಾಯದ ಹಣ ಸುಮಾರು 55,000 ಕೂಡ ನೆಗೆಟಿವ್ ಬ್ಯಾಲೆನ್ಸ್ ತೋರಿಸಿ, ಅದನ್ನು ಬಳಸಲಾಗದಂತೆ ಸಂಪೂರ್ಣವಾಗಿ ಬ್ಲಾಕ್ ಆಗಿತ್ತು.
ತನ್ನ ಖಾತೆಯಲ್ಲಿ ಈ ಪರಿ ಮೊತ್ತದ ವ್ಯತ್ಯಾಸ ಹಾಗೂ ಮೈನಸ್ ಬ್ಯಾಲೆನ್ಸ್ ನೋಡಿ ದಿಗ್ಭ್ರಮೆಗೊಂಡ ಸಮೀರ್, ತಕ್ಷಣವೇ ವಿಷಯವನ್ನು ತಮ್ಮ ಯಜಮಾನರಾದ ಧೀರಜ್ ಶರ್ಮಾ ಅವರಿಗೆ ತಿಳಿಸಿದ್ದಾರೆ. ಪರಿಸ್ಥಿತಿಯ ಗಂಭೀರತೆಯನ್ನು ಅರಿತ ಇಬ್ಬರೂ ಕೂಡಲೇ ಸಿಕಾರ್ ಸೈಬರ್ ಪೊಲೀಸ್ ಠಾಣೆಗೆ ಧಾವಿಸಿ ದೂರು ನೀಡಿದ್ದಾರೆ. ಆದರೆ, ದೂರು ಆಲಿಸಿದ ಪೊಲೀಸರು ಇದು ಬ್ಯಾಂಕಿಂಗ್ ವ್ಯವಸ್ಥೆಯ ವಿಷಯವಾದ್ದರಿಂದ ತಕ್ಷಣವೇ ನೇರವಾಗಿ ಸಂಬಂಧಪಟ್ಟ ಬ್ಯಾಂಕ್ ಶಾಖೆಯನ್ನು ಸಂಪರ್ಕಿಸುವಂತೆ ಸಲಹೆ ನೀಡಿದ್ದಾರೆ. ಅದರಂತೆ ಅವರು ಬ್ಯಾಂಕ್ ಅಧಿಕಾರಿಗಳನ್ನು ಭೇಟಿ ಮಾಡಿ ವಿಚಾರಣೆ ನಡೆಸಿದಾಗ, ಇದು ತಾಂತ್ರಿಕ ದೋಷದಿಂದ ಸಂಭವಿಸಿದ ಯಡವಟ್ಟು ಎಂಬುದು ಬೆಳಕಿಗೆ ಬಂದಿದೆ.
ಬ್ಯಾಂಕ್ ಅಧಿಕಾರಿಗಳು ತಕ್ಷಣವೇ ಕಾರ್ಯಪ್ರವೃತ್ತರಾಗಿ ಆ ತಾಂತ್ರಿಕ ದೋಷವನ್ನು ಸರಿಪಡಿಸಿದ್ದು, ಸಮೀರ್ ಖಾನ್ ಅವರ ಖಾತೆಯ ಮೇಲಿದ್ದ ಲಿಯನ್ ತೆರವುಗೊಳಿಸಿದ್ದಾರೆ. ಇದರಿಂದಾಗಿ ಅವರ ಖಾತೆಯಲ್ಲಿದ್ದ ನೈಜ ಉಳಿತಾಯದ 55,000 ರೂ. ಹಣ ಮರಳಿ ಲಭ್ಯವಾಗಿದ್ದು, ವಹಿವಾಟು ನಡೆಸಲು ಅನುಕೂಲವಾಗಿದೆ.
