ಬಹುಪತ್ನಿತ್ವಕ್ಕೆ ಬ್ರೇಕ್​ ಯುಸಿಸಿಯತ್ತ ಹೆಜ್ಜೆ | Polygamy

ಅಸ್ಸಾಂನಲ್ಲಿ ಬಹುಪತ್ನಿತ್ವ ನಿಷೇಧ ಮಸೂದೆ (Assam Prohibition of Polygamy Bill, 2025) ನವೆಂಬರ್​ 27ರಂದು ಅಂಗೀಕಾರಗೊಂಡಿದೆ. ರಾಜ್ಯಪಾಲರ ಅಂಕಿತದ ಬಳಿಕ ಕಾನೂನಾಗಿ ಜಾರಿಯಾಗಲಿದೆ. ಬಹುಪತ್ನಿತ್ವವನ್ನು ಅಪರಾಧ ಎಂದು ಪರಿಗಣಿಸಿ ಗರಿಷ್ಠ 10 ವರ್ಷಗಳ ಜೈಲು ಶಿಕ್ಷೆ ವಿಧಿಸುವ ಅವಕಾಶವನ್ನು ಮಸೂದೆಯಲ್ಲಿ ಕಲ್ಪಿಸಲಾಗಿದೆ. ಪರಿಶಿಷ್ಟ ಪಂಗಡ (ಎಸ್​ಟಿ) ಮತ್ತು ಸಂವಿಧಾನದ ಆರನೆಯ ಪರಿಚ್ಛೇದದಡಿ ಬರುವ ಪ್ರದೇಶಗಳನ್ನು ಈ ಮಸೂದೆಯಿಂದ ಹೊರಗಿಡಲಾಗಿದೆ. "ಈ ಮಸೂದೆಯು ಇಸ್ಲಾಂಗೆ ವಿರುದ್ಧವಾಗಿಲ್ಲ' ಎಂದು ಸ್ಪಷ್ಟಪಡಿಸಿರುವ ಅಸ್ಸಾಂ ಮುಖ್ಯಮಂತ್ರಿ ಹಿಮಂತ ಬಿಸ್ವಾ ಶರ್ಮಾ, "ಹಿಂದೂಗಳು, ಮುಸ್ಲಿಮರು, ಕ್ರೈಸ್ತರು ಮತ್ತು ಇತರ ಸಮುದಾಯದವರು ಈ ಮಸೂದೆಯ ವ್ಯಾಪ್ತಿಗೆ ಬರಲಿದ್ದಾರೆ. ಮುಖ್ಯವಾಗಿ, ಬಹುವಿವಾಹದ ತಡೆಯಿಂದ ಮಹಿಳಾ ಸಬಲೀಕರಣ ಸಾಧ್ಯವಾಗಲಿದೆ, ಅವರ ಹಕ್ಕುಗಳ ರಕ್ಷಣೆ ಆಗಲಿದೆ' ಎಂದಿದ್ದಾರೆ. ಲವ್​ ಜಿಹಾದ್​ನ್ನು ಕೂಡ ರಾಜ್ಯದಲ್ಲಿ ಶ್ರೀಘ್ರವೇ ನಿಷೇಧಿಸಲಿರುವುದಾಗಿ ಹೇಳಿದ್ದಾರೆ.

ಮುಂದಿನ ವರ್ಷ ಯುಸಿಸಿ: ಅಸ್ಸಾಂ ವಿಧಾನಸಭೆಗೆ 2026ರಲ್ಲಿ ಚುನಾವಣೆ ನಡೆಯಲಿದೆ. "ಮುಂದಿನ ವರ್ಷದ ವಿಧಾನಸಭೆ ಚುನಾವಣೆಯಲ್ಲಿ ಗೆದ್ದು, ಮತ್ತೆ ಮುಖ್ಯಮಂತ್ರಿಯಾದರೆ, ಹೊಸ ಸರ್ಕಾರದ ಮೊದಲ ಅಧಿವೇಶನದಲ್ಲೇ ಏಕರೂಪ ನಾಗರಿಕ ಸಂಹಿತೆ ಮಸೂದೆಗೆ ಆಂಗೀಕಾರ ಪಡೆದುಕೊಳ್ಳುವುದಾಗಿ ಸಿಎಂ ಹಿಮಂತ ಹೇಳಿದ್ದಾರೆ.

ಭಾರತದಲ್ಲಿ ಪ್ರಸ್ತಾಪಿಸಲಾಗಿರುವ ಏಕರೂಪ ನಾಗರಿಕ ಸಂಹಿತೆಯು ಧರ್ಮಗಳು, ಪದ್ಧತಿಗಳು ಮತ್ತು ಸಂಪ್ರದಾಯಗಳನ್ನು ಆಧರಿಸಿದ ವೈಯಕ್ತಿಕ ಕಾನೂನುಗಳಿಗೆ ಬದಲಾಗಿ ಧರ್ಮ, ಜಾತಿ, ಪಂಥ ಮತ್ತು ಲಿಂಗವನ್ನು ಪರಿಗಣಿಸದೆಯೇ ಎಲ್ಲರಿಗೂ ಒಂದೇ ರೀತಿಯ ಕಾನೂನು ಜಾರಿಗೊಳಿಸುವ ಗುರಿ ಹೊಂದಿದೆ.

"ಇದೇ ವೇಗ, ಪ್ರಮಾಣದಲ್ಲಿ ಬಾಂಗ್ಲಾದೇಶಿಯರು ಅಸ್ಸಾಂಗೆ ನುಸುಳಿದರೆ 2047ರ ಹೊತ್ತಿಗೆ ಅಸ್ಸಾಂನ ಮೂಲನಿವಾಸಿಗಳೇ ಅಲ್ಪಸಂಖ್ಯಾತರಾಗುತ್ತಾರೆ. ಈಗಾಗಲೇ ನುಸುಳುಕೋರರಿಂದ ಮೂಲನಿವಾಸಿಗಳು ಹಲವು ಸಮಸ್ಯೆಗಳನ್ನು ಎದುರಿಸುತ್ತಿದ್ದಾರೆ. ಬಾಂಗ್ಲಾದೇಶದ ಪಾಸ್​ಪೋರ್ಟ್​ ಹೊಂದಿದವರು ಅಸ್ಸಾಂನಲ್ಲಿ ಚುನಾವಣೆಗೂ ನಿಂತು ಜಯ ಗಳಿಸಿದ್ದಾರೆ. ಈ ಪರಿಸ್ಥಿತಿ ಬದಲಾಗಲು ಕೇಂದ್ರ ಹಾಗೂ ರಾಜ್ಯ ಸರ್ಕಾರ ಕಟ್ಟುನಿಟ್ಟಿನ ಕ್ರಮಕ್ಕೆ ಮುಂದಾಗಬೇಕು'& ಇದು ಅಸ್ಸಾಂನಲ್ಲಿ ಬಾಂಗ್ಲಾದೇಶಿ ನುಸುಳುಕೋರರ ಹಕೀಕತ್​ ಅರಿಯುವ ನಿಟ್ಟಿನಲ್ಲಿ ಸುಪ್ರೀಂ ಕೋರ್ಟ್​ ನೇಮಿಸಿದ್ದ ಏಕಸದಸ್ಯ ಆಯೋಗ 2015ರ ಅಕ್ಟೋಬರ್​ 5ರಂದು (ಒಂದು ದಶಕದ ಹಿಂದೆಯೇ) ನೀಡಿದ ವರದಿಯ ಮುಖ್ಯಾಂಶ! ಸುಪ್ರೀಂಕೋರ್ಟಿನ ಖ್ಯಾತ ನ್ಯಾಯವಾದಿ ಉಪಮನ್ಯು ಹಜಾರಿಕಾ ಅವರ ಏಕಸದಸ್ಯ ಆಯೋಗವು ನುಸುಳುವಿಕೆ ತಡೆಯಲು ಅಗತ್ಯ ಕ್ರಮ ಕೈಗೊಳ್ಳುವಂತೆ ಸೂಚಿಸಿತ್ತು. ಬಾಂಗ್ಲಾ ನುಸುಳುಕೋರರಿಂದ ಸೃಷ್ಟಿಯಾಗಿರುವ ಸಾಮಾಜಿಕ, ಆರ್ಥಿಕ ಸಮಸ್ಯೆಗಳ ಬಗ್ಗೆಯೂ ಹಜಾರಿಕಾ ಅವಲೋಕನ ನಡೆಸಿದ್ದರು. ಬಾಂಗ್ಲಾದೇಶದಿಂದ ನುಸುಳಿ ಬಂದವರು ಸ್ಥಳಿಯ ಯುವತಿಯರನ್ನು ವರಸುತ್ತಾರೆ. ಏನೇನೋ ಸಬೂಬು ನೀಡಿ ಎರಡು&ಮೂರು ಬಾರಿ ವಿವಾಹವಾಗುತ್ತಾರೆ. ಇದರಿಂದ ಸ್ಥಳಿಯ ಸಂಪನ್ಮೂಲವೆಲ್ಲ ನುಸುಳುಕೋರರ ಪಾಲಾಗುತ್ತಿದೆ ಮತ್ತು ಜನಸಂಖ್ಯೆಯ ಭೌಗೋಳಿಕ ಚಿತ್ರಣವೇ ಬದಲಾಗುತ್ತಿದೆ ಎಂಬುದು ಗಂಭಿರ ಸಂಗತಿ.

ಸುಪ್ರೀಂ ಕೋರ್ಟ್​ ವಿವಿಧ ತೀರ್ಪುಗಳಲ್ಲಿ ಏಕರೂಪ ನಾಗರಿಕ ಸಂಹಿತೆ (ಯುಸಿಸಿ) ಅನುಷ್ಠಾನಕ್ಕೆ ಕರೆ ನೀಡಿದೆ. 1985ರಲ್ಲಿ "ಮೊಹಮ್ಮದ್​ ಅಹ್ಮದ್​ ಖಾನ್​ ವಿರುದ್ಧ ಶಾ ಬಾನೋ ಬೇಗಂ' ಪ್ರಕರಣದಲ್ಲಿ ವಿಚ್ಛೇದಿತ ಮುಸ್ಲಿಂ ಮಹಿಳೆ ಮಾಜಿ ಪತಿಯಿಂದ ಜೀವನಾಂಶಕ್ಕೆ ಒತ್ತಾಯಿಸಿದ್ದರು. ಈ ಪ್ರಕರಣದಲ್ಲಿ, ಕ್ರಿಮಿನಲ್​ ಪ್ರೊಸಿಜರ್​ ಕೋಡ್​ಗೆ (ಅಪರಾಧ ದಂಡ ಸಂಹಿತೆ) ಒತ್ತು ನೀಡಬೇಕೋ ಅಥವಾ ಮುಸ್ಲಿಂ ವೈಯಕ್ತಿಕ ಕಾನೂನಿಗೆ ಮಹತ್ವ ನೀಡಬೇಕೋ ಎಂದು ನಿರ್ಧರಿಸುವ ಸಂದರ್ಭದಲ್ಲಿ ಸುಪ್ರೀಂ ಕೋರ್ಟ್​, ಯುಸಿಸಿ ಅನುಷ್ಠಾನದ ಪರ ನಿಂತಿತ್ತು. 1995ರಲ್ಲಿ ಸರಳಾ ಮುದ್ಗಲ್​ ಪ್ರಕರಣದ ತೀರ್ಪಿನಲ್ಲಿ ಮತ್ತು "ಪಾಲೊ ಕೌಟಿನ್ಹೋ ವಿರುದ್ಧ ಮಾರಿಯಾ ಲೂಯಿಜಾ ವ್ಯಾಲೆಂಟಿನಾ ಪೆರೇರಾ' ಪ್ರಕರಣದಲ್ಲಿ (2019) ಕೂಡ ಯುಸಿಸಿಯನ್ನು ಜಾರಿಗೆ ತರಲು ನ್ಯಾಯಾಲಯವು ಹೇಳಿತ್ತು.

ಅಸ್ಸಾಂ ರಾಜ್ಯಾದ್ಯಂತ ಬಾಲ್ಯವಿವಾಹ ಆರೋಪದಲ್ಲಿ 2,500ಕ್ಕೂ ಹೆಚ್ಚು ಪುರುಷರನ್ನು 2024ರಲ್ಲಿ ಬಂಧಿಸಲಾಯಿತು. ಬಂಧಿತರ ವಿರುದ್ಧ ಕಟ್ಟುನಿಟ್ಟಿನ ಪೋಕ್ಸೊ ಕಾಯ್ದೆ ಮತ್ತು ಬಾಲ್ಯ ವಿವಾಹ ನಿಷೇಧ ಕಾಯ್ದೆಯಡಿ ಪ್ರಕರಣ ದಾಖಲಿಸಲಾಗಿದೆ. ಕಳೆದ ಏಳು ವರ್ಷಗಳಲ್ಲಿ ಬಾಲ್ಯವಿವಾಹದಲ್ಲಿ ಭಾಗವಹಿಸಿದವರ ವಿರುದ್ಧ ಪೊಲೀಸರು ಪ್ರಕರಣ ದಾಖಲಿಸಿದ್ದು, ಈ ವಿವಾಹಗಳನ್ನು ನಡೆಸುವ ಮುಲ್ಲಾಗಳು, ಖಾಜಿಗಳು ಮತ್ತು ಪೂಜಾರಿಗಳ ಮೇಲೆ ಗಮನಹರಿಸಲಾಗುವುದು ಎಂದು ಅಸ್ಸಾಂ ಮುಖ್ಯಮಂತ್ರಿ ಹಿಮಂತ ಬಿಸ್ವಾ ಶರ್ಮಾ ಹೇಳಿದ್ದಾರೆ. 14 ರಿಂದ 18 ವರ್ಷದೊಳಗಿನ ಹುಡುಗಿಯರನ್ನು ಮದುವೆಯಾಗುವವರ ವಿರುದ್ಧ ಪೋಕ್ಸೊ (ಲೈಂಗಿಕ ಅಪರಾಧಗಳಿಂದ ಮಕ್ಕಳ ಸಂರಕ್ಷಣೆ) ಕಾಯ್ದೆ ಮತ್ತು ಬಾಲ್ಯ ವಿವಾಹ ನಿಷೇಧ ಕಾಯ್ದೆಯಡಿ ಪ್ರಕರಣ ದಾಖಲಿಸಲಾಗಿದೆ. ಆದರೆ, ಮುಸ್ಲಿಂ ವೈಯಕ್ತಿಕ ಕಾನೂನಿನ ಪ್ರಕಾರ, ಪ್ರೌಢಾವಸ್ಥೆಯನ್ನು (ಋತುಮತಿಯಾದ) ತಲುಪಿದ ಹುಡುಗಿಯ ವಿವಾಹ ಮಾಡಲು ಅವಕಾಶವಿದೆ. ಪುರಾವೆಗಳ ಅನುಪಸ್ಥಿತಿಯಲ್ಲಿ, 15 ವರ್ಷಗಳು ಪೂರ್ಣಗೊಂಡ ನಂತರ ಹೆಣ್ಣುಮಕ್ಕಳು ಪ್ರೌಢಾವಸ್ಥೆ ಹೊಂದಿದ್ದಾರೆ ಎಂದು ಪರಿಗಣಿಸಬಹುದಾಗಿದೆ. ಮುಸ್ಲಿಂ ವೈಯಕ್ತಿಕ ಕಾನೂನು ಹಾಗೂ ಬಾಲ್ಯವಿವಾಹ ಅಥವಾ ಅಪ್ರಾಪ್ತ ವಯಸ್ಕರ ಲೈಂಗಿಕ ಚಟುವಟಿಕೆಯನ್ನು ನಿಷೇಧಿಸುವ ವಿಶೇಷ ಕಾನೂನುಗಳ ನಡುವಿನ ಈ ಅಂತರದ ಕಾರಣದಿಂದಾಗಿ ಗೊಂದಲ ಏರ್ಪಟ್ಟಿದೆ.

ದೇಶಾದ್ಯಂತ ಯುಸಿಸಿ ಜಾರಿ ಇನ್ನೂ ಸವಾಲಾಗಿ ಉಳಿದಿದ್ದರೂ, ಉತ್ತರಾಖಂಡ ಏಕರೂಪ ನಾಗರಿಕ ಸಂಹಿತೆ ಜಾರಿಗೊಳಿಸಿದ ಮೊದಲ ರಾಜ್ಯ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ. 2024ರ ಫೆಬ್ರವರಿಯಲ್ಲಿ ಯುಸಿಸಿ ಜಾರಿಯಾಗಿದೆ. ಮುಖ್ಯಮಂತ್ರಿ ಪುಷ್ಕರ್​ ಸಿಂಗ್​ ಧಾಮಿ ಯುಸಿಸಿ ಜಾರಿಯ ಬಗ್ಗೆ ಕೆಲ ವರ್ಷಗಳಿಂದ ಹೇಳುತ್ತಲೇ ಇದ್ದರು, ಆ ಭರವಸೆಯನ್ನು ಅವರು ಈಡೇರಿಸಿದ್ದಾರೆ. ವಿವಿಧ ಧರ್ಮಗಳ ವೈಯಕ್ತಿಕ ಕಾನೂನುಗಳಿಗೆ ತಿಲಾಂಜಲಿ ನೀಡಿದ್ದು, ಮದುವೆ, ವಿಚ್ಛೇದನ, ಉತ್ತರಾಧಿಕಾರ, ಲಿವ್​ ಇನ್​ ರಿಲೇಶನ್​ಶಿಪ್​ ಮುಂತಾದ ವಿಷಯಗಳಿಗೆ ಸಂಬಂಧಿಸಿ ಸಮಾನ ಕಾನೂನು ಇದಾಗಿದೆ. 2024ರ ಫೆಬ್ರವರಿ 2ರಂದು ಸುಪ್ರೀಂ ಕೋರ್ಟ್​ನ ನಿವೃತ್ತ ನ್ಯಾಯಮೂರ್ತಿ ರಂಜನಾ ಪ್ರಕಾಶ್​ ದೇಸಾಯಿ ನೇತೃತ್ವದ ಐವರು ಸದಸ್ಯರ ಸಮಿತಿಯು ಮುಖ್ಯಮಂತ್ರಿ ಪುಷ್ಕರ್​ ಸಿಂಗ್​ ಧಾಮಿ ಅವರಿಗೆ ನಾಲ್ಕು ಸಂಪುಟಗಳಲ್ಲಿ 740 ಪುಟಗಳನ್ನು ಒಳಗೊಂಡ ವರದಿ ಸಲ್ಲಿಸಿತ್ತು.

ಭಾರತದ ಪೂರ್ವ ಭಾಗದಲ್ಲಿರುವ ಅಸ್ಸಾಂ ಪ್ರಾಕೃತಿಕ ಸೌಂದರ್ಯದಿಂದ ಕಂಗೊಳಿಸುವ ರಮಣೀಯ ರಾಜ್ಯ. ಇಲ್ಲಿನ ಚಹಾ ತೋಟಗಳು, ಖಡ್ಗಾಮೃಗ, ಅಪೂರ್ವ ವನ್ಯಮೃಗಗಳು, ದಟ್ಟ ಕಾಡುಗಳು ಮತ್ತು ಶಕ್ತಿ ಆರಾಧಕರ ಕಾಮಾಕ್ಯ ಪೀಠದಿಂದಾಗಿ ಪರಿಚಿತ. ಈಶಾನ್ಯ ರಾಜ್ಯಗಳಿಗೆ ಮುಕುಟ ಇದ್ದಂತೆ. ಭಾರತದ ಮೂಲೆ ಮೂಲೆಯ ಜನ ಇಲ್ಲಿನ ಚಹಾವನ್ನು ಆಸ್ವಾದಿಸುತ್ತ ಮೈಮರೆಯುತ್ತಾರೆ.

"ಕುಟುಂಬದ ಒಬ್ಬ ಸದಸ್ಯನಿಗೆ ಒಂದು ನಿಯಮ, ಇನ್ನೊಬ್ಬ ಸದಸ್ಯನಿಗೆ ಮತ್ತೊಂದು ನಿಯಮ ಇರುವ ಪದ್ಧತಿ ಜಾರಿಯಲ್ಲಿದ್ದರೆ ಅಂಥ ಕುಟುಂಬವು ನೆಮ್ಮದಿ, ಶಾಂತಿಯಿಂದ ಬದುಕಲು ಸಾಧ್ಯವೇ? ಹಾಗಾಗಿಯೇ ಭಾರತದಂಥ ರಾಷ್ಟ್ರದಲ್ಲಿ ಎಲ್ಲರಿಗೂ ಸಮಾನ ಕಾನೂನು, ನಾಗರಿಕ ಸಂಹಿತೆ ಜಾರಿಯಾಗಬೇಕಿರುವುದು ಸಂವಿಧಾನದಲ್ಲಿಯೇ ಸೂಚಿತಗೊಂಡಿದೆ' ಎಂದು ಪ್ರಧಾನಿ ನರೇಂದ್ರ ಮೋದಿ ಯುಸಿಸಿ ಅಗತ್ಯದ ಬಗ್ಗೆ ಹಲವು ಬಾರಿ ಪ್ರಸ್ತಾಪಿಸಿದ್ದಾರೆ.