ಸೈಬೀರಿಯಾದಲ್ಲಿ ಪವಾಡ! 24,000 ವರ್ಷಗಳ ನಂತರ ಬದುಕಿ ಬಂದ ನಿಗೂಢ ಜೀವಿ? | Permafrost

ರಷ್ಯಾದ ಸೈಬೀರಿಯಾ ಪ್ರಾಂತ್ಯದಲ್ಲಿ ನಡೆದ ಈ ಸಂಶೋಧನೆಯು ಭವಿಷ್ಯದಲ್ಲಿ ಮಾನವ ಕುಲದ ಅರಿವನ್ನೇ ಬದಲಿಸುವ ಶಕ್ತಿ ಹೊಂದಿದೆ ಎನ್ನಲಾಗುತ್ತಿದೆ.

ವಿಜ್ಞಾನಿಗಳು ಸೈಬೀರಿಯಾದ ಅಲಾಜೆಯಾ ನದಿಯ ದಡದಲ್ಲಿ ಮಂಜುಗಡ್ಡೆಯ ಆಳವಾದ ಪದರಗಳನ್ನು ಕೊರೆದು ಸಂಶೋಧನೆ ನಡೆಸುವಾಗ ಈ ಪುಟ್ಟ ಜೀವಿ ಪತ್ತೆಯಾಗಿದೆ. ಇದನ್ನು 'ಬಿಡೆಲ್ಲಾಯ್ಡ್ ರೊಟಿಫರ್' ಎಂದು ಕರೆಯಲಾಗುತ್ತದೆ. ಇವು ಕಣ್ಣಿಗೆ ಕಾಣದಷ್ಟು ಚಿಕ್ಕದಾಗಿದ್ದು, ಕೇವಲ ಸೂಕ್ಷ್ಮದರ್ಶಕದ (Microscope) ಮೂಲಕ ಮಾತ್ರ ನೋಡಲು ಸಾಧ್ಯ. ಇವು ಸಾಮಾನ್ಯವಾಗಿ ಸಿಹಿನೀರಿನ ಪರಿಸರದಲ್ಲಿ ಕಂಡುಬರುತ್ತವೆ ಮತ್ತು ಅತ್ಯಂತ ಕಠಿಣ ಪರಿಸ್ಥಿತಿಯಲ್ಲೂ ಬದುಕುವ ಸಾಮರ್ಥ್ಯ ಹೊಂದಿವೆ.

ಈ ಜೀವಿಗಳು 'ಕ್ರಿಪ್ಟೋಬಯೋಸಿಸ್' (Cryptobiosis) ಎಂಬ ಪ್ರಕ್ರಿಯೆಯ ಮೂಲಕ ತಮ್ಮ ಚಯಾಪಚಯ ಕ್ರಿಯೆಯನ್ನು (Metabolism) ಸಂಪೂರ್ಣವಾಗಿ ನಿಲ್ಲಿಸಿಬಿಡುತ್ತವೆ. ಅಂದರೆ, ಇವು ಸತ್ತಂತೆ ಕಂಡುಬಂದರೂ ಅವುಗಳ ಒಳಗಿನ ಜೀವಕೋಶಗಳು ಜೀವಂತವಾಗಿರುತ್ತವೆ. ಸೈಬೀರಿಯಾದ ಕೊರೆಯುವ ಚಳಿಯಲ್ಲಿ ಈ ಜೀವಿ 24 ಸಾವಿರ ವರ್ಷಗಳ ಕಾಲ ಹೀಗೆಯೇ 'ಕೋಮಾ' ಸ್ಥಿತಿಯಲ್ಲಿದ್ದವು. ವಿಜ್ಞಾನಿಗಳು ಮಂಜುಗಡ್ಡೆಯನ್ನು ಕರಗಿಸಿ, ಸ್ವಲ್ಪ ಬೆಚ್ಚಗಿನ ವಾತಾವರಣ ನೀಡಿದ ತಕ್ಷಣ ಈ ಜೀವಿಗಳು ಎಚ್ಚರಗೊಂಡು ಚಟುವಟಿಕೆ ಆರಂಭಿಸಿವೆ!

ಕೇವಲ ಮರುಜೀವ ಪಡೆದಿದ್ದರೆ ವಿಜ್ಞಾನಿಗಳು ಅಷ್ಟೊಂದು ಆಶ್ಚರ್ಯಪಡುತ್ತಿರಲಿಲ್ಲವೇನೋ. ಆದರೆ, ಈ ಜೀವಿ ಮಂಜಿನಿಂದ ಹೊರಬಂದ ತಕ್ಷಣವೇ ತನ್ನ ಸಂತಾನೋತ್ಪತ್ತಿ ಪ್ರಕ್ರಿಯೆಯನ್ನು ಆರಂಭಿಸಿದೆ! ಯಾವುದೇ ಸಂಗಾತಿಯ ಸಹಾಯವಿಲ್ಲದೆ (Asexual reproduction) ಈ ಜೀವಿ ತನ್ನದೇ ಪ್ರತಿರೂಪಗಳನ್ನು ಸೃಷ್ಟಿಸಲು ಶುರುಮಾಡಿದೆ. ಸಾವಿರಾರು ವರ್ಷಗಳ ಕಾಲ ಘನೀಕೃತ ಸ್ಥಿತಿಯಲ್ಲಿದ್ದರೂ ಅವುಗಳ ಡಿಎನ್ಎ (DNA) ಮತ್ತು ಜೀವಕೋಶಗಳಿಗೆ ಯಾವುದೇ ಹಾನಿಯಾಗಿಲ್ಲ ಎಂಬುದು ವಿಶೇಷ.

ಈ ಸಂಶೋಧನೆಯು ಕೇವಲ ಒಂದು ಜೀವಿಯ ಬಗ್ಗೆ ಮಾತ್ರವಲ್ಲ. "ಒಂದು ಜೀವಿ ಸಾವಿರಾರು ವರ್ಷಗಳ ಕಾಲ ಮಂಜಿನಲ್ಲಿ ಜೀವಂತವಾಗಿರಲು ಹೇಗೆ ಸಾಧ್ಯ?" ಎಂಬ ಪ್ರಶ್ನೆಗೆ ಉತ್ತರ ಸಿಕ್ಕರೆ, ಭವಿಷ್ಯದಲ್ಲಿ ಮಾನವ ಅಂಗಾಂಗಗಳನ್ನು (Organs) ದೀರ್ಘಕಾಲದವರೆಗೆ ಕೆಡದಂತೆ ಕಾಪಾಡಲು ಮತ್ತು ದೂರದ ಗ್ರಹಗಳಿಗೆ ಪ್ರಯಾಣಿಸುವಾಗ ಮಾನವರನ್ನು 'ಸಸ್ಪೆಂಡೆಡ್ ಅನಿಮೇಷನ್' ಸ್ಥಿತಿಯಲ್ಲಿ ಇಡಲು ಈ ತಂತ್ರಜ್ಞಾನ ಬಳಕೆಯಾಗಬಹುದು,(ಏಜೆನ್ಸೀಸ್).