ಭಾರತದ ಭದ್ರತೆಗೆ ಭಾರೀ ಕುತ್ತು? ಅಮೆರಿಕದ 'ಮರ್ಸಿನರಿ' ಮ್ಯಾಥ್ಯೂ ವ್ಯಾನ್‌ಡೈಕ್ ಬಂಧನ; ಬಯಲಾಯ್ತು ಸ್ಫೋಟಕ ಸತ್ಯಗಳು! | Matthew Van Dyke

ಮೇಲ್ನೋಟಕ್ಕೆ ಅನಿಮೇಷನ್ ಫಿಲ್ಮ್ ಮೇಕರ್, ಭದ್ರತಾ ವಿಶ್ಲೇಷಕ ಮತ್ತು ಯುದ್ಧ ವರದಿಗಾರ ಎಂದು ಗುರುತಿಸಿಕೊಂಡಿದ್ದ ವ್ಯಾನ್‌ಡೈಕ್, ವಾಸ್ತವದಲ್ಲಿ ಒಬ್ಬ 'ಶ್ಯಾಡೋ ಆಪರೇಟಿವ್' (ನೆರಳಿನಂತೆ ಕೆಲಸ ಮಾಡುವ ಗುಪ್ತಚರ). ಅಮೆರಿಕದ ಸೇನೆಯೊಂದಿಗೆ ನಿಕಟ ಸಂಪರ್ಕ ಹೊಂದಿರುವ ಈತ, ಇರಾಕ್ ಮತ್ತು ಲಿಬಿಯಾ ಯುದ್ಧಗಳಲ್ಲಿ ಸಕ್ರಿಯವಾಗಿ ಭಾಗವಹಿಸಿದ್ದ ಹಳೆಯ ಇತಿಹಾಸ ಹೊಂದಿದ್ದಾನೆ. ಈತ 'ಸನ್ಸ್ ಆಫ್ ಲಿಬರ್ಟಿ ಇಂಟರ್ನ್ಯಾಷನಲ್' (SOLI) ಎಂಬ ಖಾಸಗಿ ಮಿಲಿಟರಿ ತರಬೇತಿ ಸಂಸ್ಥೆಯನ್ನು ಸ್ಥಾಪಿಸಿ, ಜಗತ್ತಿನಾದ್ಯಂತ ಬಂಡುಕೋರರಿಗೆ 'ಸ್ಪೆಷಲ್ ಫೋರ್ಸ್' ಮಾದರಿಯ ತರಬೇತಿ ನೀಡುತ್ತಿದ್ದನು.

ತನಿಖಾ ಮೂಲಗಳ ಪ್ರಕಾರ, ವ್ಯಾನ್‌ಡೈಕ್ ಈಶಾನ್ಯ ಭಾರತದ ಗಡಿಗಳನ್ನು ಬಳಸಿ ಮ್ಯಾನ್ಮಾರ್‌ಗೆ ನುಸುಳುತ್ತಿದ್ದನು. ಅಲ್ಲಿನ ಜನಾಂಗೀಯ ಸಶಸ್ತ್ರ ಗುಂಪುಗಳಿಗೆ (Ethnic Armed Groups) ಮಾತ್ರವಲ್ಲದೆ, ಭಾರತದಲ್ಲಿ ನಿಷೇಧಕ್ಕೊಳಗಾದ ಕೆಲವು ಉಗ್ರಗಾಮಿ ಸಂಘಟನೆಗಳಿಗೂ ಈತ ಆಧುನಿಕ ಯುದ್ಧತಂತ್ರಗಳ ತರಬೇತಿ ನೀಡುತ್ತಿದ್ದ ಎನ್ನಲಾಗಿದೆ.

ಡ್ರೋನ್ ವಾರ್‌ಫೇರ್: ಆಧುನಿಕ ಡ್ರೋನ್‌ಗಳನ್ನು ಬಳಸಿ ದಾಳಿ ನಡೆಸುವುದು ಹೇಗೆ?

ಗೆರಿಲ್ಲಾ ಯುದ್ಧತಂತ್ರ: ಗುಪ್ತವಾಗಿ ಸಂಘಟಿತರಾಗಿ ದಾಳಿ ಮಾಡುವುದು.

ಟ್ಯಾಕ್ಟಿಕಲ್ ಆಪರೇಷನ್: ಅತ್ಯಾಧುನಿಕ ಶಸ್ತ್ರಾಸ್ತ್ರಗಳ ಬಳಕೆ ಮತ್ತು ಸಂವಹನ ತಂತ್ರಗಳು.

ವ್ಯಾನ್‌ಡೈಕ್ ಬಂಧನ ಕೇವಲ ಒಬ್ಬ ವ್ಯಕ್ತಿಯ ಬಂಧನವಲ್ಲ, ಇದರ ಹಿಂದೆ ದೊಡ್ಡ ಅಂತರಾಷ್ಟ್ರೀಯ ಜಾಲವಿರುವ ಸಂಶಯವನ್ನು ಎನ್‌ಐಎ ವ್ಯಕ್ತಪಡಿಸಿದೆ.

ಭಾರತವನ್ನು ಅಸ್ಥಿರಗೊಳಿಸುವ ಸಂಚು: ಅಮೆರಿಕದ ಗುಪ್ತಚರ ಸಂಸ್ಥೆ CIA ವಿಶ್ವದಾದ್ಯಂತ ನಡೆಸುವ 'ಕೋವರ್ಟ್ ಆಪರೇಷನ್'ಗಳ ಭಾಗವಾಗಿ ಭಾರತದ ಆಂತರಿಕ ಭದ್ರತೆಯನ್ನು ಕೆಡಿಸಲು ಈ ಪ್ರಯತ್ನ ನಡೆದಿದೆಯೇ ಎಂಬ ಬಗ್ಗೆ ತನಿಖೆ ನಡೆಯುತ್ತಿದೆ.

ಉಕ್ರೇನ್ ಲಿಂಕ್: ಉಕ್ರೇನ್ ಅಧ್ಯಕ್ಷ ಝೆಲೆನ್ಸ್ಕಿ ಅವರು ವಿದೇಶಗಳಲ್ಲಿ ವಿಶೇಷ ಕಾರ್ಯಾಚರಣೆಗಳ ಅಗತ್ಯವಿದೆ ಎಂದು ಹೇಳಿದ ಬೆನ್ನಲ್ಲೇ, ಉಕ್ರೇನ್ ಬೆಂಬಲಿತ ಜಾಲವೊಂದು ಈಶಾನ್ಯ ಭಾರತದಲ್ಲಿ ಸಕ್ರಿಯವಾಗಿದೆಯೇ ಎಂಬ ಸಂಶಯ ಮೂಡಿದೆ. ಈಗಾಗಲೇ ಸುಡಾನ್ ಮತ್ತು ಸಿರಿಯಾದಲ್ಲಿ ಇಂತಹ ಕಾರ್ಯಾಚರಣೆಗಳು ಕಂಡುಬಂದಿವೆ.

ರಷ್ಯಾ-ಭಾರತ ಸಂಬಂಧಕ್ಕೆ ಹೊಡೆತ: ಭಾರತವು ರಷ್ಯಾದಿಂದ ತೈಲವನ್ನು ಖರೀದಿಸುತ್ತಿರುವುದು ಮತ್ತು ರಷ್ಯಾದೊಂದಿಗೆ ಗಟ್ಟಿಯಾದ ಬಾಂಧವ್ಯ ಹೊಂದಿರುವುದಕ್ಕೆ ಪ್ರತಿಯಾಗಿ, ಪಾಶ್ಚಿಮಾತ್ಯ ಶಕ್ತಿಗಳು ಭಾರತದ ಗಡಿಭಾಗಗಳಲ್ಲಿ ಅಶಾಂತಿ ಸೃಷ್ಟಿಸಲು ಇಂತಹ 'ಬಾಡಿಗೆ ಸೈನಿಕ'ರನ್ನು ಬಳಸಿಕೊಳ್ಳುತ್ತಿರಬಹುದು ಎಂದು ತಜ್ಞರು ವಿಶ್ಲೇಷಿಸಿದ್ದಾರೆ.

ವ್ಯಾನ್‌ಡೈಕ್‌ನ ಮೊಬೈಲ್ ಫೋನ್ ಮತ್ತು ಸಾಮಾಜಿಕ ಜಾಲತಾಣಗಳ ಪರಿಶೀಲನೆಯಲ್ಲಿ ಆತ ವಿಶ್ವದಾದ್ಯಂತ ಇರುವ ಮರ್ಸಿನರಿಗಳಿಗೆ (ಬಾಡಿಗೆ ಸೈನಿಕರಿಗೆ) ಕರೆ ನೀಡಿದ್ದ ವಿಡಿಯೋಗಳು ಲಭ್ಯವಾಗಿವೆ. ವೆನೆಜುವೆಲಾ, ಮ್ಯಾನ್ಮಾರ್ ಮತ್ತು ಇರಾನ್‌ನಂತಹ ದೇಶಗಳಲ್ಲಿ ಬಂಡಾಯವೇಳಲು ಈತ ಪ್ರಚೋದಿಸುತ್ತಿದ್ದ ಎನ್ನಲಾಗಿದೆ. ಭಾರತದ ಭೂಪ್ರದೇಶವನ್ನು ತನ್ನ ಈ ಅಪಾಯಕಾರಿ ಕಾರ್ಯಾಚರಣೆಗಳಿಗೆ ಟ್ರಾನ್ಸಿಟ್ ಕಾರಿಡಾರ್ ಆಗಿ ಬಳಸಿಕೊಳ್ಳುತ್ತಿದ್ದುದು ಈಗ ದೃಢಪಟ್ಟಿದೆ.

ಈ ಕುರಿತು ಪ್ರತಿಕ್ರಿಯಿಸಿರುವ ಅಮೆರಿಕ ರಾಯಭಾರ ಕಚೇರಿಯು, "ನಮಗೆ ಈ ಪರಿಸ್ಥಿತಿಯ ಅರಿವಿದೆ" ಎಂದು ಹೇಳಿದೆಯಾದರೂ ಹೆಚ್ಚಿನ ಮಾಹಿತಿ ನೀಡಲು ನಿರಾಕರಿಸಿದೆ. ದೇಶದ ಭದ್ರತೆಯ ವಿಷಯದಲ್ಲಿ ಯಾವುದೇ ರಾಜಿ ಮಾಡಿಕೊಳ್ಳದ ಭಾರತೀಯ ತನಿಖಾ ಸಂಸ್ಥೆಗಳು, ಈತನಿಗೆ ಭಾರತದಲ್ಲಿ ಆಶ್ರಯ ನೀಡಿದವರು ಯಾರು ಮತ್ತು ಈತನ 'ಮಿಷನ್' ಹಿಂದಿರುವ ಅಸಲಿ ಮಾಸ್ಟರ್‌ಮೈಂಡ್ ಯಾರು ಎಂಬುದನ್ನು ಪತ್ತೆಹಚ್ಚಲು ಈಗ ಜಾಲ ಬೀಸಿವೆ,(ಏಜೆನ್ಸೀಸ್​).