ಚಂದದ ಕೂದಲಿಗಿಂತ ಚಂದದ ಮನಸ್ಸೇ ಮುಖ್ಯ: ಹಸೆಮಣೆಯಲ್ಲಿ ಮಿಂಚಿದ 'ಬೋಲ್ಡ್' ಸುಂದರಿ!

ಅಮೆರಿಕಾದಲ್ಲಿ ವಾಸಿಸುವ ಭಾರತೀಯ ಮೂಲದ ಕಂಟೆಂಟ್‌ ಕ್ರಿಯೇಟರ್‌ ನೀಹಾರ್‌ ಸಚದೇವಾ ಅವರ ಮದುವೆಯ ವಿಡಿಯೋ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್‌ ಆಗಿದೆ. 

ಅಲೋಪೇಷಿಯಾ (ಕೂದಲು ಉದುರುವ ಆಟೋಇಮ್ಯೂನ್‌ ರೋಗ)ದಿಂದ ಬಳಲುತ್ತಿರುವ ನೀಹಾರ್‌, ತಮ್ಮ ಮದುವೆಯ ದಿನದಂದು ವಿಗ್‌ (ನಕಲಿ ಕೂದಲು) ತೊಡದೆ, ಬೋಳು ತಲೆಯೊಂದಿಗೆ ವರನತ್ತ ನಡೆದುಕೊಂಡು ಬಂದಿದ್ದಾರೆ. ಈ ನಿರ್ಧಾರವು ಆತ್ಮವಿಶ್ವಾಸದ ಸಂದೇಶವನ್ನು ನೀಡಿದೆ.

ನೀಹಾರ್‌ ಅವರು ಚಿಕ್ಕ ವಯಸ್ಸಿನಿಂದಲೇ ಅಲೋಪೇಷಿಯಾದಿಂದ ಬಳಲುತ್ತಿದ್ದು, ಹಲವು ವರ್ಷಗಳ ಕಾಲ ವಿಗ್‌ ಧರಿಸುತ್ತಿದ್ದರು. ಸಮಾಜದ ಒತ್ತಡದಿಂದಾಗಿ ತಮ್ಮ ಸ್ಥಿತಿಯನ್ನು ಮುಚ್ಚಿಹಾಕುತ್ತಿದ್ದರು. ಆದರೆ, ಮದುವೆಯ ದಿನದಂದು ಅವರು ಈ ಒತ್ತಡವನ್ನು ದಾಟಿ, ತಮ್ಮ ನಿಜವಾದ ರೂಪದಲ್ಲಿ ಕಾಣಿಸಿಕೊಳ್ಳುವ ನಿರ್ಧಾರ ಮಾಡಿದರು. "ವಿಗ್‌ ಧರಿಸಿ ಮದುವೆಯ ಫೋಟೋಗಳನ್ನು ನೋಡಿ, ನಾನು ಬೇರೊಬ್ಬಳಂತೆ ಕಾಣಿಸಿಕೊಳ್ಳಬೇಕಿರಲಿಲ್ಲ. ನನ್ನ ನಿಜವಾದ ದಿನವನ್ನು ನೆನಪಿಸಿಕೊಳ್ಳಬೇಕು" ಎಂದು ಅವರು ಹೇಳಿದ್ದಾರೆ.

ಅರುಣ್‌ ವಿ ಗಣಪತಿ ಅವರೊಂದಿಗೆ ನೀಹಾರ್‌ ಮದುವೆಯಾದರು. ಕೆಂಪು ಬಣ್ಣದ ಭಾರೀ ಕೆಲಸದ ಲೆಹಂಗಾ, ಭಾರೀ ಒಡವೆಗಳು ಮತ್ತು ಮಾಂಗ್‌ ಟೀಕಾ ಧರಿಸಿ, ಬೋಳು ತಲೆಯನ್ನು ಹೆಮ್ಮೆಯಿಂದ ಪ್ರದರ್ಶಿಸಿದರು. ವಿಡಿಯೋದಲ್ಲಿ ಅವರು ಕೆಂಪು ದುಪಟ್ಟದಡಿ ನಡೆದುಕೊಂಡು ಬಂದು, ನಂತರ ಅದನ್ನು ತೆಗೆದು ತಮ್ಮ ನಿಜ ರೂಪ ತೋರಿಸುವ ದೃಶ್ಯ ಭಾವುಕವಾಗಿದೆ. ವರ ಅವರನ್ನು ಪ್ರೀತಿಯ ಕಣ್ಣುಗಳಿಂದ ನೋಡುತ್ತಾ ಸ್ವಾಗತಿಸಿದ್ದಾರೆ.

ಈ ವಿಡಿಯೋ ಮತ್ತು ಫೋಟೋಗಳು ಇಂಸ್ಟಾಗ್ರಾಮ್‌ ಮತ್ತು ಇತರ ಜಾಲತಾಣಗಳಲ್ಲಿ ಲಕ್ಷಾಂತರ ವೀಕ್ಷಣೆಗಳನ್ನು ಪಡೆದು ವೈರಲ್‌ ಆಗಿವೆ. ನೆಟ್ಟಿಗರು "ಬೋಲ್ಡ್‌ ಅಂಡ್‌ ಬ್ಯೂಟಿಫುಲ್‌", "ನಿಜವಾದ ಸೌಂದರ್ಯ ಆತ್ಮವಿಶ್ವಾಸದಲ್ಲಿ" ಎಂದು ಪ್ರಶಂಸಿಸಿದ್ದಾರೆ. ಅಲೋಪೇಷಿಯಾದಿಂದ ಬಳಲುವ ಇತರ ಮಹಿಳೆಯರು ತಮ್ಮ ಅನುಭವಗಳನ್ನು ಹಂಚಿಕೊಂಡು, ನೀಹಾರ್‌ ಅವರನ್ನು ಸ್ಫೂರ್ತಿಯೆಂದು ಕರೆದಿದ್ದಾರೆ.

ಭಾರತೀಯ ಸಂಸ್ಕೃತಿಯಲ್ಲಿ ಕೂದಲು ಸೌಂದರ್ಯದ ಪ್ರಮುಖ ಭಾಗವೆಂದು ಪರಿಗಣಿಸಲಾಗುತ್ತದೆ. ಆದರೆ ನೀಹಾರ್‌ ಅವರ ನಿರ್ಧಾರವು ಈ ಮಾನದಂಡಗಳನ್ನು ಮೀರಿ, ಸ್ವೀಕೃತಿಯ ಮಹತ್ವವನ್ನು ಒತ್ತಿಹೇಳಿದೆ. ಅವರ ಕಥೆ ಜಾಗತಿಕವಾಗಿ ಸ್ಫೂರ್ತಿ ನೀಡುತ್ತಿದ್ದು, ಸೌಂದರ್ಯ ಎಂದರೆ ಬಾಹ್ಯವಲ್ಲ, ಆಂತರಿಕ ಆತ್ಮವಿಶ್ವಾಸ ಎಂಬುದನ್ನು ಮತ್ತೊಮ್ಮೆ ಸಾಬೀತುಪಡಿಸಿದೆ,(ಏಜೆನ್ಸೀಸ್​).