ಲಕ್ಷ ರೂ. ಸಂಬಳದ ಕಾರ್ಪೊರೇಟ್ ಉದ್ಯೋಗ ಬಿಟ್ಟು ತವರಿಗೆ ಬಂದು ತಿಂಗಳಿಗೆ 4 ಲಕ್ಷ ಗಳಿಸುತ್ತಿರುವ ಯುವಕ! Corporate Job

Corporate Job : ಕೈತುಂಬ ಸಂಬಳ ಬಂದರೆ ಜೀವನ ಆರಾಮದಾಯಕವಾಗಿರುತ್ತದೆ ಅನ್ನೋ ಕಾರಣಕ್ಕೆ ಅನೇಕ ಜನರು ಕಾರ್ಪೊರೇಟ್ ಉದ್ಯೋಗಗಳನ್ನು ಮೊದಲು ಆಯ್ಕೆ ಮಾಡುತ್ತಾರೆ. ಏಕೆಂದರೆ, ಈ ಕೆಲಸದಲ್ಲಿ ಲಕ್ಷಾಂತರ ರೂಪಾಯಿ ಸಂಬಳ ದೊರೆಯುತ್ತದೆ. ಆದರೆ, 27 ವರ್ಷದ ಯುವಕನೊಬ್ಬ ತನ್ನ ಕಾರ್ಪೊರೇಟ್ ಉದ್ಯೋಗವನ್ನು ತೊರೆದಂತಹ ಕತೆ ಸಾಮಾಜಿಕ ಜಾಲತಾಣದಲ್ಲಿ ಪ್ರಸ್ತುತ ಸಖತ್​ ವೈರಲ್​ ಆಗುತ್ತಿದೆ.

ಸುಮಾರು ಏಳು ವರ್ಷಗಳ ಕಾಲ ಕಾರ್ಪೊರೇಟ್ ಉದ್ಯೋಗದಲ್ಲಿ ಕೆಲಸ ಮಾಡಿದ ಬಳಿಕ, ಆ ಕೆಲಸವನ್ನು ಬಿಟ್ಟು ತಮ್ಮ ತವರು ರಾಜಸ್ಥಾನದ ಉದಯಪುರಕ್ಕೆ ಯುವಕ ಮರಳಿದನು. ಆನಂತರ, ತಮ್ಮ ತವರಿನಲ್ಲೇ ಹೋಂಸ್ಟೇ ಒಂದನ್ನು ಪ್ರಾರಂಭ ಮಾಡಿದರು. ಲಕ್ಷಾಂತರ ರೂ. ಸಂಬಳದ ಉದ್ಯೋಗವನ್ನು ಬಿಟ್ಟು ತನ್ನದೇಯಾದ ಹೋಂಸ್ಟೇ ಆರಂಭಿಸಿದ ಅನುಭವದ ಬಗ್ಗೆ ಸ್ವತಃ ಆ ಯುವಕನೇ ಅನುಭವ ಹಂಚಿಕೊಂಡಿದ್ದಾರೆ.

ಮೊದಲು, ನಾನು ನನ್ನ ಕಾರ್ಪೊರೇಟ್ ಕೆಲಸವನ್ನು ಬಿಟ್ಟು ನನ್ನ ಹಳ್ಳಿಗೆ ಹೋಗಿ ಹೋಂಸ್ಟೇ ಪ್ರಾರಂಭಿಸಿದೆ. ಮೊದಲಿಗೆ ಅದು ತುಂಬಾ ಕಷ್ಟಕರವಾಗಿತ್ತು. ನನಗೆ ಉತ್ತಮ ಆದಾಯ ಸಿಗಲಿಲ್ಲ. ನಂತರ ನಾನು ವ್ಯವಹಾರದ ಬಗ್ಗೆ ಇನ್ನಷ್ಟು ಹೆಚ್ಚು ತಿಳಿದುಕೊಂಡೆ. ಇಂದು ನಾನು ಹೆಚ್ಚಿನ ಪ್ರವಾಸಿ ನಗರಗಳಲ್ಲಿ ಹೋಂಸ್ಟೇಗಳನ್ನು ನಡೆಸುತ್ತಿದ್ದೇನೆ. ಸರಾಸರಿ, ತಿಂಗಳಿಗೆ ಸುಮಾರು 1 ಲಕ್ಷ ರೂ. ಗಳಿಸುತ್ತೇನೆ. ಕೆಲವೊಮ್ಮೆ, ಇದು 40,000 ರಿಂದ 50,000 ರೂ.ಗಳಿಗೆ ಇಳಿಯಬಹುದು. ಆದರೆ ಪ್ರವಾಸಿ ದಿನಗಳಲ್ಲಿ, ಇದು 3 ರಿಂದ 4 ಲಕ್ಷ ರೂ.ಗಳಿಗೆ ಏರಬಹುದು ಎಂದು ಯುವಕ ರೆಡಿಟ್​ ಪೋಸ್ಟ್​ನಲ್ಲಿ ಹೇಳಿದ್ದಾನೆ

ನಾನು ಒಂದೇ ಕೋಣೆಯಲ್ಲಿ ಈ ಉದ್ಯಮವನ್ನು ಪ್ರಾರಂಭಿಸಿದೆ. ಆರಂಭಿಕ ವೆಚ್ಚ ಸುಮಾರು 2 ರಿಂದ 4 ಲಕ್ಷ ರೂ.ಗಳಷ್ಟಿತ್ತು. ಈಗ, ಯಾವುದೇ ಹೆಚ್ಚುವರಿ ವೆಚ್ಚಗಳಿಲ್ಲ. ಇದು ನನ್ನ ಜೀವನದಲ್ಲೂ ಅನೇಕ ಬದಲಾವಣೆಗಳನ್ನು ತಂದಿದೆ. ಯಾವುದೇ ಬಿಜಿಯಾದ ದಿನಗಳಿಲ್ಲ ಮತ್ತು ನಾನು ಹೆಚ್ಚು ಸಮಯ ಕೆಲಸ ಮಾಡಬೇಕಾಗಿಲ್ಲ ಎಂದು ಯುವಕ ಹೇಳಿದ್ದಾನೆ.

ನಾನು ಕೆಲಸ ಬಿಡುವಾಗ ನನ್ನ ಬಳಿ ಸ್ವಂತ ಉದ್ಯೋಗ ಅಥವಾ ವ್ಯವಹಾರದ ಬಗ್ಗೆ ಯಾವುದೇ ವಿವರವಾದ ನೀಲನಕ್ಷೆ ಇರಲಿಲ್ಲ. ಬದಲಾಗಿ, ನನ್ನದೇ ಆದ ಶ್ರಮದ ಮೇಲೆ ಏನನ್ನಾದರೂ ನಿರ್ಮಿಸಲು ಬಯಸಿದ್ದೆ. ಹೀಗಾಗಿ, ಆರಂಭಿಕ ದಿನಗಳು ತುಂಬಾ ಕಠಿಣವಾಗಿದ್ದವು. ಮೊದಲ ಕೆಲವು ತಿಂಗಳುಗಳು ಸಾಕಷ್ಟು ಅನುಮಾನಗಳು ನನ್ನ ತಲೆಯಲ್ಲಿ ಓಡಿದವು. ಯಾವುದೇ ಆದಾಯ ಕೂಡ ಇರಲಿಲ್ಲ. ಪ್ರಾಮಾಣಿಕವಾಗಿ ಹೇಳಬೇಕೆಂದರೆ ಕೆಲವೊಮ್ಮೆ ತುಂಬಾ ಭಯವಾಗುತ್ತಿತ್ತು. ಆದರೆ, ಒಂದು ವರ್ಷದ ನಂತರ, ನನ್ನ ತಾಳ್ಮೆಗೆ ಫಲ ಸಿಕ್ಕಿತು. ಇದು ರಾತ್ರೋರಾತ್ರಿ ಹಠಾತ್ತನೆ ಬಂದ ಗೆಲುವಲ್ಲ ಎಂದು ಯುವಕ ಹೇಳಿದ್ದಾನೆ.

ಕಚೇರಿಯ ಒತ್ತಡದ ಬದುಕನ್ನು ಬಿಟ್ಟು ಹೊರಬರಬೇಕೆಂಬ ಕನಸು ಅನೇಕ ಯುವ ಉದ್ಯೋಗಿಗಳಿಗಿದ್ದರೂ, ಅದನ್ನು ಕಾರ್ಯರೂಪಕ್ಕೆ ತರುವವರು ಕೆಲವರು ಮಾತ್ರ. ಕಾರ್ಪೊರೇಟ್ ಜೀವನದ ಮಾಸಿಕ ಸಂಬಳದ ವ್ಯಾಮೋಹ ತೊರೆದು, ಸ್ವಂತ ಪರಿಶ್ರಮದಿಂದ ತನಗಿಷ್ಟವಾದ ನಿಧಾನಗತಿಯ ಸ್ವತಂತ್ರ ಬದುಕನ್ನು ರೂಪಿಸಿಕೊಂಡು ಯಶಸ್ವಿಯಾದ ಭಾರತೀಯ ಯುವಕನ ಕಥೆ ಈಗ ರೆಡ್ಡಿಟ್‌ನಲ್ಲಿ ಭಾರಿ ಗಮನ ಸೆಳೆಯುತ್ತಿದೆ. ಈತನ ಯಶಸ್ಸಿನ ಪಯಣವು ಇಂದಿನ ನಗರ ಪ್ರದೇಶದ ಯುವಜನತೆಯಲ್ಲಿ ಹೆಚ್ಚುತ್ತಿರುವ ಪರ್ಯಾಯ ವೃತ್ತಿಜೀವನ, ಪ್ರವಾಸದ ಜೊತೆಗಿನ ಉದ್ಯೋಗ ಮತ್ತು ಉದ್ಯಮಶೀಲತೆಯ ಬಗೆಗಿನ ಆಸಕ್ತಿಯನ್ನು ಪ್ರತಿಬಿಂಬಿಸುವಂತಿದೆ, (ಏಜೆನ್ಸೀಸ್​).