ತ್ರಿಕ್ಕಲಥೂರಿನ ಪಾನಿಕೋಡಿ ನಿವಾಸಿ ಸ್ನೇಹಮೋಲ್ ಮಣಿ ಎಂಬ ವಿದ್ಯಾರ್ಥಿನಿಯೇ ಈ ಕಾನೂನು ಹೋರಾಟ ನಡೆಸಿದ ದಿಟ್ಟ ಯುವತಿ. ಈಕೆ ಮಾರ್ಚ್ 2019 ರಲ್ಲಿ ಮುವಾಟ್ಟುಪುಳ ಎಸ್‌ಎನ್‌ಡಿಪಿ ಹೈಯರ್ ಸೆಕೆಂಡರಿ ಶಾಲೆಯಲ್ಲಿ ಪ್ಲಸ್ ಟು ಪರೀಕ್ಷೆ ಬರೆದಿದ್ದು, ಅರ್ಥಶಾಸ್ತ್ರ ವಿಷಯವನ್ನು ಹೊರತುಪಡಿಸಿ ಉಳಿದೆಲ್ಲಾ ವಿಷಯಗಳಲ್ಲೂ 'ಎ+' ಗ್ರೇಡ್ ಗಳಿಸಿದ್ದಳು. ಆದರೆ ಅರ್ಥಶಾಸ್ತ್ರದಲ್ಲಿ ಮಾತ್ರ ಕೇವಲ 57 ಅಂಕಗಳನ್ನು ನೀಡಲಾಗಿತ್ತು. ತನ್ನ ಅಂಕಗಳ ಬಗ್ಗೆ ಅನುಮಾನಗೊಂಡು ಆಕೆ ಮರುಮೌಲ್ಯಮಾಪನಕ್ಕೆ ಅರ್ಜಿ ಸಲ್ಲಿಸಿದಾಗ ಅಚ್ಚರಿಯ ಫಲಿತಾಂಶ ಹೊರಬಂತು. ಅಂದು 57 ಅಂಕಗಳನ್ನು ಪಡೆದಿದ್ದ ಅದೇ ಪತ್ರಿಕೆಗೆ ಮರುಮೌಲ್ಯಮಾಪನದಲ್ಲಿ 80ಕ್ಕೆ ಬರೋಬ್ಬರಿ 80 ಅಂಕಗಳು ಸಿಕ್ಕವು!
ಆದರೆ, ಈ ಮರುಮೌಲ್ಯಮಾಪನದ ಫಲಿತಾಂಶವು 2019, ಜುಲೈ 22ರಂದು ಪ್ರಕಟಗೊಳ್ಳುವಷ್ಟರಲ್ಲಿ ಕಾಲೇಜುಗಳಲ್ಲಿ ಸಾಮಾನ್ಯ ಮೆರಿಟ್ ಸೀಟುಗಳ ಪ್ರವೇಶ ಪ್ರಕ್ರಿಯೆ ಸಂಪೂರ್ಣವಾಗಿ ಮುಗಿದುಹೋಗಿತ್ತು. ಇಲಾಖೆಯ ಈ ದೊಡ್ಡ ತಪ್ಪಿನಿಂದಾಗಿ ಆಕೆಗೆ ತಾನು ಬಯಸಿದ ಪ್ರತಿಷ್ಠಿತ ಕಾಲೇಜುಗಳಲ್ಲಿ ಸೀಟ್ ಸಿಗಲಿಲ್ಲ, ಇದು ಆಕೆಯ ಭವಿಷ್ಯದ ಮೇಲೂ ಗಂಭೀರ ಪರಿಣಾಮ ಬೀರಿತು. ಅಂತಿಮವಾಗಿ ಉನ್ನತ ವಿದ್ಯಾಭ್ಯಾಸಕ್ಕಾಗಿ ಆಕೆ ವಿದೇಶಕ್ಕೆ ತೆರಳಬೇಕಾಯಿತು ಮತ್ತು ಕೆನಡಾದಲ್ಲಿ ಅಧ್ಯಯನ ಮುಂದುವರಿಸಲು ಬ್ಯಾಂಕ್‌ ಮೂಲಕ ಸಾಲ ಮಾಡಬೇಕಾದ ಅನಿವಾರ್ಯ ಪರಿಸ್ಥಿತಿ ಎದುರಾಯಿತು. ತನ್ನ ಬದುಕಿಗೆ ಎದುರಾದ ಈ ಅನ್ಯಾಯವನ್ನು ಸಹಿಸದೆ, ಸ್ನೇಹಮೋಲ್ ಮಣಿ 2021ರಲ್ಲಿ ಮುವಾಟ್ಟುಪುಳ ಮುನ್ಸಿಫ್ ನ್ಯಾಯಾಲಯದ ಮೆಟ್ಟಿಲೇರಿದರು.
ನ್ಯಾಯಾಲಯದಲ್ಲಿ ವಾದ ಮಂಡಿಸಿದ ಸರ್ಕಾರ, ತಪ್ಪು ಎಸಗಿದ ಶಿಕ್ಷಕರ ವಿರುದ್ಧ ಈಗಾಗಲೇ ಇಲಾಖಾ ಕ್ರಮ ಕೈಗೊಳ್ಳಲಾಗಿದೆ ಮತ್ತು ವಿದ್ಯಾರ್ಥಿನಿಯ ವೃತ್ತಿಜೀವನದ ನಷ್ಟಕ್ಕೆ ಸರ್ಕಾರ ನೇರವಾಗಿ ಜವಾಬ್ದಾರಿಯಲ್ಲ ಎಂದು ವಾದಿಸಿತ್ತು. ಆದರೆ, ಸರ್ಕಾರದ ಈ ಸಮರ್ಥನೆಯನ್ನು ನ್ಯಾಯಾಲಯ ಸ್ಪಷ್ಟವಾಗಿ ತಳ್ಳಿಹಾಕಿತು. ಉನ್ನತ ಶಿಕ್ಷಣದ ಅವಕಾಶ ವಂಚಿತಳಾಗಿರುವುದು, ವಿದ್ಯಾರ್ಥಿನಿ ಅನುಭವಿಸಿದ ತೀವ್ರ ಮಾನಸಿಕ ಯಾತನೆ ಮತ್ತು ಆಕೆಗೆ ಸಲ್ಲಬೇಕಿದ್ದ ಅರ್ಹ ಮನ್ನಣೆ ಸಿಗದೆ ಹೋಗಿರುವುದಕ್ಕೆ ಪರಿಹಾರ ಪಡೆಯಲು ಆಕೆ ಸಂಪೂರ್ಣ ಅರ್ಹಳಾಗಿದ್ದಾಳೆ ಎಂದು ಕೋರ್ಟ್ ತೀರ್ಪು ನೀಡಿತು.
