ಹೌದು, ಪ್ರಸಿದ್ಧ ಐಎಎಸ್ ಅಧಿಕಾರಿ ಮತ್ತು ಯುಪಿಎಸ್‌ಸಿ ಟಾಪರ್ ಟೀನಾ ದಾಬಿ (Tina Dabi) ಅವರು ಧ್ವಜಾರೋಹಣದ ವೇಳೆ ದಿಕ್ಕು ಬದಲಿಸಿ ವಂದನೆ (Salute) ಸಲ್ಲಿಸಿದ ವೀಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ಕಾಡ್ಗಿಚ್ಚಿನಂತೆ ಹರಡುತ್ತಿದ್ದು, ನೆಟ್ಟಿಗರಿಂದ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದೆ.

ಬಾರ್ಮರ್ ಜಿಲ್ಲಾಧಿಕಾರಿಯಾಗಿರುವ ಟೀನಾ ದಾಬಿ ಅವರು ಗಣರಾಜ್ಯೋತ್ಸವದ ಪ್ರಯುಕ್ತ ಜಿಲ್ಲಾ ಕಲೆಕ್ಟರೇಟ್ ಕಚೇರಿಯಲ್ಲಿ ತ್ರಿವರ್ಣ ಧ್ವಜವನ್ನು ಹಾರಿಸಿದರು. ಧ್ವಜಾರೋಹಣದ ನಂತರ ರಾಷ್ಟ್ರಗೀತೆ ಆರಂಭವಾಗುತ್ತಿದ್ದಂತೆ, ಅವರು ಧ್ವಜದ ಕಡೆಗೆ ತಿರುಗುವ ಬದಲು ವಿರುದ್ಧ ದಿಕ್ಕಿನಲ್ಲಿ ತಿರುಗಿ ವಂದನೆ ಸಲ್ಲಿಸಲು ಮುಂದಾದರು. ಕೆಲ ಕ್ಷಣಗಳ ಕಾಲ ಗೊಂದಲಕ್ಕೊಳಗಾದ ಅವರಿಗೆ, ಪಕ್ಕದಲ್ಲಿದ್ದ ಭದ್ರತಾ ಸಿಬ್ಬಂದಿ ಮತ್ತು ಸಹ ಅಧಿಕಾರಿಗಳು ಕೂಡಲೇ ಸನ್ನೆ ಮಾಡುವ ಮೂಲಕ ಸರಿಯಾದ ದಿಕ್ಕನ್ನು ತೋರಿಸಿಕೊಟ್ಟರು. ತಕ್ಷಣ ಎಚ್ಚೆತ್ತುಕೊಂಡ ಟೀನಾ ದಾಬಿ ಅವರು ತಮ್ಮ ಸ್ಥಾನವನ್ನು ಸರಿಪಡಿಸಿಕೊಂಡು ಧ್ವಜಕ್ಕೆ ವಂದನೆ ಸಲ್ಲಿಸಿದರು.

ಕೇವಲ 30 ಸೆಕೆಂಡುಗಳ ಈ ವೀಡಿಯೊ ಕ್ಲಿಪ್ ಸಾಮಾಜಿಕ ಜಾಲತಾಣ ಎಕ್ಸ್ (X) ನಲ್ಲಿ ಭಾರಿ ಸದ್ದು ಮಾಡುತ್ತಿದೆ. ಅನೇಕರು ಇದನ್ನು ಕೇವಲ "ಮಾನವ ಸಹಜ ತಪ್ಪು" ಎಂದು ಕರೆದರೆ, ಇನ್ನು ಕೆಲವರು ತೀವ್ರವಾಗಿ ಟೀಕಿಸಿದ್ದಾರೆ. "ದಿನಕ್ಕೆ 18 ಗಂಟೆಗಳ ಕಾಲ ಓದಿ ಯುಪಿಎಸ್‌ಸಿ ಟಾಪ್ ಮಾಡಿದವರಿಗೆ ಧ್ವಜಕ್ಕೆ ಹೇಗೆ ವಂದನೆ ಸಲ್ಲಿಸಬೇಕೆಂಬ ಕನಿಷ್ಠ ಜ್ಞಾನವಿಲ್ಲವೇ?" ಎಂದು ಕೆಲವರು ಪ್ರಶ್ನಿಸಿದ್ದಾರೆ. ಇನ್ನು ಕೆಲವರು "ಇದು ಕೇವಲ ಕ್ಯಾಮೆರಾ ಪ್ರಚಾರಕ್ಕಾಗಿ ಮಾಡುವ ಕೆಲಸದ ಫಲ" ಎಂದು ಲೇವಡಿ ಮಾಡಿದ್ದಾರೆ. "ಯಾರೇ ಆದರೂ ಇಂತಹ ಸಾರ್ವಜನಿಕ ವೇದಿಕೆಗಳಲ್ಲಿ ಸಣ್ಣಪುಟ್ಟ ಗೊಂದಲಕ್ಕೆ ಒಳಗಾಗುವುದು ಸಹಜ. ಅವರು ತಕ್ಷಣವೇ ಅದನ್ನು ಸರಿಪಡಿಸಿಕೊಂಡಿದ್ದಾರೆ, ಇದನ್ನೇ ದೊಡ್ಡ ವಿವಾದ ಮಾಡುವುದು ಸರಿಯಲ್ಲ" ಎಂದು ಟೀನಾ ದಾಬಿ ಅವರ ಬೆಂಬಲಿಗರು ವಾದಿಸಿದ್ದಾರೆ.

ಈ ವಿವಾದದ ಕುರಿತು ಪ್ರತಿಕ್ರಿಯಿಸಿರುವ ಟೀನಾ ದಾಬಿ ಅವರು, "ಅದು ಉದ್ದೇಶಪೂರ್ವಕವಾಗಿ ಮಾಡಿದ ತಪ್ಪಲ್ಲ. ಅಂದು ಬಿಗಿಯಾದ ವೇಳಾಪಟ್ಟಿ ಮತ್ತು ಗೊಂದಲದ ನಡುವೆ ಕ್ಷಣಕಾಲ ದಿಕ್ಕು ತಪ್ಪಿದ್ದು ನಿಜ, ಆದರೆ ಅದನ್ನು ತಕ್ಷಣವೇ ಸರಿಪಡಿಸಿಕೊಳ್ಳಲಾಗಿದೆ" ಎಂದು ಸ್ಪಷ್ಟನೆ ನೀಡಿದ್ದಾರೆ ಎಂದು ವರದಿಯಾಗಿದೆ.

ಯಾವಾಗಲೂ ಒಂದಲ್ಲ ಒಂದು ಕಾರಣಕ್ಕೆ ಸುದ್ದಿಯಲ್ಲಿರುವ ಟೀನಾ ದಾಬಿ ಅವರಿಗೆ ಈ ಗಣರಾಜ್ಯೋತ್ಸವದ ಘಟನೆ ಹೊಸ ರೀತಿಯ ಸಂಕಷ್ಟ ತಂದೊಡ್ಡಿದೆ. ಆಡಳಿತಾತ್ಮಕ ವಲಯದಲ್ಲಿ ಇದನ್ನು ಒಂದು ಸಣ್ಣ ತಪ್ಪು ಎಂದು ಪರಿಗಣಿಸಲಾಗಿದ್ದರೂ, ಸಾಮಾಜಿಕ ಜಾಲತಾಣದಲ್ಲಿ ಮಾತ್ರ ಚರ್ಚೆ ಇನ್ನೂ ನಿಂತಿಲ್ಲ,(ಏಜೆನ್ಸೀಸ್​).