ಪತ್ನಿಯ ಪ್ರಾಣ ಉಳಿಸಲು 78ನೇ ವಯಸ್ಸಿನಲ್ಲೂ ಕಾಯಕ..ಡೆಲಿವರಿ ಬಾಯ್ ಆದ ವೃದ್ಧನಿಗೆ ಒಲಿಯಿತು 4 ಕೋಟಿ ರೂ ಜಾಕ್ ಪಾಟ್! Delivery agent

ರಿಚರ್ಡ್ ಪುಲ್ಲಿ ಅವರು ಆಹಾರ ವಿತರಿಸುವ ವೀಡಿಯೊ ಸಾಮಾಜಿಕ ಜಾಲತಾಣವಾದ X ನಲ್ಲಿ ವೈರಲ್ ಆಗುತ್ತಿದ್ದಂತೆಯೇ, ಅದು ಕೇವಲ ವೀಕ್ಷಣೆಗೆ ಸೀಮಿತವಾಗಲಿಲ್ಲ. ಅವರ ಪ್ರಾಮಾಣಿಕತೆ ಮತ್ತು ಪತ್ನಿಯ ಆರೋಗ್ಯಕ್ಕಾಗಿ ಶ್ರಮಿಸುತ್ತಿರುವ ಸಮರ್ಪಣಾ ಮನೋಭಾವವು ಸಾವಿರಾರು ಜನರ ಹೃದಯವನ್ನು ತಲುಪಿದ್ದು, ಸುಮಾರು 4 ಕೋಟಿ ರೂಗಳನ್ನು ದೇಣಿಗೆ ರೂಪದಲ್ಲಿ ಪಡೆಯಲು ಸಹಾಯವಾಯಿತು.

ಬ್ರಿಟಾನಿ ಸ್ಮಿತ್ ಎಂಬ ವ್ಯಕ್ತಿ ತಮ್ಮ ಮನೆಗೆ ಆಹಾರ ತಲುಪಿಸಲು ಬಂದ  ರಿಚರ್ಡ್ ಅವರನ್ನು ಸೂಕ್ಷ್ಮವಾಗಿ ಗಮನಿಸಿದರು. ಆದಾಗ್ಯೂ, ಅವರು ಕೆಲಸ ಮೇಲೆ  ತೋರುತ್ತಿದ್ದ ಶ್ರದ್ಧೆ ಮತ್ತು ಅವರ ನಿಧಾನಗತಿಯ ಹೆಜ್ಜೆಗಳು ಬ್ರಿಟಾನಿ ಅವರ ಮನಸ್ಸನ್ನು ಕಲಕಿದವು. ಕೂಡಲೇ ಅವರ ವಿಡಿಯೋವನ್ನು ಮಾಡಿ, ಅವರನ್ನು 'ರಿಚರ್ಡ್ ದಿ ಸ್ಟಾರ್‌ಬಕ್ಸ್ ಡೆಲಿವರಿ ಮ್ಯಾನ್' ಎಂದು ಕರೆದು, ಈ "ರಿಯಲ್ ಹೀರೋ"ಗೆ ಸಹಾಯ ಮಾಡಿ ಎಂದು ವಿನಮ್ರವಾಗಿ ಕೇಳಿಕೊಂಡರು.

ವಿಡಿಯೋ ಸಾಮಾಜಿಕ  ಮಾಧ್ಯಮದಲ್ಲಿ ವೈರಲ್​ ಆಗುತ್ತಿದ್ದಂತೆಯೇ ಅನೇಕ ಬಳಕೆದಾರರು ಅವರನ್ನು ಪತ್ತೆ ಹಚ್ಚಿದರು. ಈ ವೇಳೆ ರಿಚರ್ಡ್ ಮತ್ತು ಅವರ ಪತ್ನಿಯ ಆರೋಗ್ಯದ ಸಮಸ್ಯೆ ಬಗ್ಗೆ ಗಮನ ಸೆಳೆದರು.

ಟ್ರೆಂಡಿಂಗ್ ಪಾಲಿಟಿಕ್ಸ್‌ನ ಸಹ-ಸಂಸ್ಥಾಪಕ ಕಾಲಿನ್ ರಗ್ ಈ ವೀಡಿಯೊವನ್ನು ಮರುಹಂಚಿಕೊಂಡಾಗ, ಅದು ಕೇವಲ ಒಂದು ಸುದ್ದಿಯಾಗಿ ಉಳಿಯಲಿಲ್ಲ. ಬ್ರಿಟಾನಿ ಸ್ಮಿತ್ ಅವರು "ನೀವು ಈ ವಯಸ್ಸಿನಲ್ಲೂ ಏಕೆ ಕೆಲಸ ಮಾಡುತ್ತಿದ್ದೀರಿ?" ಎಂದು ಕೇಳಿದಾಗ ಅವರ ಪರಿಸ್ಥಿತಿಯನ್ನು ವಿವರಿಸುವ ಮತ್ತೊಂದು ವಿಡಿಯೋವನ್ನು ಮರು ಹಂಚಿಕೊಂಡಿದ್ದಾರೆ. 

ಕ್ರಮೇಣ ಈ ಪೋಸ್ಟ್ ವೈರಲ್​ ಆಯ್ತು, ಜೊತೆಗೆ ಬ್ರಿಟಾನಿ ಈ ಅವಕಾಶವನ್ನು ಬಳಸಿಕೊಂಡು ಪುಲ್ಲಿ ಕುಟುಂಬಕ್ಕೆ ಸಹಾಯ ಹಸ್ತ ಚಾಚಲು ಗೋಫಂಡ್‌ಮಿ ಅಭಿಯಾನವನ್ನು ಪ್ರಾರಂಭಿಸಿದರು. ತ್ವರಿತವಾಗಿ ದೇಣಿಗೆಗಳು ಹರಿದು ಬರಲು ಪ್ರಾರಂಭಿಸಿದ್ದು, ಸಾವಿರಾರು ಜನರು ದಂಪತಿ ಕಷ್ಟಗಳನ್ನು ನಿರ್ವಹಿಸಲು ಸುಮಾರು 4.6 ಕೋಟಿ ರೂ. ದೇಣಿಗೆ ನೀಡಿದ್ದಾರೆ.