10,000 ಮೆಟ್ಟಿಲುಗಳ ಮೇಲೆ ವ್ಯಕ್ತಿಯನ್ನು ಹೊತ್ತೊಯ್ದ 4 ಮಂದಿ: ಸೋಶಿಯಲ್ ಮೀಡಿಯಾದಲ್ಲಿ 'ಡೋಲಿ' ಪದ್ಧತಿ ಕುರಿತು ಕಾವೇರಿದ ಚರ್ಚೆ! Doli System

ಗುಜುರಾತ್​ನ ಜುನಾಗಢದ ಪ್ರಸಿದ್ಧ ಯಾತ್ರಾ ಮಾರ್ಗದಲ್ಲಿ ಚಿತ್ರೀಕರಿಸಲಾದ ವಿಡಿಯೋವೊಂದರಲ್ಲಿ ತೀರ್ಥಕ್ಷೇತ್ರದ ಚಿಕ್ಕದಾದ ಮೆಟ್ಟಿಲುಗಳ ಮೇಲೆ ನಾಲ್ವರು ಯುವಕರು ಒಬ್ಬ ಭಕ್ತನನ್ನು ವಿಶೇಷ ಪಲ್ಲಕ್ಕಿಯಲ್ಲಿ ಕೂರಿಸಿಕೊಂಡು ಬೆಟ್ಟದ ಕಡೆಗೆ ಹೊತ್ತೊಯ್ಯುತ್ತಿರುವ ದೃಶ್ಯವನ್ನು ಕಾಣಬಹುದಾಗಿದೆ. ಆದಾಗ್ಯೂ, ಅತ್ಯಂತ ಕಷ್ಟಕರವಾದ ಈ ಹಾದಿಯಲ್ಲಿ ಭಾರವಾದ ವ್ಯಕ್ತಿಯನ್ನು ಸ್ವಲ್ಪವೂ ಅಲುಗಾಡದಂತೆ ಮೆಟ್ಟಿಲು ಹತ್ತುವ ಆ ನಾಲ್ವರ ಶ್ರಮ ಮತ್ತು ಕಷ್ಟ ದೃಶ್ಯದಲ್ಲಿ ಸ್ಪಷ್ಟವಾಗಿ ಎದ್ದು ಕಾಣುತ್ತದೆ.

ಈ ವಿಡಿಯೋ ಹಂಚಿಕೊಂಡ ಎಕ್ಸ್​ ಬಳಕೆದಾರ ನಾಲ್ಕು ಜನರಿಗೆ ಉದ್ಯೋಗ ಸಿಗುತ್ತಿದೆ ಎಂಬ ಕಾರಣ ನೀಡಿ ಈ ಪದ್ಧತಿಯನ್ನು ಸಮರ್ಥಿಸಿಕೊಳ್ಳಬೇಡಿ. ಮನುಷ್ಯರನ್ನು ಮನುಷ್ಯರೇ ಹೊರುವ ಈ ವ್ಯವಸ್ಥೆಯ ಬಗ್ಗೆ ದೇವರು ನಿಜಕ್ಕೂ ಏನೆಂದುಕೊಳ್ಳಬಹುದು? ಎಂದು ಪ್ರಶ್ನಿಸಿದ್ದಾರೆ.

ಇದರ ಜೊತೆಗೆ, ವಯೋಸಹಜ ದೌರ್ಬಲ್ಯ, ತೀವ್ರ ಅನಾರೋಗ್ಯ, ವಿಕಲಚೇತನತೆ ಅಥವಾ ಶಾರೀರಿಕ ತೊಂದರೆಗಳಿಂದ ಬಳಲುತ್ತಿರುವವರು ಇಂತಹ ಸೇವೆಯನ್ನು ಬಳಸುವುದು ಅನಿವಾರ್ಯ ಎಂಬುದನ್ನು ಬಳಕೆದಾರ ಸ್ಪಷ್ಟಪಡಿಸಿದ್ದಾರೆ. ಆದರೆ, ಕೇವಲ ಸಾರಿಗೆಗಾಗಿ ಅಥವಾ ಶ್ರಮ ವಹಿಸಲು ಇಷ್ಟವಿಲ್ಲದೆ ಮನುಷ್ಯರನ್ನು ವಾಹನದಂತೆ ಬಳಸಿಕೊಳ್ಳುವ ಮಾನಸಿಕತೆ ಮತ್ತು ಆ ಕಲ್ಪನೆಯೇ ಸರಿ ಇಲ್ಲ ಎಂಬುದು ಅವರ ಪ್ರತಿಪಾದನೆಯಾಗಿದೆ.

ಈ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗುತ್ತಿದ್ದಂತೆಯೇ ಅನೇಕ ಬಳಕೆದಾರರು ಪರ-ವಿರೋಧ ಚರ್ಚೆ ಮಾಡಿದ್ದಾರೆ. ಒಬ್ಬ ಬಳಕೆದಾರ ಆಧುನಿಕ ಸಮಾಜದಲ್ಲಿ ಪ್ರತಿಯೊಬ್ಬ ವ್ಯಕ್ತಿಗೂ ತನ್ನದೇ ಆದ ಮಾನವ ಘನತೆ ಮತ್ತು ಸಮಾನತೆಯ ಹಕ್ಕಿದೆ. ಕೇವಲ ಹಣಕ್ಕಾಗಿ ಅಥವಾ ಜೀವನೋಪಾಯಕ್ಕಾಗಿ ಮತ್ತೊಬ್ಬರ ಶಾರೀರಿಕ ಹೊರೆಯನ್ನು ಹೊರುವುದು ಆಧುನಿಕ ಮಾನವೀಯ ಮೌಲ್ಯಗಳಿಗೆ ತಕ್ಕುದಾದದ್ದಲ್ಲ ಎಂದು ಕಮೆಂಟ್​ ಮಾಡಿದ್ದಾರೆ.

ಇನ್ನೊಬ್ಬ ಬಳಕೆದಾರ ಸ್ಥಳೀಯ ಶ್ರಮಿಕರಿಗೆ ಇದು ಪ್ರಮುಖ ಜೀವನೋಪಾಯದ ಮಾರ್ಗವಾಗಿದೆ. ಆಧುನಿಕ ಸಾರಿಗೆ ವ್ಯವಸ್ಥೆ ಇಲ್ಲದ ಕಡಿದಾದ ಬೆಟ್ಟಗಳಲ್ಲಿ ವಯೋವೃದ್ಧರು ಮತ್ತು ಅಸಹಾಯಕರು ದೇವರ ದರ್ಶನ ಪಡೆಯಲು ಈ ವ್ಯವಸ್ಥೆಯೇ ಆಸರೆಯಾಗಿದೆ. ಇದನ್ನು ಬಂದ್ ಮಾಡಿದರೆ ಅವರ ಹೊಟ್ಟೆಪಾಡಿಗೆ ತೊಂದರೆಯಾಗುತ್ತದೆ ಎಂದು ಸಮರ್ಥಿಸಿಕೊಂಡಿದ್ದಾರೆ (ಏಜೆನ್ಸೀಸ್​).