ದೇಶ

ಸಿಖ್ ದಂಗೆ ಅಪರಾಧಿ ಸಜ್ಜನ್ ಕುಮಾರ್ ಶ್ರಾದ್ಧದಲ್ಲಿ ಬಿಜೆಪಿಯ ಮೂವರು ಸಂಸದರು!...ನೋಟಿಸ್​ ಜಾರಿ ಮಾಡಿದ ನಿತಿನ್​ ನವೀನ್​ | Sajjan Kumar

Sajjan Kumar > ಸಿಖ್ ದಂಗೆ ಅಪರಾಧಿ ಸಜ್ಜನ್ ಕುಮಾರ್ ಶ್ರಾದ್ಧದಲ್ಲಿ ಬಿಜೆಪಿಯ ಮೂವರು ಸಂಸದರಿಗೆ ನೋಟಿಸ್​ ಜಾರಿ ಮಾಡಿದ ನಿತಿನ್​ ನವೀನ್
Sajjan Kumar > ಸಿಖ್ ದಂಗೆ ಅಪರಾಧಿ ಸಜ್ಜನ್ ಕುಮಾರ್ ಶ್ರಾದ್ಧದಲ್ಲಿ ಬಿಜೆಪಿಯ ಮೂವರು ಸಂಸದರಿಗೆ ನೋಟಿಸ್​ ಜಾರಿ ಮಾಡಿದ ನಿತಿನ್​ ನವೀನ್
Published on: 

1984ರ ಸಿಖ್ ವಿರೋಧಿ ಗಲಭೆಯ ಶಿಕ್ಷೆಗೆ ಒಳಗಾಗಿದ್ದ ಸಜ್ಜನ್ ಕುಮಾರ್ ಅವರ ನಿಧನದ ಸುತ್ತಲಿನ ವಿವಾದಗಳು ಇದೀಗ 3 ನಾಯಕರನ್ನು ಸಂಕಷ್ಟಕ್ಕೆ ಸಿಲುಕಿಸಿವೆ. ಈ ಬಾರಿ ರಾಜಕೀಯ ಸಮರವು ವಿರೋಧ ಪಕ್ಷದ ಕಡೆಗೆ ತಿರುಗಿದ್ದು, ವಿವಾದಾತ್ಮಕ ವ್ಯಕ್ತಿಯನ್ನು ಹೊಗಳಿದ್ದಕ್ಕಾಗಿ ಕಾಂಗ್ರೆಸ್ ನಾಯಕ ದೀಪೇಂದರ್ ಹೂಡಾ ಸ್ವಪಕ್ಷದ ನಾಯಕರಿಂದಲೇ ತೀವ್ರ ಟೀಕೆಗೆ ಗುರಿಯಾಗಿದ್ದರು. ಇದಾದ ಕೆಲವೇ ದಿನಗಳಲ್ಲಿ, ಮೂವರು ಬಿಜೆಪಿ ಸಂಸದರು ಸಾಂತ್ವನ ಹೇಳಲು ಅವರ ನಿವಾಸಕ್ಕೆ ಭೇಟಿ ನೀಡಿದ್ದಕ್ಕಾಗಿ ಈಗ ಆಕ್ರೋಶ ಎದುರಿಸುತ್ತಿದ್ದಾರೆ.

80 ವರ್ಷ ವಯಸ್ಸಿನ ಸಜ್ಜನ್ ಕುಮಾರ್, 1984ರ ಸಿಖ್ ವಿರೋಧಿ ಗಲಭೆಯಲ್ಲಿ ಐವರು ವ್ಯಕ್ತಿಗಳ ಹತ್ಯೆ ಪ್ರಕರಣದಲ್ಲಿ ಜೀವಾವಧಿ ಶಿಕ್ಷೆ ಅನುಭವಿಸುತ್ತಿದ್ದಾಗ ಜೈಲಿನಲ್ಲೇ ಕೊನೆಯುಸಿರೆಳೆದರು. ಸಜ್ಜನ್ ಕುಮಾರ್ ಅಧಿಕ ರಕ್ತದೊತ್ತಡ ಮತ್ತು ಪಾರ್ಕಿನ್ಸನ್ ಕಾಯಿಲೆಯಂತಹ ಅನಾರೋಗ್ಯ ಸಮಸ್ಯೆಗಳಿಂದ ಬಳಲುತ್ತಿದ್ದರು. ಹೂಡಾ ಸೇರಿದಂತೆ ಹರಿಯಾಣದ ಕೆಲವು ಕಾಂಗ್ರೆಸ್ ನಾಯಕರು ಅವರ ಅಗಲಿಕೆಗೆ ಸಂತಾಪ ವ್ಯಕ್ತಪಡಿಸಲು ಮುಂದಾಗಿದ್ದರು. ಆದರೆ ಕುಮಾರ್ ಅವರ ಹಿನ್ನೆಲೆ ಹಾಗೂ ಮುಂಬರುವ ಪಂಜಾಬ್ ವಿಧಾನಸಭಾ ಚುನಾವಣೆಗಳ ಕಾರಣದಿಂದಾಗಿ ಟೀಕೆಗೆ ಒಳಗಾದರು.

ಮೂವರು ಸಂಸದರಿಗೆ ನೋಟಿಸ್​!

ಇದೀಗ ಬಿಜೆಪಿ ಸಂಸದರು ಸಹ ಈ ಅಪರಾಧಿಯ ಬಗ್ಗೆ ಸಹಾನುಭೂತಿ ತೋರಿಸಿರುವುದು ಬಯಲಾಗಿದ್ದು, ಪಕ್ಷದ ಅಧ್ಯಕ್ಷ ನಿತಿನ್ ನವೀನ್​ ಅವರಿಂದ ತೀವ್ರ ಅಸಮಾಧಾನ ವ್ಯಕ್ತವಾಗಿದೆ. ನವೀನ್ ಅವರು ರಾಮ್‌ವೀರ್ ಬಿಧುರಿ, ಯೋಗೇಂದ್ರ ಚಂದೋಲಿಯಾ ಮತ್ತು ಕಮಲ್ ಜೀತ್ ಸೆಹ್ರಾವತ್ ಎಂಬ ಮೂವರು ಸಂಸದರಿಗೆ ಸಮನ್ಸ್ ನೀಡಿದ್ದಾರೆ. ಅವರು ಅಲ್ಲಿಗೆ ಹೋಗಬಾರದಿತ್ತು ಎಂದು ಅಭಿಪ್ರಾಯಪಟ್ಟಿದ್ದಾರೆ.
ಸಜ್ಜನ್ ಕುಮಾರ್ ಕಾಂಗ್ರೆಸ್ ಪಕ್ಷದ ಮಾಜಿ ಸಂಸದರಾಗಿದ್ದು, 1980ರಲ್ಲಿ ಕೈ ಅಭ್ಯರ್ಥಿಯಾಗಿ ದೆಹಲಿ ಕ್ಷೇತ್ರದಿಂದ ಗೆಲ್ಲುವ ಮೂಲಕ ಮೊದಲ ಬಾರಿಗೆ ಲೋಕಸಭೆ ಪ್ರವೇಶಿಸಿದ್ದರು. 1984ರ ಗಲಭೆಯ ನಂತರವೂ, ಅವರು 1991 ಮತ್ತು 2004ರಲ್ಲಿ ಕಾಂಗ್ರೆಸ್‌ನಿಂದ ಸ್ಪರ್ಧಿಸಿ ಜಯಗಳಿಸಿದ್ದರು. 2010ರಲ್ಲಿ, ಗಲಭೆಯ ಸಮಯದಲ್ಲಿ ಕೊಲೆ, ಕೋಲಾಹಲ, ಅಪರಾಧಿಕ ಸಂಚು ಮತ್ತು ಹಿಂಸಾಚಾರಕ್ಕೆ ಪ್ರಚೋದನೆ ನೀಡಿದ ಆರೋಪಗಳನ್ನು ಅವರ ಮೇಲೆ ಹೊರಿಸಲಾಗಿತ್ತು. ಅವರು ಪ್ರಚೋದನಕಾರಿ ಭಾಷಣಗಳನ್ನು ಮಾಡಿದ್ದರು ಹಾಗೂ ಗಲಭೆಕೋರರಿಗೆ ತಲಾ 100 ರೂಪಾಯಿ ಮತ್ತು ಮದ್ಯವನ್ನು ನೀಡಿ ಪ್ರಚೋದಿಸಿದ್ದರು ಎಂದು ಸಾಕ್ಷಿಗಳು ಹೇಳಿಕೆ ನೀಡಿದ್ದರು.
2018ರಲ್ಲಿ, 1984ರ ಗಲಭೆಯಲ್ಲಿ ಅವರ ಪಾತ್ರಕ್ಕಾಗಿ ಜೀವಾವಧಿ ಶಿಕ್ಷೆ ವಿಧಿಸಲಾಯಿತು. 2025ರಲ್ಲಿ, 1984ರ ನವೆಂಬರ್ 1 ರಂದು ಜಸ್ವಂತ್ ಸಿಂಗ್ ಮತ್ತು ಅವರ ಪುತ್ರ ತರುಣ್‌ದೀಪ್ ಸಿಂಗ್ ಅವರನ್ನು ಹತ್ಯೆ ಮಾಡಲು ಪ್ರಚೋದನೆ ನೀಡಿದ ಹಾಗೂ ಭಾಗವಹಿಸಿದ ಮತ್ತೊಂದು ಪ್ರಕರಣದಲ್ಲಿ ದೆಹಲಿ ನ್ಯಾಯಾಲಯವು ಅವರನ್ನು ಅಪರಾಧಿ ಎಂದು ತೀರ್ಪು ನೀಡಿತ್ತು.

ದಂಗೆಯ ಅಪರಾಧಿಗಾಗಿ ಬಿಜೆಪಿಯವರ ಮನಸ್ಸು ಮಿಡಿಯುತ್ತಿದೆ ಎಂದ ಆಪ್​

ಅವರು ತೀರಿಕೊಂಡ ನಂತರವೂ ಸಿಖ್ಖರು ಹೆಚ್ಚಿರುವ ಪಂಜಾಬ್‌ನಲ್ಲಿ ಜನರಿಗೆ ಅವರ ಮೇಲೆ ತೀವ್ರ ಕೋಪವಿತ್ತು. ಇದೇ ಕಾರಣಕ್ಕೆ ಮಾಜಿ ಮುಖ್ಯಮಂತ್ರಿ ಚರಂಜಿತ್ ಸಿಂಗ್ ಚನ್ನಿ ಸೇರಿದಂತೆ ಹಲವು ಕಾಂಗ್ರೆಸ್ ನಾಯಕರು ಹೂಡಾ ಅವರನ್ನು ಕಠಿಣವಾಗಿ ತರಾಟೆಗೆ ತೆಗೆದುಕೊಂಡಿದ್ದರು. ಕುಮಾರ್ ಮತ್ತು ಹೂಡಾ ಅವರನ್ನು ಟೀಕಿಸುವಲ್ಲಿ ಬಿಜೆಪಿಯೂ ಹಿಂದೆ ಬಿದ್ದಿರಲಿಲ್ಲ. ಆದರೆ, ಈಗ ಮೂವರು ಬಿಜೆಪಿ ಸಂಸದರೇ ಅವರ ಮನೆಗೆ ಭೇಟಿ ನೀಡಿರುವುದು ವಿರೋಧ ಪಕ್ಷಗಳಿಗೆ ಕೇಸರಿ ನಾಯಕರನ್ನೇ ಗುರಿಯಾಗಿಸಿ ವಾಗ್ದಾಳಿ ನಡೆಸಲು ದೊಡ್ಡ ಅವಕಾಶ ಮಾಡಿಕೊಟ್ಟಿದೆ.
ಈಗ ಬಿಜೆಪಿಯ ನೈಜ ರೂಪ ಹೊರಬಿದ್ದಿದ್ದು, ಸಜ್ಜನ್ ಕುಮಾರ್ ಅವರ ಶ್ರಾದ್ಧ ಕಾರ್ಯಕ್ರಮದಲ್ಲಿ ಬಿಜೆಪಿಯ ಮೂವರು ಸಂಸದರು ಭಾಗವಹಿಸಿದ್ದರು. ಪಶ್ಚಿಮ ದೆಹಲಿ ಸಂಸದೆ ಕಮಲ್‌ಜೀತ್ ಸೆಹ್ರಾವತ್, ದಕ್ಷಿಣ ದೆಹಲಿ ಸಂಸದ ರಾಮ್‌ಬೀರ್ ಸಿಂಗ್ ಬಿಧುರಿ ಹಾಗೂ ವಾಯುವ್ಯ ದೆಹಲಿ ಸಂಸದ ಯೋಗೇಂದ್ರ ಚಂದೋಲಿಯಾ ಅಲ್ಲಿಗೆ ಹೋಗಿದ್ದರು ಎಂದು ಆಪ್ ನಾಯಕ ಬಲ್ತೇಜ್ ಪನ್ನು ಹೇಳಿದ್ದಾರೆ. ದೆಹಲಿ ಆಪ್ ನಾಯಕ ಸೌರಭ್ ಭಾರದ್ವಾಜ್ ಕೂಡ ಬಿಜೆಪಿಯನ್ನು ಟೀಕಿಸಿದ್ದು, ಮೂವರು ಸಂಸದರ ಮನಸ್ಸು ದಂಗೆಯ ಅಪರಾಧಿಗಾಗಿಯೇ ಮಿಡಿಯುತ್ತಿದೆ ಎಂದು ಸೋಶಿಯಲ್ ಮೀಡಿಯಾದಲ್ಲಿ ಪೋಸ್ಟ್ ಮಾಡಿದ್ದಾರೆ.
ಸಿಖ್ ದಂಗೆ ಪ್ರಕರಣದ ವಿರುದ್ಧ ದೀರ್ಘ ಕಾನೂನು ಹೋರಾಟ ನಡೆಸಿದ್ದ ಬಿಜೆಪಿ ನಾಯಕ ಎಚ್.ಎಸ್. ಫೂಲ್ಕಾ ಅವರು ಸಂಸದರು ಕುಮಾರ್ ಅವರ ಮನೆಗೆ ಭೇಟಿ ನೀಡಿರುವುದನ್ನು ಖಂಡಿಸಿದ್ದಾರೆ. ನರಹಂತಕ ಸಜ್ಜನ್ ಕುಮಾರ್ ಅವರ ನಿಧನಕ್ಕೆ ಸಾಂತ್ವನ ಹೇಳಲು ಅವರ ನಿವಾಸಕ್ಕೆ ಮೂವರು ಸಂಸದರು ಭೇಟಿ ನೀಡಿರುವುದನ್ನು ತೀವ್ರವಾಗಿ ಖಂಡಿಸುತ್ತೇನೆ. ಈ ಅಪರಾಧಿಗಳ ವಿರುದ್ಧ ನಮಗೆ ನ್ಯಾಯ ಸಿಗಲು ಬಿಜೆಪಿ ಯಾವಾಗಲೂ ಬೆಂಬಲ ನೀಡಿದೆ. ಸಹಾನುಭೂತಿಯನ್ನು ಸಂತ್ರಸ್ತರಿಗೆ ಮತ್ತು ಅವರ ಕುಟುಂಬಗಳಿಗೆ ಮಾತ್ರ ಮೀಸಲಿಡಬೇಕು. ಈ ಮೂವರು ಸಂಸದರನ್ನು ಬಹಿಷ್ಕರಿಸುವಂತೆ ನಾನು ಕರೆ ನೀಡುತ್ತೇನೆ ಎಂದು ಅವರು ತಿಳಿಸಿದ್ದಾರೆ(ಏಜೆನ್ಸೀಸ್​).
Sajjan Kumar
BJPvsAAP
nitin nabin
congressvsbjp
sikh riots 1984
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net