ನಕಲಿ ಮದ್ಯ ಸೇವಿಸಿ 22 ಜನರ ಬಲಿ: ರಾಸಾಯನಿಕ ನೀಡಿದ್ದ ಅಪ್ಪ-ಮಗ ಅರೆಸ್ಟ್​; 440 ಕಡೆ ದಾಳಿ, 333 ಬಂಧನ, 84 ಲಕ್ಷದ ಮಾಲು ವಶ! Pune Liquor Tragedy

ಪುಣೆ: ಕಳೆದ ಕೆಲ ದಿನಗಳ ಹಿಂದೆ ಮಹಾರಾಷ್ಟ್ರದ ಪುಣೆಯ ಪಿಂಪ್ರಿ-ಚಿಂಚ್‌ವಾಡದಲ್ಲಿ ನಕಲಿ ಮದ್ಯ ಸೇವನೆಯಿಂದಾಗಿ ಸುಮಾರು 22 ಜನ ಮೃತಪಟ್ಟ ಘಟನೆ (Pune Liquor Tragedy) ನಡೆದಿತ್ತು.

ಈಗ ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ, ಮಧ್ಯ ತಯಾರಿಕೆಗೆ ರಾಸಾಯನಿಕವನ್ನು ನೀಡಿದ ಇಬ್ಬರನ್ನು ಸಿಐಡಿ ಪೊಲೀಸರು ಬಂಧಿಸಿದ್ದಾರೆ. ಬಂಧಿತ ಆರೋಪಿಗಳನ್ನು ಅರುಣ್ ಜಗದಂಬಾ ಚೌಬೆ (59) ಮತ್ತು ಅವರ ಪುತ್ರ ಅಭಿಷೇಕ್ ಅರುಣ್ ಚೌಬೆ (24) ಎಂದು ಗುರುತಿಸಲಾಗಿದೆ.

ನಕಲಿ ಮದ್ಯ ಸೇವನೆಯಿಂದ 22 ಜನ ಮರಣ ಹೊಂದಿದ ತರುವಾಯ ಮಹಾರಾಷ್ಟ್ರ ಸರ್ಕಾರ ಈ ಪ್ರಕರಣದ ಜವಾಬ್ದಾರಿಯನ್ನು ಸಿಐಡಿಗೆ ವಹಿಸಿದೆ. ಹಾಗೂ ರಾಜ್ಯದಲ್ಲಿ ತಯಾರಾಗುತ್ತಿರುವ ನಕಲಿ ಮಧ್ಯ ತಯಾರಕಾ ಜಾಲವನ್ನು ಬೇಧಿಸುವಂತೆ ಸೂಚನೆ ನೀಡಿದೆ.

ಅಬಕಾರಿ ಇಲಾಖೆ ನಡೆಸಿದ ದಾಳಿಯಲ್ಲಿ ಸುಮಾರು 1.61 ಲಕ್ಷ ಲೀಟರ್​ ಹಾನಿಕಾರಕ ರಾಸಾಯನಿಕವನ್ನು ವಶಕ್ಕೆ ಪಡೆಯಲಾಗಿದೆ. ಅಂತೆಯೇ ಈ ರಾಸಾಯನಿಕ ಬಳಸಿ ತಯಾರಿಸಲಾದ 9, 686 ಲೀಟರ್​ ನಕಲಿ ಮದ್ಯವನ್ನು ಸಹ ಜಫ್ತಿ ಮಾಡಲಾಗಿದ್ದು, ಇದರ ಒಟ್ಟು ಮೌಲ್ಯ ಸುಮಾರು 83.24 ಲಕ್ಷ ಎಂದು ಹೇಳಲಾಗುತ್ತಿದೆ, (ಏಜನ್ಸೀಸ್).