20 ವರ್ಷಗಳ ನಿರಂತರ ಮಸಾಜ್, 5 ವರ್ಷಗಳ ಕ್ರಿಕೆಟ್ ವನವಾಸ! ದುಬೆ ಸಿಕ್ಸರ್‌ಗಳ ಹಿಂದೆ ಅಡಗಿದೆ ಅಪ್ಪನ ಕಣ್ಣೀರಿನ ಕಥೆ..? Shivam Dube

ಶಿವಂ ದುಬೆಯ ತಂದೆ ಹೇಳುವಂತೆ, ಮಗನ ಫಿಟ್ನೆಸ್ ಮತ್ತು ಸ್ನಾಯುಗಳ ಬಲಕ್ಕಾಗಿ ಅವರು ಪಟ್ಟ ಶ್ರಮ ಸಾಮಾನ್ಯವಾದುದಲ್ಲ. ಪ್ರತಿದಿನ ಪ್ರಾಕ್ಟೀಸ್ ಮುಗಿಸಿ ಬಂದ ನಂತರ, ನಾನು ಶಿವಂಗೆ ನಮ್ಮ ಹಳ್ಳಿಯಿಂದ ತರಿಸಿದ ಸಾಸಿವೆ ಎಣ್ಣೆಯಿಂದ ಒಂದೂವರೆ ಗಂಟೆ ಕಾಲ ಮಸಾಜ್ ಮಾಡುತ್ತಿದ್ದೆ. ಇದನ್ನು ನಾನು ನಿರಂತರವಾಗಿ 20-21 ವರ್ಷಗಳ ಕಾಲ ಮಾಡಿದ್ದೇನೆ ಎಂದು ಭಾವುಕರಾಗಿ ನುಡಿದಿದ್ದಾರೆ. ಒಬ್ಬ ತಂದೆ ತನ್ನ ಮಗನಿಗಾಗಿ ಫಿಸಿಯೋಥೆರಪಿಸ್ಟ್ ಆಗಿ ಬದಲಾದ ಈ ಕಥೆ ಈಗ ಎಲ್ಲರ ಗಮನ ಸೆಳೆಯುತ್ತಿದೆ.

ದುಬೆ ಕುಟುಂಬದ ಆರ್ಥಿಕ ಸ್ಥಿತಿ ಒಂದು ಕಾಲದಲ್ಲಿ ಅತ್ಯಂತ ಶೋಚನೀಯವಾಗಿತ್ತು. ಕುಟುಂಬದ ಆದಾಯದ ಮೂಲವಾಗಿದ್ದ ಫ್ಯಾಕ್ಟರಿ ಹಠಾತ್ತನೆ ಮುಚ್ಚಲ್ಪಟ್ಟಿತು. ಈ ಆರ್ಥಿಕ ಬಿಕ್ಕಟ್ಟಿನಿಂದಾಗಿ ಶಿವಂ ದುಬೆ ಬರೋಬ್ಬರಿ 5 ವರ್ಷಗಳ ಕಾಲ ಕ್ರಿಕೆಟ್‌ನಿಂದ ದೂರ ಉಳಿಯಬೇಕಾಯಿತು. ಮನೆಯಲ್ಲಿ ಹಣದ ಕೊರತೆ ಎಷ್ಟಿತ್ತೆಂದರೆ, ಕ್ರಿಕೆಟ್ ಕಿಟ್ ಮತ್ತು ತರಬೇತಿಯ ಖರ್ಚು ಭರಿಸುವುದು ಅಸಾಧ್ಯವಾಗಿತ್ತು.

ಕ್ರಿಕೆಟ್‌ನಿಂದ ದೂರವಿದ್ದ ಆ ಐದು ವರ್ಷಗಳಲ್ಲಿ ಶಿವಂ ದುಬೆ ಅವರ ದೈಹಿಕ ಸ್ಥಿತಿ ಹದಗೆಟ್ಟಿತ್ತು. ಆರ್ಥಿಕ ಸಮಸ್ಯೆಗಳನ್ನು ಸರಿಪಡಿಸುವ ಹೊತ್ತಿಗೆ ಶಿವಂ ಅವರ ತೂಕ 110 ಕೆಜಿಗೆ ಏರಿತ್ತು. ಆತಿಯಾದ ತೂಕದ ವ್ಯಕ್ತಿ ಮತ್ತೆ ಕ್ರಿಕೆಟ್ ಮೈದಾನಕ್ಕೆ ಮರಳಿ, ಅಂತಾರಾಷ್ಟ್ರೀಯ ಮಟ್ಟದ ಆಲ್‌ರೌಂಡರ್ ಆಗುವುದು ಯಾರಿಗಾದರೂ ಅಸಾಧ್ಯವೆಂದೇ ಎನಿಸುತ್ತಿತ್ತು. ಆದರೆ, ಅಲ್ಲಿ ತಂದೆಯ ನಂಬಿಕೆ ಮತ್ತು ಮಗನ ಪರಿಶ್ರಮ ಒಂದಾಯಿತು. ಮಗನ ತೂಕ ಇಳಿಸಲು ತಂದೆ ಮತ್ತೆ ಬೆನ್ನೆಲುಬಾಗಿ ನಿಂತರು. ಜಿಮ್, ಕಠಿಣ ತರಬೇತಿ ಮತ್ತು ಆಹಾರ ಪದ್ಧತಿಯಿಂದ ದುಬೆ ಮತ್ತೆ ಫಿಟ್ನೆಸ್ ಮರಳಿ ಪಡೆದರು.

ಇಂದು ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಅವಿಭಾಜ್ಯ ಅಂಗವಾಗಿರುವ ಮತ್ತು ಟೀಮ್ ಇಂಡಿಯಾದ ಭರವಸೆಯ ಆಟಗಾರನಾಗಿರುವ ಶಿವಂ ದುಬೆ ಅವರ ಒಂದೊಂದು ಸಿಕ್ಸರ್ ಹಿಂದೆಯೂ ಆ 21 ವರ್ಷಗಳ ಸಾಸಿವೆ ಎಣ್ಣೆಯ ಮಸಾಜ್ ಮತ್ತು ತಂದೆಯ ಬೆವರಿನ ಹನಿಯಿದೆ. ಬಡತನ ಮತ್ತು ದೈಹಿಕ ಸವಾಲುಗಳನ್ನು ಮೆಟ್ಟಿ ನಿಂತು ಬಂದ ಇವರ ಕಥೆ ಉದಯೋನ್ಮುಖ ಕ್ರೀಡಾಪಟುಗಳಿಗೆ ಮಾದರಿಯಾಗಿದೆ,(ಏಜೆನ್ಸೀಸ್).