ಆಪರೇಷನ್ ಸಿಂಧೂರ ಬಿಸಿ ಮುಟ್ಟಿಸಿದ ಜಾಗದಲ್ಲೇ ಮರ್ಕಜ್​ಗೆ ಮರುಜನ್ಮ: ಉಗ್ರರಿಗೆ ಕಚೇರಿ ಕಟ್ಟಿಕೊಟ್ತಾ ಪಾಕಿಸ್ತಾನ...? | JeM Markaz Reconstructed

ಪಾಕಿಸ್ತಾನದ ಪಂಜಾಬ್ ಪ್ರಾಂತ್ಯದಲ್ಲಿರುವ ಈ ಶಿಬಿರವನ್ನು ಹೊಸ ಮಾರ್ಬಲ್, ಹೊಸ ಪೇಂಟ್ ಮತ್ತು ಪ್ಲಾಸ್ಟರ್‌ನೊಂದಿಗೆ ನವೀಕರಿಸಲಾಗಿದ್ದು, ಧ್ವಂಸಗೊಂಡಿದ್ದ ಗುಮ್ಮಟಗಳನ್ನು ಮತ್ತೆ ನಿರ್ಮಿಸಲಾಗಿದೆ. ಕೇಂದ್ರ ಸಭಾಂಗಣದಲ್ಲಿದ್ದ ಬಾಂಬ್ ದಾಳಿಯ ಗುಂಡಿಗಳನ್ನು ಮುಚ್ಚಲಾಗಿದ್ದು, ಇಡೀ ಕಟ್ಟಡವನ್ನು ನವೀಕರಿಸುವ ಮೂಲಕ ಭಾರತದ ದಾಳಿಯಿಂದ ಉಂಟಾಗಿದ್ದ ಹಾನಿಯ ಗುರುತುಗಳನ್ನು ಸಂಪೂರ್ಣವಾಗಿ ಮರೆಮಾಚಲಾಗಿದೆ.

ಗುಪ್ತಚರ ಇಲಾಖೆಯ ಮಾಹಿತಿಯ ಪ್ರಕಾರ, ಈ ಶಿಬಿರದ ಪುನರ್​ನಿರ್ಮಾಣಕ್ಕಾಗಿ ಪಾಕಿಸ್ತಾನದ ಪ್ರಭಾವಿ ವರ್ಗವು ಜೈಶ್-ಎ-ಮೊಹಮ್ಮದ್ ಸಂಘಟನೆಗೆ ಹಂತ ಹಂತವಾಗಿ 25 ಕೋಟಿ ಪಾಕಿಸ್ತಾನಿ ರೂಪಾಯಿ ನಗದು ನೀಡಿದೆ. ಇದರಲ್ಲಿ ಕೇವಲ ಕೇಂದ್ರ ಸಭಾಂಗಣದ ಮರುನಿರ್ಮಾಣಕ್ಕಾಗಿಯೇ ಸುಮಾರು 11 ಕೋಟಿ ಪಾಕಿಸ್ತಾನಿ ರೂಪಾಯಿ ವೆಚ್ಚ ಮಾಡಲಾಗಿದೆ. ಪ್ರಮುಖ ಸಂಕೀರ್ಣಕ್ಕೆ ಹೊಂದಿಕೊಂಡಂತೆ ಹಾನಿಗೊಳಗಾಗಿದ್ದ ಮದರಸಾ ಅಲ್-ಸಾಬೀರ್ ಮತ್ತು ಜೈಶ್ ಕಮಾಂಡರ್‌ಗಳು ಬಳಸುತ್ತಿದ್ದ ವಸತಿ ಗೃಹಗಳನ್ನು ತೆರವುಗೊಳಿಸಲಾಗಿದ್ದು, ಆ ಸ್ಥಳದಲ್ಲಿ ಹೊಸ ನಿರ್ಮಾಣಗಳು ತಲೆಯೆತ್ತುತ್ತಿವೆ.

2025 ರ ಮೇ 7 ರಂದು ಭಾರತೀಯ ಸಶಸ್ತ್ರ ಪಡೆಗಳು ಪಾಕಿಸ್ತಾನ ಮತ್ತು ಪಾಕ್ ಆಕ್ರಮಿತ ಕಾಶ್ಮೀರದಲ್ಲಿ ಭಯೋತ್ಪಾದಕ ಮೂಲಸೌಕರ್ಯಗಳನ್ನು ಗುರಿಯಾಗಿಸಿಕೊಂಡು ನಡೆಸಿದ್ದ ಆಪರೇಷನ್ ಸಿಂಧೂರ ದಾಳಿಯ 15 ತಿಂಗಳ ನಂತರ ಈ ಮರುನಿರ್ಮಾಣ ಕಾರ್ಯ ನಡೆದಿದೆ. ಏಪ್ರಿಲ್ 22 ರಂದು ಪಹಲ್ಗಾಮ್‌ನಲ್ಲಿ ನಡೆದ ಭಯೋತ್ಪಾದಕ ದಾಳಿಯಲ್ಲಿ 26 ಜನರು ಸಾವನ್ನಪ್ಪಿದ ನಂತರ ಭಾರತ ಈ ಪ್ರತೀಕಾರದ ದಾಳಿ ನಡೆಸಿತ್ತು.

ಈ ವರ್ಷದ ಏಪ್ರಿಲ್‌ನಲ್ಲಿ ಇಂಡಿಯಾ ಟುಡೇ ಟಿವಿ ಪರಿಶೀಲಿಸಿದ ಉಪಗ್ರಹ ಚಿತ್ರಗಳಲ್ಲಿ ಕಾಂಪೌಂಡ್‌ನಲ್ಲಿ ಭಾರಿ ಯಂತ್ರಗಳು, ನಿರ್ಮಾಣ ವಾಹನಗಳು ಮತ್ತು ಹಾನಿಗೊಳಗಾದ ಗುಮ್ಮಟಗಳ ದುರಸ್ತಿ ಕಾರ್ಯಗಳು ಕಂಡುಬಂದಿದ್ದವು. ಅದಕ್ಕೆ ಹೋಲಿಸಿದರೆ ಪ್ರಸ್ತುತ ಹೊರಬಂದಿರುವ ನವೀಕರಣವು ಪ್ರಮುಖ ಬೆಳವಣಿಗೆಯಾಗಿದೆ.

ಮೇ ತಿಂಗಳಿನಲ್ಲಿ ಇಂಡಿಯಾ ಟುಡೇ ಟಿವಿ ಪರಿಶೀಲಿಸಿದ ಉನ್ನತ ರೆಸಲ್ಯೂಶನ್ ಉಪಗ್ರಹ ಚಿತ್ರಗಳು, ಹಾನಿಗೊಳಗಾದ ಗುಮ್ಮಟಗಳು ಕಡು ಬಣ್ಣದಲ್ಲಿ ಕಾಣಿಸುತ್ತಿರುವುದನ್ನು ತೋರಿಸಿದ್ದವು. ಇದು ಹೊಸ ಸಿಮೆಂಟ್ ಕೆಲಸವನ್ನು ಸೂಚಿಸಿತ್ತು ಮತ್ತು ತ್ಯಾಜ್ಯವನ್ನು ತೆರವುಗೊಳಿಸಲು ಭಾರಿ ಯಂತ್ರೋಪಕರಣಗಳನ್ನು ಬಳಸಲಾಗುತ್ತಿತ್ತು. ಆ ಸಮಯದಲ್ಲಿ ಜಿಯೋ-ಇಂಟೆಲಿಜೆನ್ಸ್ ಸಂಶೋಧಕರೊಬ್ಬರು, ಈ ಚಟುವಟಿಕೆಯು ಸೌಲಭ್ಯವನ್ನು ಮತ್ತೆ ಕಾರ್ಯನಿರ್ವಾಹಕ ಸ್ಥಿತಿಗೆ ತರುವ ಪ್ರಯತ್ನವಾಗಿದೆ ಎಂದು ತಿಳಿಸಿದ್ದರು.

ಇತ್ತೀಚಿನ ದೃಶ್ಯಗಳು, ಆ ಉಪಗ್ರಹ ಚಿತ್ರಗಳಲ್ಲಿ ದಾಖಲಾದ ಹಂತಕ್ಕಿಂತಲೂ ಹೆಚ್ಚು ನವೀಕರಣ ಕಾರ್ಯ ಮುನ್ನಡೆದಿರುವುದನ್ನು ತೋರಿಸುತ್ತವೆ. ಧ್ವಂಸಗೊಂಡಿದ್ದ ನಿರ್ಮಾಣಗಳನ್ನು ಸಂಪೂರ್ಣವಾಗಿ ನವೀಕರಿಸಲಾಗಿದ್ದು, ಕಾಂಪ್ಲೆಕ್ಸ್ ಮತ್ತೆ ಸಕ್ರಿಯಗೊಂಡಂತೆ ಕಾಣುತ್ತಿದೆ. ಜೈಶ್-ಎ-ಮೊಹಮ್ಮದ್ ನಿಷೇಧಿತ ಭಯೋತ್ಪಾದಕ ಸಂಘಟನೆಯಾಗಿದ್ದರೂ ಮತ್ತು ಸುಭಾನ್ ಅಲ್ಲಾ ಕಾಂಪೌಂಡ್‌ನ ಭಾಗಗಳನ್ನು ಪುನರ್ನಿರ್ಮಿಸಲು ಈ ಗುಂಪಿಗೆ ಸಂಬಂಧಿಸಿದ ನಿಧಿ ಸಂಗ್ರಹಣೆಯ ಪ್ರಯತ್ನಗಳ ವರದಿಗಳ ಹೊರತಾಗಿಯೂ ಈ ಮರುನಿರ್ಮಾಣ ಕಾರ್ಯ ನಡೆದಿದೆ.

ಅಂತರರಾಷ್ಟ್ರೀಯ ಗಡಿಯಿಂದ ಸುಮಾರು 100 ಕಿ.ಮೀ ದೂರದಲ್ಲಿರುವ ಮರ್ಕಜ್ ಸುಭಾನ್ ಅಲ್ಲಾ, ಜೈಶ್-ಎ-ಮೊಹಮ್ಮದ್‌ನ ಪ್ರಮುಖ ಕೇಂದ್ರವಾಗಿದ್ದು, ಉಗ್ರರ ನೇಮಕಾತಿ, ತರಬೇತಿ ಮತ್ತು ಬ್ರೈನ್ ವಾಶ್ ಮಾಡಲು ಬಳಕೆಯಾಗುತ್ತಿತ್ತು. ಉಸ್ಮಾನ್-ಒ-ಅಲಿ ಕ್ಯಾಂಪಸ್ ಎಂದೂ ಕರೆಯಲ್ಪಡುವ ಈ 18 ಎಕರೆ ಸಂಕೀರ್ಣದಲ್ಲಿ ಮಸೀದಿ ಮತ್ತು ಇತರ ಸೌಲಭ್ಯಗಳಿದ್ದವು.

ಬಹಾವಲ್ಪುರ ಶಿಬಿರವು ಭಾರತದ ವಿರುದ್ಧದ ಜೈಶ್ ಉಗ್ರರ ಚಟುವಟಿಕೆಗಳೊಂದಿಗೆ ಸುದೀರ್ಘ ನಂಟು ಹೊಂದಿದೆ. ಈ ಭಯೋತ್ಪಾದಕ ಗುಂಪು 2001 ರ ಸಂಸತ್ ದಾಳಿ, 2016 ರ ಪಠಾನ್‌ಕೋಟ್ ವಾಯುಪಡೆ ನೆಲೆಯ ಮೇಲಿನ ದಾಳಿ ಮತ್ತು 2019 ರ ಪುಲ್ವಾಮಾ ಆತ್ಮಹುತಿ ಬಾಂಬ್ ದಾಳಿ ಸೇರಿದಂತೆ ಹಲವಾರು ಪ್ರಮುಖ ದಾಳಿಗಳಿಗೆ ಕಾರಣವಾಗಿದೆ. ಪುಲ್ವಾಮಾ ದಾಳಿಯ ಯೋಜನೆಯನ್ನು ಸಹ ಇದೇ ಸುಭಾನ್ ಅಲ್ಲಾ ಶಿಬಿರದಲ್ಲಿ ರೂಪಿಸಲಾಗಿತ್ತು ಎಂಬ ಮಾತುಗಳ ಸಹ ಚಾಲ್ತಿಯಲ್ಲಿವೆ.

ಕಳೆದ ಮೇ 7 ರಂದು ಈ ಸೌಲಭ್ಯದ ಮೇಲೆ ಭಾರತ ನಡೆಸಿದ ದಾಳಿಯಲ್ಲಿ ಜೈಶ್ ಸಂಸ್ಥಾಪಕ ಮಸೂದ್ ಅಜರ್‌ನ ಸಂಬಂಧಿಕರು ಕೊಲ್ಲಲ್ಪಟ್ಟಿದ್ದರು. ದಾಳಿಯಲ್ಲಿ ಹತ್ಯೆಯಾದ 13 ಜನರಲ್ಲಿ ಅಜರ್‌ನ 10 ಮಂದಿ ಸಂಬಂಧಿಕರು ಸೇರಿದ್ದಾರೆ ಎಂದು ಸ್ವತಃ ಆ ಉಗ್ರ ಸಂಘಟನೆಯೇ ಹೇಳಿಕೊಂಡಿತ್ತು. ವಿಶೇಷವೆಂದರೆ, ಈ ಭಯೋತ್ಪಾದಕ ನೆಲೆ ಲಾಹೋರ್‌ನಿಂದ ನೈಋತ್ಯಕ್ಕೆ ಸುಮಾರು 400 ಕಿ.ಮೀ ದೂರದಲ್ಲಿದೆ ಮತ್ತು ಪಾಕಿಸ್ತಾನ ಸೇನೆಯ 31 ಕಾರ್ಪ್ಸ್ ಪ್ರಧಾನ ಕಚೇರಿಯನ್ನು ಹೊಂದಿರುವ ಪಾಕಿಸ್ತಾನ ಸೇನಾ ಕಂಟೋನ್ಮೆಂಟ್‌ನ ತೀರಾ ಹತ್ತಿರದಲ್ಲಿದೆ.

ಜೈಶ್-ಎ-ಮೊಹಮ್ಮದ್ ಅನ್ನು ಪಾಕಿಸ್ತಾನವು 2002 ರಲ್ಲಿ ನಿಷೇಧಿಸಿತ್ತು, ಆದರೆ ಈ ಗುಂಪು ಆ ದೇಶದಿಂದ ತನ್ನ ಕಾರ್ಯಾಚರಣೆಯನ್ನು ಮುಂದುವರಿಸಿದೆ. ಅಜರ್ ಮತ್ತು ಇತರ ಹಿರಿಯ ಜೈಶ್ ನಾಯಕರು ಸರ್ಕಾರಿ ರಕ್ಷಣೆಯಲ್ಲಿ ಪಾಕಿಸ್ತಾನದಲ್ಲೇ ಮುಂದುವರಿದಿದ್ದಾರೆ(ಏಜೆನ್ಸೀಸ್).