ಪ್ರಧಾನಿ ಮೋದಿ ಭಾಷಣದ 'ಆ' ಒಂದು ಗ್ಲಾಸ್ ಕಥೆ!...ದೇಶದ ಅಭಿವೃದ್ಧಿ ಪಯಣವನ್ನು ಕಣ್ಣಿಗೆ ಕಟ್ಟುವಂತೆ ವಿವರಿಸಿದ ನಮೋ | PM Modi In SRCC

2013ರಲ್ಲಿ ಮೋದಿ ನೀಡಿದ ಭಾಷಣದಲ್ಲಿ ಬಳಸಿದ್ದ ನೀರಿನ ಲೋಟದ ರೂಪಕ ಅತ್ಯಂತ ಪ್ರಸಿದ್ಧವಾದುದು. ಲೋಟ ಅರ್ಧ ಖಾಲಿ ಅಥವಾ ಅರ್ಧ ತುಂಬಿದೆ ಎನ್ನುವ ಸಾಂಪ್ರದಾಯಿಕ ಆಲೋಚನೆಗೆ ಭಿನ್ನವಾಗಿ, ಲೋಟದಲ್ಲಿ ಅರ್ಧ ನೀರಿದ್ದರೆ ಇನ್ನುಳಿದ ಅರ್ಧ ಗಾಳಿಯಿಂದ ತುಂಬಿದೆ ಎಂಬ ಸಕಾರಾತ್ಮಕ ನೋಟವನ್ನು ಅವರು ನೀಡಿದ್ದರು. ಆಗಿನ ಭಾರತವು ನೀತಿ ನಿಷ್ಕ್ರಿಯತೆ (Policy Paralysis), ಸಾಲು ಸಾಲು ಹಗರಣಗಳು ಮತ್ತು ಫ್ರಾಗೈಲ್ ಫೈವ್ (ಆರ್ಥಿಕವಾಗಿ ದುರ್ಬಲ ಐದು ದೇಶಗಳು) ಎಂಬ ಹೂಡಿಕೆದಾರರ ಕಳಪೆ ಪಟ್ಟಿಗೆ ಸೇರಿ ನಿರಾಶೆಯಲ್ಲಿ ಮುಳುಗಿತ್ತು. ಆದರೆ, 2026ರಲ್ಲಿ ಅದೇ ವೇದಿಕೆಗೆ ಮರಳಿದಾಗ, ಆ ಲೋಟ'ವನ್ನು ಕೇವಲ ಸಿದ್ಧಾಂತದಿಂದಲ್ಲ, ಬದಲಿಗೆ ಸಾಧನೆಗಳಿಂದ ಭರ್ತಿ ಮಾಡಲಾಗಿದೆ ಎಂಬುದನ್ನು ಸಾಬೀತುಪಡಿಸಿದರು.

ಕಲ್ಪನೆಯಿಂದ ಅಂಕಿಅಂಶಗಳ ಕಡೆಗೆ ಜಿಗಿತ: 2013ರಲ್ಲಿ ಮೋದಿ ಹಂಚಿಕೊಂಡಿದ್ದು ಕೇವಲ ಕಲ್ಪನೆ ಮತ್ತು ಆಶೋತ್ತರಗಳನ್ನು ಮಾತ್ರ. ಆದರೆ, ಈ ಬಾರಿ ಅವರ ಬಳಿ ಬಲವಾದ ಅಂಕಿಅಂಶಗಳಿದ್ದವು. ಜಾಗತಿಕ ಮಟ್ಟದಲ್ಲಿ ಯುದ್ಧ ಮತ್ತು ವಾಣಿಜ್ಯ ಬಿಕ್ಕಟ್ಟುಗಳು ಎದುರಾಗಿದ್ದರೂ ಭಾರತವು 7.8% ತ್ರೈಮಾಸಿಕ ಜಿಡಿಪಿ ಪ್ರಗತಿ ಸಾಧಿಸಿರುವುದನ್ನು ಪ್ರಸ್ತಾಪಿಸಿದರು.

ಉತ್ಪಾದನೆ ಮತ್ತು ರಕ್ಷಣೆ: 2013ರಲ್ಲಿ ಮೇಡ್ ಇನ್ ಇಂಡಿಯಾ ಎನ್ನುವುದು ಬರಿ ಕನಸಾಗಿತ್ತು. ಆದರೆ ಇಂದು ಸ್ಮಾರ್ಟ್‌ಫೋನ್ ರಫ್ತು 2.5 ಲಕ್ಷ ಕೋಟಿ ರೂ. ಗಡಿ ದಾಟಿದೆ. ರಕ್ಷಣಾ ಕ್ಷೇತ್ರದಲ್ಲಿ ಭಾರತೀಯ ಉತ್ಪಾದನೆ 2 ಲಕ್ಷ ಕೋಟಿ ರೂ.ಗೆ ತಲುಪಿದ್ದು, ರಫ್ತು ಮೊತ್ತ 40,000 ಕೋಟಿ ರೂ.ಗೆ ಏರಿಕೆಯಾಗಿದೆ. ಇದು ಆಮದು ಮಾಡಿಕೊಳ್ಳುತ್ತಿದ್ದ ದೇಶವೊಂದು ಸ್ವಾವಲಂಬಿಯಾಗಿ ಬೆಳೆದ ಪರಿ.

2013ರಲ್ಲಿ ಭಾರತದ ಯುವಜನತೆಯನ್ನು ಜಗತ್ತು ಕಂಪ್ಯೂಟರ್ ಮೌಸ್ ನಿಯಂತ್ರಿಸುವವರು ಎಂದು ನೋಡುತ್ತಿದ್ದ ದಿನಗಳಿಂದ ಹಿಡಿದು, ಇಂದು ಸ್ಟಾರ್ಟ್‌ಅಪ್‌ಗಳು, ಯೂನಿಕಾರ್ನ್‌ಗಳು, ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ ಮತ್ತು ಬಾಹ್ಯಾಕಾಶ ತಂತ್ರಜ್ಞಾನ ಕ್ಷೇತ್ರದಲ್ಲಿ ಜಾಗತಿಕ ನಾಯಕರಾಗಿ ಬೆಳೆದಿರುವುದು. ಯುವ ಸಮುದಾಯವು ಈಗ ಕೇವಲ ಉದ್ಯೋಗ ಹುಡುಕುವವರಲ್ಲ, ಬದಲಿಗೆ ಉದ್ಯೋಗ ನೀಡುವ ನಾಯಕರಾಗಿ ಬದಲಾಗಿದ್ದಾರೆ ಎಂದು ಪ್ರಧಾನಿ ಮೋದಿ ವಿವರಿಸಿದರು.

ತಮ್ಮ ಭಾಷಣದಲ್ಲಿ ನಾರಾಜ್ ಫೂಫಾ (ಸದಾ ಅಸಮಾಧಾನಗೊಳ್ಳುವ ಕೌಟುಂಬಿಕ ಸಂಬಂಧಿಕರು) ಎಂಬ ಹಾಸ್ಯಮಯ ಉದಾಹರಣೆ ನೀಡಿದ ಪ್ರಧಾನಿ, ದೇಶದಲ್ಲಿ ಏನೇ ಹೊಸ ಬೃಹತ್ ಯೋಜನೆ ತಂದರೂ ಇದರ ಅಗತ್ಯವೇನಿತ್ತು..? ಎಂದು ಪ್ರಶ್ನಿಸುವ ಸದಾ ನಕಾರಾತ್ಮಕ ಮನಸ್ಥಿತಿಯ ವಿಮರ್ಶಕರನ್ನು ಟೀಕಿಸಿದರು. ಒಟ್ಟಾರೆಯಾಗಿ, 2013ರ ಎಸ್‌ಆರ್‌ಸಿಸಿ ಭಾಷಣವು ದೇಶದ ಯುವಜನರಲ್ಲಿ ನಂಬಿಕೆಯನ್ನು ಬಿತ್ತುವ ಪ್ರಯತ್ನವಾಗಿದ್ದರೆ, 2026ರ ಭಾಷಣವು ಆ ನಂಬಿಕೆಗಳನ್ನು ಸಾಧನೆಯಾಗಿ ತೋರಿಸುವ ಸಾಕ್ಷಿಯಾಗಿದೆ. ರಾಜಕೀಯ ವಾಕ್ಚಾತುರ್ಯವನ್ನು ಮೀರಿ, ಭಾರತವು ಆಶೋತ್ತರಗಳ ಮಟ್ಟದಿಂದ ಅಂಕಿಅಂಶಗಳ ಶಕ್ತಿಯತ್ತ ಹೇಗೆ ಸಾಗಿದೆ ಎಂಬುದಕ್ಕೆ ಈ ರಿಪೋರ್ಟ್​ ಕಾರ್ಡ್ ಸ್ಪಷ್ಟ ಕನ್ನಡಿಯಾಗಿದೆ(ಏಜೆನ್ಸೀಸ್​).