ಭಾರತದ ಪ್ರವಾಸಿ ತಾಣಗಳಲ್ಲಿನ ಅಶುಚಿತ್ವದ ಬಗ್ಗೆ ಕಳವಳ ವ್ಯಕ್ತಪಡಿಸಿದ ವಿದೇಶಿಗ! ಅಸಲಿಗೆ ಆತ ಹೇಳಿದ್ದೇನು? Tourist place

ಆದರೆ, ಕೇರಳದಲ್ಲಿ ಪ್ರವಾಸ ಮಾಡುತ್ತಿರುವ ವಿದೇಶಿ ಪ್ರವಾಸಿಗರೊಬ್ಬರು ಇತ್ತೀಚೆಗೆ ತಮ್ಮ ಸಾಮಾಜಿಕ ಮಾಧ್ಯಮ ವೇದಿಕೆಯಲ್ಲಿ ಪೋಸ್ಟ್ ಮಾಡಿದ ವ್ಲಾಗ್​ವೊಂದರಲ್ಲಿ ಪ್ರವಾಸಿ ತಾಣಗಳಲ್ಲಿ ಕಸಗಳ ರಾಶಿಯನ್ನು ಕಂಡು ಇಲ್ಲಿನ ನೈರ್ಮಲ್ಯದ ಬಗ್ಗೆ ಅಭಿಪ್ರಾಯ ವ್ಯಕ್ತಪಡಿಸಿ ವಿಡಿಯೋವನ್ನು ಹರಿಬಿಟ್ಟಿದ್ದಾರೆ.

ಈ ವ್ಲಾಗ್​ನಲ್ಲಿ ಭೂಮಿಯ ಮೇಲಿನ ಮನುಷ್ಯರೇ, ನೀವು ಯಾಕೆ ಹೀಗೆ ಇದ್ದೀರಿ? ನಾನು ಕೇರಳವನ್ನು ಇತರ ಮನುಷ್ಯನಷ್ಟೇ ಪ್ರೀತಿಸುತ್ತೇನೆ, ಆದರೆ ವರ್ಕಲಾದಲ್ಲಿ ಬಹಳ ಕೆಟ್ಟ ದೃಶ್ಯವನ್ನು ನಾನು ನೋಡಿದೆ. ನಾನು ಇಲ್ಲಿ ಬಂಡೆಗಳ ಅಂಚಿನಲ್ಲಿ ನಿಂತಿದ್ದೇನೆ. ಈ ಸ್ಥಳ ಎಷ್ಟು ಸುಂದರವಾಗಿದೆಯೋ ಅಷ್ಟೇ ಕಸದ ರಾಶಿಯಿಂದ ತುಂಬಿ ಸಂಪೂರ್ಣವಾಗಿ ಹಾಳಾಗಿದೆ ಎಂದು ಹೇಳಿದ್ದಾರೆ.

ಈ ಪ್ರವಾಸಿಗ ಅದ್ಭುತವಾದ ಬಂಡೆಯ ಪಕ್ಕದ ಸುತ್ತಮುತ್ತಲಿನ ಪ್ರದೇಶಗಳನ್ನು ತೋರಿಸುತ್ತಿದ್ದಂತೆಯೇ, ಎಲ್ಲೆಡೆ ಬಿದ್ದಂತಹ ಕಸದ ರಾಶಿಯನ್ನು ತೋರಿಸಿದ್ದಾನೆ. ಈ ಪ್ರದೇಶದಲ್ಲಿ ಸಿಹಿ ಹೊದಿಕೆಗಳು, ಬಾಟಲ್ ಕ್ಯಾಪ್‌ಗಳು, ಚಾಕೊಲೇಟ್ ಪೇಪರ್​ಗಳು, ಪ್ಲಾಸ್ಟಿಕ್ ಬಾಟಲಿಗಳು, ಬಿಯರ್ ಬಾಟಲಿಗಳು, ಫ್ಲಿಪ್-ಫ್ಲಾಪ್‌ಗಳು, ಪ್ಯಾಂಪರ್ಸ್​ಗಳ ರಾಶಿಯೇ ಬಿದ್ದಿದೆ. ಇದನ್ನು ನೋಡಿದಾಗ ಪ್ರದೇಶಗಳು ಎಷ್ಟರ ಮಟ್ಟಿಗೆ ಹಾಳಾಗಿವೆ ಎಂದು ತಿಳಿಯಬಹುದು ಎಂದು ಹೇಳಿದ್ದಾರೆ.

ಪ್ರವಾಸಿ ತಾಣದ ಆವರಣದಲ್ಲಿ ಕಸ ಹಾಕುವ ಮೊದಲು ಒಂದು ಬಾರಿ ಯೋಚಿಸಬೇಕು ಎಂದು ವ್ಲಾಗರ್​ ವಿಡಿಯೋದಲ್ಲಿ ತಿಳಿಸಿದ್ದಾನೆ. ಅದರಂತೆ ಮುಂದಿನ ಬಾರಿ ಯಾವುದೇ ವ್ಯಕ್ತಿಯು ಪ್ರವಾಸಿ ತಾಣಗಳಲ್ಲಿ ಕಸವನ್ನು ಎಸೆಯುವಕ್ಕಿಂತ ಮೊದಲು ಎರಡು ಬಾರಿ ಯೋಚಿಸುವಂತೆ ತಿಳಿಸಿದ್ದಾನೆ.

ಈ ವೀಡಿಯೊ ಭಾರತದಲ್ಲಿ ಪ್ರವಾಸಿಗರ ಅಶುಚಿತ್ವ ಮತ್ತು ನಾಗರಿಕ ಪ್ರಜ್ಞೆಯ ಬಗ್ಗೆ ಮತ್ತೊಮ್ಮೆ ಕಳವಳ ವ್ಯಕ್ತಪಡಿಸಿದೆ. ಜನರು ಪ್ರವಾಸಿ ತಾಣಗಳನ್ನು ಸ್ವಚ್ಛವಾಗಿ ಇಟ್ಟುಕೊಂಡರೆ ಪ್ರವಾಸೋದ್ಯಮಕ್ಕೆ ಆರ್ಥಿಕತೆಯಲ್ಲಿ ದೊಡ್ಡ ಪ್ರಯೋಜನವಾಗುತ್ತದೆ ಎಂದು ಬರೆದಿದ್ದಾರೆ.

ಈ ಪೋಸ್ಟ್​ ವೈರಲ್​ ಆದ ಹಿನ್ನಲೆ ಹಲವಾರು ಬಳಕೆದಾರರು ಕಮೆಂಟ್​ ಮಾಡಿದ್ದಾರೆ. ನೀವು ಈ ವಿಡಿಯೋ ಹಂಚಿಕೊಂಡಿದ್ದಕ್ಕೆ ಸಂತೋಷವಾಗಿದೆ. ನಾವು ಸ್ವಚ್ಛವಾಗಿಟ್ಟುಕೊಳ್ಳುವ ಅನೇಕ ಸ್ಥಳಗಳಿವೆ. ನಾವು ಸ್ವಚ್ಛತೆಯ ಬಗ್ಗೆ ಬೇಗನೆ ಕಲಿಯುತ್ತೇವೆ ಎಂದು ನಾನು ಭಾವಿಸುತ್ತೇನೆ ಎಂದು ಒಬ್ಬ ಬಳಕೆದಾರ ಕಮೆಂಟ್​ ಮಾಡಿದ್ದಾರೆ (ಏಜೆನ್ಸೀಸ್​).