ಜಾಗತಿಕ ರಾಮಾಯಣ: ಸೋನಿ ಪಿಕ್ಚರ್ ಎಂಟರ್‌ಟೈನ್‌ಮೆಂಟ್ ಜತೆ ಒಪ್ಪಂದ ಮಾಡಿಕೊಂಡ ನಮಿತ್ ಮಲ್ಹೋತ್ರಾ

ಶುಕ್ರವಾರ ‘ರಾಮಾಯಣ’ ಟ್ರೇಲರ್ ರಿಲೀಸ್ ಆಗಲಿದೆ ಎಂದು ಚಾತಕಪಕ್ಷಿಯಂತೆ ಕಾದುಕುಳಿತಿದ್ದ ಅಭಿಮಾನಿಗಳಿಗೆ ಮುಂದೂಡಿರುವ ನಿರ್ಧಾರ ನಿರಾಸೆ ಮೂಡಿಸಿದೆ. ಹಾಗೆಯೇ, ಭಾರತೀಯ ಸಂಸ್ಕೃತಿ ಸಾರುವ ಪೌರಾಣಿಕ ಚಿತ್ರವೊಂದು ಜಾಗತಿಕ ಮಟ್ಟದಲ್ಲಿ ಮೂಡಿಬರುವುದಕ್ಕೆ ಹೆಮ್ಮೆಯನ್ನು ವ್ಯಕ್ತಪಡಿಸುತ್ತಿದ್ದಾರೆ.

‘ರಾಮಾಯಣ’ ಚಿತ್ರತಂಡವು ಅಮೆರಿಕಾದ ಸ್ಯಾನ್ ಡಿಯಾಗೋದಲ್ಲಿ ಆಯೋಜಿಸಿರುವ ಅಂತಾರಾಷ್ಟ್ರೀಯ ‘ಕಾಮಿಕ್-ಕಾನ್’ನಲ್ಲಿ ಭಾಗವಹಿಸಿದೆ. ನಟ ಯಶ್, ‘ಯಾವುದೇ ಕಾರ್ಯ ಆರಂಭಿಸಲು ಸರಿಯಾದ ಉದ್ದೇಶ ಮತ್ತು ತಂಡ ಅಗತ್ಯ. ಈ ಎರಡು ಸರಿಯಾಗಿದ್ದರೆ ನಮ್ಮ ಕೆಲಸ ಸುಲಭವಾಗುತ್ತದೆ. ಅಂತಹ ತಂಡವನ್ನು ‘ರಾಮಾಯಣ’ ಹೊಂದಿದೆ. ಈ ಕಥೆಯು ಜೀವನದ ಹಲವಾರು ಆಯಾಮಗಳನ್ನು ಒಳಗೊಂಡಿದೆ. ತಾಂತ್ರಿಕತೆಯಿಂದ ಹಿಡಿದು ಮೇಕಪ್‌ವರೆಗೆ ಸವಾಲಿನಿಂದ ಕೂಡಿದೆ. ಆದರೆ, ಅಂತಿಮವಾಗಿ ನಾವು ಎಷ್ಟರ ಮಟ್ಟಿಗೆ ನೈಜವಾಗಿ ಚಿತ್ರಿಸಿದ್ದೇವೆ ಎಂಬುದು ಮುಖ್ಯವಾಗುತ್ತದೆ. ಆ ನೈಜತೆ ‘ರಾಮಾಯಣ’ದಲ್ಲಿದೆ. ರಣಬೀರ್ ಕಪೂರ್ ‘ರಾಮ’ನ ಪಾತ್ರವನ್ನು ಅದ್ಭುತವಾಗಿ ನಿರ್ವಹಿಸಿದ್ದಾರೆ. ನೀವು ಸಿನಿಮಾ ನೋಡಿದಾಗ ಅವರ ಪರಿಶ್ರಮ ಕಾಣಬಹುದು’ ಎಂದು ಕೊಂಡಾಡಿದ್ದಾರೆ.