ಮುಂಬೈ: ಭಾರತದಲ್ಲಿಮ ಸಾರ್ವಜನಿಕ ರಸ್ತೆಗಳು, ನಿಲ್ದಾಣಗಳಲ್ಲಿ ಪಾನ್, ಗುಟ್ಕಾ, ಬಾಯಿ ಮುಕ್ಕಳಿಸಿದ ನೀರು, ಎಂಜಲು ಉಗಿಯುವುದು ಕಂಡು ಬರುತ್ತದೆ. ಈ ಸಮಸ್ಯೆ ಮೆಟ್ರೋಗೂ ತಪ್ಪಿಲ್ಲ. ಹೀಗಾಗಿ ಮುಂಬೈ ಮೆಟ್ರೋ ರೈಲು ನಿಗಮವು ಹೊಸ ಪ್ಲ್ಯಾನ್ ಅನ್ನು ಜಾರಿ ಮಾಡಿದೆ.
ಸ್ಪಿಟ್ ಬಿನ್ ಅಳವಡಿಕೆ
ಹೌದು, ಮುಂಬೈ ಮೆಟ್ರೋ ನಿಲ್ದಾಣವೊಂದರಲ್ಲಿ ಅಲ್ಲಲ್ಲಿ ಉಗುಳುವುದನ್ನು ತಪ್ಪಿಸಲು, Spit Bin ಅನ್ನು ತಂದಿಡಲಾಗಿದೆ. ಭಾರತೀಯರು ಅಲ್ಲಲ್ಲಿ ಉಗುಳುವುದನ್ನು ತಡೆಯಲು ಯಾರಿಂದಲೂ ಸಾಧ್ಯವಾಗೋದಿಲ್ಲ ಎನ್ನುವುದನ್ನು ಮುಂಬೈ ಮಹಾನಗರ ಪ್ರದೇಶ ಅಭಿವೃದ್ಧಿ ಪ್ರಾಧಿಕಾರ (MMRDA) ಅರ್ಥ ಮಾಡಿಕೊಂಡು ಈ ಹೊಸ ಪ್ರಯತ್ನವನ್ನು ಜಾರಿ ಮಾಡಿದೆ ಎಂದು ನೆಟ್ಟಿಗರು ಲೇವಡಿ ಮಾಡಿದ್ದಾರೆ. ಇನ್ನೂ ಕೆಲವರು ಉಗಿಯಲು ಮತ್ತಷ್ಟು ಉತ್ತೇಜನ ಕೊಡುತ್ತಿರುವ ಪ್ರಯತ್ನವಾಗಿದೆ ಎಂದು ಕಿಡಿಕಾರಿದ್ದಾರೆ.
ಝೋರು ಬತೇನಾ ಎಂಬುವವರು ಎಕ್ಸ್ನಲ್ಲಿ, 'ನಮ್ಮ ಮುಂಬೈ ಮೆಟ್ರೋ, ಈಗ ಮೀಸಲು ಉಗುಳುವ ವಲಯಗಳೊಂದಿಗೆ' ಎಂಬ ಶೀರ್ಷಿಕೆಯೊಂದಿಗೆ ಸ್ಪರ್ಶರಹಿತ ಸ್ಪಿಟ್ ಬಿನ್ ಇರುವ ಫೋಟೋ ಹಂಚಿಕೊಂಡಿದ್ದಾರೆ. ಫೋಟೋದಲ್ಲಿ ಉಗುಳಲು ವಿಶ್ವದ ಮೊದಲ ನಿರ್ದಿಷ್ಟ ಸ್ಥಳ ಎಂದು ಬರೆಯಲಾಗಿದೆ. ಜೊತೆಗೆ ಅದನ್ನು ಬಳಕೆ ಮಾಡುವ ಬಗ್ಗೆ ಮರಾಠಿ ಹಾಗೂ ಇಂಗ್ಲಿಷ್ನಲ್ಲಿ ವಿವರಿಸಲಾಗಿದೆ. ಸಾರ್ವಜನಿಕವಾಗಿ ಉಗುಳುವ ಸಮಸ್ಯೆಯನ್ನು ಎದುರಿಸಲು ‘ಎಝಿಸ್ಪಿಟ್’ ಎಂಬ ಕಂಪನಿ ಸ್ಪರ್ಶ ರಹಿತ ಉಗುಳುವ ಈ ಯಂತ್ರವನ್ನು ಆವಿಷ್ಕಾರ ಮಾಡಿದೆ.
