ಮಗುವಿನ ಗಮನ ಸೆಳೆಯಲು ಸರ್ವಪ್ರಯತ್ನಗಳೂ ಸಾಗುವುವು: ಏನಾದರೊಂದು ಸದ್ದು ಮಾಡು, ಕಣ್ಣ ಮುಂದೆ ಏನನ್ನಾದರೂ ಅತ್ತಿತ್ತ ಆಡಿಸು; ಚಪ್ಪಾಳೆಯೋ, ಚಿಟಿಕೆಯೋ, ಬಣ್ಣ ಬಣ್ಣದ ಗಿಲಕಿಯೋ - ಅಂತೂ ಶಿಶುವಿನ ಕಣ್ಣು-ಕಿವಿಗಳಿಗೆ ತಲುಪುವ ರೂಪ-ಶಬ್ದಗಳನ್ನು ಮುಂದಿಡು! ಮಗುವಿನ ಆಗಾಗಿನ ಮುಗುಳ್ನಗೆಯೆಂಬುದು ನಿಷ್ಕಾರಣವೆಂಬಂತೆ ಕಂಡರೂ, ಅದು ವಾಸ್ತವವಾಗಿ, ಶ್ರೀರಂಗಮಹಾ ಗುರುಗಳು ತಿಳಿಸಿರುವಂತೆ, ಅಂತರಂಗದಲ್ಲಿ ಗೋಚರಿಸುವ ಒಳಬೆಳಕಿನಲ್ಲಿ ತಾನೇ ತಾನಾಗಿ ಶಿಶುವು ನಲಿಯುವುದರ ಸೂಚಕ; ಅದಕ್ಕೆ ಸದ್ದು- ನೋಟಗಳ ಹೊರಗಣ ಆಕರ್ಷಣೆಗಳನ್ನು ಒಡ್ಡುತ್ತಿರುವುದು ನಾವು. ಬಹಿಮುಖತೆಯನ್ನು ಬರಿಸುತ್ತಿರುವುದು ನಾವು, ಅಷ್ಟೇ. ಆಮೇಲಾಮೇಲೇ, ‘ನನ್ನನ್ನು ನೋಡಿಯೇ ಮಗು ನಕ್ಕದ್ದು’ ಎಂದು ಹೇಳಿಕೊಳ್ಳುವುದರಲ್ಲಿಯೇ ಧನ್ಯತೆಯೆಂಬುದು ತಂದೆತಾಯಿಗಳಲ್ಲಿ ಶುರುವಾಗುವುದು.
