ಅಮ್ಮ ಮಗಳ ಕಾರ್ಡ್​ಬೋರ್ಡ್ ಕಾರು

ನವದೆಹಲಿ: ಇತ್ತೀಚೆಗೆ ಕೋವಿಡ್-19 ಸೋಂಕಿನ ಹಿನ್ನೆಲೆಯಲ್ಲಿ ವ್ಯಾಪಾರ ವಹಿವಾಟು ಕ್ಷೇತ್ರದಲ್ಲಿ ವಿವಿಧ ನಿಯಮಗಳು ಜಾರಿಗೆ ಬಂದಿವೆ. ಡ್ರೈವ್ ಥ್ರೂ ಗ್ರಾಹಕರಿಗೆ ಮಾತ್ರ ಸೇವೆ ನೀಡುವುದಾಗಿ ಮೆಕ್​ಡೊನಾಲ್ಡ್ ಬೆಲ್ಜಿಯಂನಲ್ಲಿ ಘೊಷಿಸಿತ್ತು. ಆದರೆ ಕಾರು ಇಲ್ಲದವರು ಮೆಕ್​ಡೊನಾಲ್ಡ್ ಸೇವೆ ಪಡೆಯುವುದು ಹೇಗೆ?

ಈ ಬಗ್ಗೆ ಯೋಚಿಸಿದ ಕಾರು ಹೊಂದಿಲ್ಲದ ಅಮ್ಮ -ಮಗಳು ಕಾರ್ಡ್​ಬೋರ್ಡ್​ನ ಕಾರನ್ನು ತಯಾರಿಸಿಕೊಂಡು ರಸ್ತೆಗಿಳಿದು ಆಶ್ಚರ್ಯ ಹುಟ್ಟಿಸಿದ್ದಾರೆ. ‘ನನ್ನ ಮಗಳು ಮೆಕ್​ಡೊನಾಲ್ಡ್​ಗೆ ಹೋಗಲು ಬಯಸಿದ್ದಳು. ಆದರೆ ನಮ್ಮಲ್ಲಿ ಕಾರು ಇಲ್ಲ, ಬೇರೆಯವರ ಕಾರಿನಲ್ಲಿ ಹೋಗಲು ಸಾಧ್ಯವಿರಲಿಲ್ಲ. ಹೀಗಾಗಿ ನಾವು ರಟ್ಟಿನಿಂದ ಮಾಡಿದ ಕಾರಿನಲ್ಲಿ ಹೋಗಬೇಕಾಯಿತು’ ಎಂದು ತಾಯಿ ಹೇಳಿಕೊಂಡಿದ್ದಾರೆ.

‘ಆರಂಭದಲ್ಲಿ ನನ್ನ ಮಗಳು ಈ ಆಲೋಚನೆಯ ಬಗ್ಗೆ ಹಾಸ್ಯ ಮಾಡಿದಳು, ನಂತರ ಸಹಾಯ ಮಾಡತೊಡಗಿದಳು’ ಎಂದಿದ್ದಾರೆ. ಅವರು ರಟ್ಟಿನ ಕಾರಿನಲ್ಲಿರುವ ಫೋಟೋ ಜಾಲತಾಣಗಳಲ್ಲಿ ವೈರಲ್ ಆಗಿದೆ.