ಮೊಳಕಾಲ್ಮೂರು: ಪಟ್ಟಣದ ಶುದ್ಧ ಕುಡಿಯುವ ನೀರು (RO) ಘಟಕಗಳ ನಿರ್ವಹಣೆಯಿಂದ ಪಟ್ಟಣ ಪಂಚಾಯಿತಿಗೆ (ಪಪಂ) ವಾರ್ಷಿಕ ₹1.70 ಲಕ್ಷ ನಷ್ಟವಾಗುತ್ತಿದ್ದು, ಈ ಕುರಿತು ಕೂಡಲೇ ಮರು ಟೆಂಡರ್ ಪ್ರಕ್ರಿಯೆ ನಡೆಸಬೇಕೆಂದು ಪಪಂ ಉಪಾಧ್ಯಕ್ಷ ಕೆ. ತಿಪ್ಪೇಸ್ವಾಮಿ ಹಾಗೂ ಸದಸ್ಯ ಅಬ್ದುಲ್ಲಾ ಸೇರಿದಂತೆ ಸರ್ವ ಸದಸ್ಯರು ಮುಖ್ಯಾಧಿಕಾರಿಗೆ ಒತ್ತಾಯಿಸಿದರು.
ಪಪಂ ಅಧ್ಯಕ್ಷೆ ಲೀಲಾವತಿ ಸಿದ್ದಣ್ಣ ಅವರ ಅಧ್ಯಕ್ಷತೆಯಲ್ಲಿ ಗುರುವಾರ ನಡೆದ ಸಾಮಾನ್ಯ ಸಭೆಯಲ್ಲಿ ಈ ವಿಷಯ ಚರ್ಚೆಗೆ ಬಂತು.
ಈ ಹಿಂದೆ ಶುದ್ಧ ಕುಡಿಯುವ ನೀರು ಘಟಕಗಳ ನಿರ್ವಹಣೆಯಿಂದ ವರ್ಷಕ್ಕೆ ₹2.40 ಲಕ್ಷ ಆದಾಯ ಬರುತ್ತಿತ್ತು. ಆದರೆ, "ಕಾಣದ ಕೈಗಳ ರಾಜಕೀಯ ಪ್ರಭಾವದಿಂದ ಆದಾಯವನ್ನು ಕೇವಲ ₹70 ಸಾವಿರಕ್ಕೆ ಇಳಿಸಿ ಮತ್ತೊಬ್ಬರಿಗೆ ಉಸ್ತುವಾರಿ ನೀಡಲಾಗಿದೆ" ಎಂದು ಸದಸ್ಯರು ದೂರಿದರು.
RO ಪ್ಲಾಂಟ್ಗಳ ಆದಾಯ ಮೂಲವನ್ನು ಪರಿಗಣಿಸದೆ ಹಾಗೂ ಸದಸ್ಯರ ಗಮನಕ್ಕೂ ತಾರದೆ ವಾಮಮಾರ್ಗದಲ್ಲಿ ವಹಿಸಿರುವ ಕ್ರಮದ ಹಿಂದಿನ ಮರ್ಮವೇನು? ಇದರಿಂದ ಪಪಂಗೆ ವರ್ಷಕ್ಕೆ ₹1.70 ಲಕ್ಷ ನಷ್ಟವಾಗುತ್ತಿದ್ದು, ಈ ಅವೈಜ್ಞಾನಿಕ ನೀತಿಗೆ ಕುಮ್ಮಕ್ಕು ಕೊಟ್ಟವರು ಯಾರು ಎಂದು ಸದಸ್ಯರು ಇಂಜಿನಿಯರ್ ಶ್ರೀನಿವಾಸ ಅವರನ್ನು ಪ್ರಶ್ನಿಸಿದರು.
ಲೆಕ್ಕಪತ್ರಗಳಲ್ಲಿ ಅಕ್ರಮದ ಸಂಶಯ
ಸಭೆಯಲ್ಲಿ, ಈ ಹಿಂದೆ ಆಡಳಿತಾಧಿಕಾರಿ ಉಸ್ತುವಾರಿಯಲ್ಲಿದ್ದಾಗ ತೋರಿಸಿರುವ ಹಣಕಾಸಿನ ಲೆಕ್ಕಪತ್ರಗಳು ತಾಳೆಯಾಗುತ್ತಿಲ್ಲ ಎಂದು ಸದಸ್ಯರು ಆರೋಪಿಸಿದರು. ಕಡಿಮೆ ಬಂಡವಾಳಕ್ಕೆ ಲಭ್ಯವಿರುವ ಸೋಲಾರ್ ಲೈಟ್ಗಳ ದುಬಾರಿ ಲೆಕ್ಕ ಬರೆದಿರುವ ಬಗ್ಗೆ ಸಂಶಯಗಳಿದ್ದು, ಈ ಬಗ್ಗೆ ಮುಖ್ಯಾಧಿಕಾರಿ ಲಿಂಗರಾಜ್ ಅವರು ಕೂಲಂಕಷವಾಗಿ ಪರಿಶೀಲಿಸಬೇಕು ಎಂದು ಒತ್ತಾಯಿಸಲಾಯಿತು.
ಇತರೆ ಪ್ರಮುಖ ನಿರ್ಣಯಗಳು
ಸಭೆಯಲ್ಲಿ ಸರ್ವಸದಸ್ಯರು ಈ ಕೆಳಗಿನ ತುರ್ತು ಕ್ರಮಗಳಿಗೆ ಆಗ್ರಹಿಸಿದರು:
- ತಾಲೂಕು ಕಚೇರಿ ಹಾಗೂ ಕೆಇಬಿ ವೃತ್ತದಲ್ಲಿರುವ ಸಾರ್ವಜನಿಕ ಶೌಚಗೃಹಗಳ ನಿರ್ವಹಣೆಗೆ ಬಹಿರಂಗ ಟೆಂಡರ್.
- ಮಟನ್ ಮತ್ತು ಚಿಕನ್ ಮಾರ್ಕೆಟ್ ಮಳಿಗೆಗಳ ವಿಲೇವಾರಿಗೆ ಸರ್ಕಾರದ ಸುತ್ತೋಲೆಯಂತೆ ಕ್ರಮ.
- ಕಲ್ಗೊಡ್ ಮೊಹಲ್ಲಾದ ಹಳೆಯ ನೀರಿನ ಟ್ಯಾಂಕ್ ನೆಲಸಮ ಮಾಡಿಸುವುದು.
- ಬಸ್ ನಿಲ್ದಾಣದಲ್ಲಿ ಅವಧಿ ಮೀರಿದ ವಾಣಿಜ್ಯ ಮಳಿಗೆಗಳ ಮರು ಹರಾಜು.
- ಪಟ್ಟಣದಲ್ಲಿ ಹೆಚ್ಚಿರುವ ಬಿಡಾಡಿ ದನಗಳ ಉಪಟಳ ನಿಯಂತ್ರಣಕ್ಕೆ ಜಾನುವಾರುಗಳನ್ನು ಗೋ ಶಾಲೆಗೆ ಸೇರಿಸುವುದು ಹಾಗೂ ಬೀದಿ ನಾಯಿಗಳಿಗೆ ನಿಯಮಾನುಸಾರ ಸಂತಾನ ಶಕ್ತಿ ಹರಣ ಚಿಕಿತ್ಸೆ ಕೊಡಿಸುವುದು.
ಸಭೆಯಲ್ಲಿ ಮುಖ್ಯಾಧಿಕಾರಿ ಲಿಂಗರಾಜ್, ಇಂಜಿನಿಯರ್ ಶ್ರೀನಿವಾಸ, ಆರೋಗ್ಯ ಸಹಾಯಕ ಶ್ರೀನಿವಾಸಮೂರ್ತಿ ಹಾಗೂ ಸದಸ್ಯರಾದ ಟಿ. ರವಿಕುಮಾರ, ಪಿ.ಲಕ್ಷ್ಮಣ, ಮಂಜುನಾಥ್, ವಿಜಯಲಕ್ಷ್ಮೀ ಸೇರಿದಂತೆ ಹಲವು ಸದಸ್ಯರು ಭಾಗವಹಿಸಿದ್ದರು.
