ಅಹಮದಾಬಾದ್: ಗುಜರಾತ್ನ ಅಹಮದಾಬಾದ್ನಲ್ಲಿ 2008ರ ಜುಲೈ 26ರಂದು ನಡೆದ ಬಾಂಬ್ ಸರಣಿ ಸ್ಪೋಟದ ಗುರಿ ಆಗಿನ ಮುಖ್ಯಮಂತ್ರಿಯಾಗಿದ್ದ ನರೇಂದ್ರ ಮೋದಿ ಮತ್ತು ಗೃಹ ಸಚಿವ ಅಮಿತ್ ಷಾ ಆಗಿದ್ದರು ಎಂದು ಈ ಪ್ರಕರಣದ ತೀರ್ಪು ಪ್ರಕಟಿಸಿದ ವಿಶೇಷ ಕೋರ್ಟ್ ಟಿಪ್ಪಣಿ ಮಾಡಿದೆ. ವಿವಿಧೆಡೆ ಬಾಂಬ್ ಸ್ಪೋಟಿಸಿದರೆ ಅನೇಕರು ಗಾಯಗೊಳ್ಳುತ್ತಾರೆ. ಇವರನ್ನು ಸಮೀಪದ ಆಸ್ಪತ್ರೆಗಳಿಗೆ ಸೇರಿಸುತ್ತಾರೆ. ಇಂಥವರ ಯೋಗಕ್ಷೇಮ ವಿಚಾರಿಸಲು ಸರ್ಕಾರದ ಪ್ರಮುಖರು, ಶಾಸಕರು, ಅಧಿಕಾರಿಗಳು ಬರುತ್ತಾರೆಂದು ಎಣಿಸಿಯೇ ಎರಡು ಆಸ್ಪತ್ರೆಯ ಬಳಿಯಲ್ಲೂ ಬಾಂಬ್ ಸ್ಪೋಟಿಸಲಾಗಿತ್ತು. ಹೀಗಾಗಿ ಉಗ್ರರ ಗುರಿ ನರೇಂದ್ರ ಮೋದಿ, ಅಮಿತ್ ಷಾ, ಇನ್ನಿತರ ಶಾಸಕರು ಆಗಿದ್ದರು ಎಂದು ನ್ಯಾಯಾಧೀಶ ಎ.ಆರ್. ಪಟೇಲ್ ಅಭಿಪ್ರಾಯ ದಾಖಲಿಸಿದ್ದಾರೆ. ಈ ಬಾಂಬ್ ಸ್ಪೋಟವು ಹಿಂದು ಸಮುದಾಯವನ್ನು ಗುರಿಯಾಗಿಸಿಕೊಂಡು ನಡೆಸಿದ ದುಷ್ಕೃತ್ಯ. ದೇಶದಲ್ಲಿ ಇಸ್ಲಾಮಿಕ್ ಮೂಲಭೂತವಾದದ ಆಡಳಿತವೇ ಇರಬೇಕೆಂಬ ಹಠದಿಂದ ಮಾಡಿದ ಹಿಂಸಾಚಾರ ಇದು ಎಂದೂ ಜಡ್ಜ್ ಹೇಳಿದ್ದಾರೆ. ಶುಕ್ರವಾರ ಪ್ರಕಟವಾದ ತೀರ್ಪಿನ ಪ್ರತಿ ಶನಿವಾರ ಲಭ್ಯವಾಗಿದ್ದು, ಅದರಲ್ಲಿ ಜಡ್ಜ್ ಅವರ ಉಲ್ಲೇಖಗಳು ದಾಖಲಾಗಿವೆ. ಈ ಪ್ರಕರಣದಲ್ಲಿ 38 ಅಪರಾಧಿಗಳಿಗೆ ವಿಶೇಷ ಕೋರ್ಟ್ ಶುಕ್ರವಾರ ಮರಣದಂಡನೆ ವಿಧಿಸಿತ್ತು. 11 ತಪ್ಪಿತಸ್ಥರಿಗೆ ಜೀವಿತಾವಧಿ ಸಜೆಯನ್ನು ಪ್ರಕಟಿಸಿತ್ತು. 56 ಮಂದಿಯ ಸಾವಿಗೆ ಕಾರಣವಾದ ಈ ಸ್ಪೋಟವನ್ನು ಇಂಡಿಯನ್ ಮುಜಾಹಿದ್ದೀನ್ (ಐಎಂ) ನಡೆಸಿತ್ತು.
