ನವದೆಹಲಿ: ತಾಯಿ ಹೀರಾಬೆನ್ ಮೋದಿಯವರ 100ನೇ ಜನ್ಮದಿನದ ಹಿನ್ನೆಲೆಯಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರು ಗುಜರಾತನ ಗಾಂಧಿನಗರದಲ್ಲಿರುವ ನಿವಾಸದಲ್ಲಿ ತಾಯಿ ಪಾದಪೂಜೆ ನೆರವೇರಿಸಿ, ಆಶೀರ್ವಾದ ಪಡೆದರು. 100ನೇ ವರ್ಷದ ವಿಶೇಷ ಸಂದರ್ಭದಲ್ಲಿ ತಾಯಿ ಜತೆ ಭಾವನಾತ್ಮಕ ಕ್ಷಣಗಳನ್ನು ಕಳೆದ ಮೋದಿ, ಸಿಹಿ ತಿನಿಸಿ ಸಂಭ್ರಮಿಸಿದರು. ತಾಯಿ ಜತೆಗೆ ಮನೆಯಲ್ಲಿರುವ ದೇವರ ಗುಡಿಯಲ್ಲಿ ಪೂಜೆ ಸಲ್ಲಿಸಿದ ಮೋದಿ, ತಾಯಿ ಜತೆಗಿನ ತಮ್ಮ ಬಾಲ್ಯ, ವಡ್ ನಗರದಲ್ಲಿನ ಜೀವನ, ಬಡತನ, ಕುಟುಂಬ ನಿಭಾಯಿಸಿದ ಅಮ್ಮನ ಬದ್ಧತೆ ಮುಂತಾದ ವಿಚಾರಗಳನ್ನು ಲೇಖನದಲ್ಲಿ ಸ್ಮರಿಸಿದ್ದಾರೆ. ‘ತಂದೆ ಬದುಕಿದ್ದರೆ ಅವರು ಕೂಡ ಕಳೆದ ವಾರ ನೂರನೆಯ ವರ್ಷ ಆಚರಿಸಿಕೊಳ್ಳುತ್ತಿದ್ದರು. ತಾಯಿಯ ನೂರನೇ ವರ್ಷ ಆರಂಭವಾಗುತ್ತಿರುವ ಮತ್ತು ತಂದೆ ನೂರು ವರ್ಷ ಪೂರ್ಣಗೊಳಿಸಬಹುದಾಗಿದ್ದ 2022 ನನ್ನ ಪಾಲಿಗೆ ವಿಶೇಷ ವರ್ಷ’ ಎಂದು ಮೋದಿ ಬರೆದುಕೊಂಡಿದ್ದಾರೆ.
