ಕಾಂಗ್ರೆಸ್​ನವರು ಮಾಧ್ಯಮಗಳೆದುರು ಮಾತ್ರ ಬಾವುಟ ತೆಗೆಯುತ್ತಾರೆ, ಅವರಿಗೆ ಪ್ರತಿಭಟನೆ ಮಾಡೋದು ಗೊತ್ತಿಲ್ಲ: ಶಾಸಕ ರೇಣುಕಾಚಾರ್ಯ ವ್ಯಂಗ್ಯ

ದಾವಣಗೆರೆ: ಕಾಂಗ್ರೆಸ್​ನವರು ಮಾಧ್ಯಮದವರ ಎದುರು ಬಾವುಟ ತೆಗೆಯುತ್ತಾರೆ. ಅವರು ಆಚೆ ಹೋದ ತಕ್ಷಣ ಅದನ್ನು ಮಡಿಚಿ ಇಟ್ಟುಕೊಳ್ಳುತ್ತಾರೆ ಎಂದು ಬಿಜೆಪಿ ಶಾಸಕ ಎಂ.ಪಿ.ರೇಣುಕಾಚಾರ್ಯ ಹೇಳಿದರು.

ಸರ್ಕಾರ ಪೊಲೀಸ್ ಇಲಾಖೆಯನ್ನು ದುರ್ಬಳಕೆ ಮಾಡಿಕೊಳ್ಳುತ್ತದೆ ಎಂದು ಆರೋಪಿಸಿ ಇಂದು ಕಾಂಗ್ರೆಸ್ ಪ್ರತಿಭಟನೆ ನಡೆಸುತ್ತಿರುವ ಹಿನ್ನೆಲೆಯಲ್ಲಿ ವ್ಯಂಗ್ಯವಾಡಿದ ರೇಣುಕಾಚಾರ್ಯ, ಕಾಂಗ್ರೆಸ್​ನವರು ಎಂಟಿಆರ್​ ರೆಡಿ ಫುಡ್​ ಇದ್ದಂತೆ. ಅವರಿಗೆ ಪ್ರತಿಭಟನೆ ಮಾಡೋದು ಗೊತ್ತಿಲ್ಲ. ಮಾಧ್ಯಮಗಳ ಎದುರಷ್ಟೇ ಬಾವುಟ ಹಿಡಿಯುತ್ತಾರೆ ಎಂದು ಹೇಳಿದರು.

ಉಮೇಶ್ ಕತ್ತಿಯವರು ಹೈಕಮಾಂಡ್ ಭೇಟಿ ಮಾಡಲು ಹೋಗಿದ್ದಕ್ಕೆ ಪ್ರತಿಕ್ರಿಯೆ ನೀಡಿದ ರೇಣುಕಾಚಾರ್ಯ, ಹೋಗಲಿ ಬಿಡಿ, ಅವರು ನಮ್ಮ ಪಕ್ಷದ ವರಿಷ್ಠರನ್ನು ಭೇಟಿಯಾಗಲು ಹೋಗಿದ್ದಾರೆ. ಪಾಕಿಸ್ತಾನದವರನ್ನೋ, ಭಯೋತ್ಪಾದಕರನ್ನೋ ಭೇಟಿ ಮಾಡಲು ಹೋಗಿಲ್ಲ. ಅವರು ಹಿರಿಯ ನಾಯಕರು. ಸಚಿವ ಸ್ಥಾನ ಕೇಳುವುದರಲ್ಲಿ ಯಾವುದೇ ತಪ್ಪಿಲ್ಲ. ಕಾಂಗ್ರೆಸ್ ಮುಖಂಡರು, ಸೋನಿಯಾ ಗಾಂಧಿಯವರನ್ನು ಭೇಟಿ ಮಾಡಿದ್ದರೆ ಪ್ರಶ್ನಿಸಬಹುದಿತ್ತು ಎಂದು ಹೇಳಿದರು.