ಮಿಷನ್ 150, ಮೂರಂಶದ ಟಾಸ್ಕ್: ಬಿಜೆಪಿ ಚಿಂತನ ಸಭೆಯಲ್ಲಿ ಗಂಭೀರ ಮಂಥನ, ಕಾರಣ ಹುಡುಕಲು ಸೂಚನೆ

ಬೆಂಗಳೂರು: ಮುಂಬರುವ ವಿಧಾನಸಭೆ ಚುನಾವಣೆಗೆ ಮಿಷನ್- 150 ಗುರಿಯನ್ನಿಟ್ಟುಕೊಂಡು ಹೊರಟಿರುವ ಬಿಜೆಪಿ ಹಿಂದಿನ ಫಲಿತಾಂಶಗಳ ಆಧಾರದಲ್ಲಿ ಮೂರು ಪ್ರಶ್ನೆಗಳಿಗೆ ಕಾರಣ ಕಂಡುಕೊಂಡು, ಮುಂದಿನ ಗುರಿ ಸಾಧನೆಯತ್ತ ಕಾರ್ಯೋನ್ಮುಖವಾಗಲು ನಿರ್ಧರಿಸಿದೆ.

ಬೆಂಗಳೂರಿನ ಹೊರ ವಲಯದಲ್ಲಿ ಶುಕ್ರವಾರ ನಡೆದ ಚಿಂತನ ಬೈಠಕ್​ನಲ್ಲಿ ರಾಜ್ಯದಲ್ಲಿ ಒಮ್ಮೆಯೂ ನಿಚ್ಚಳ ಬಹುಮತ ಪಡೆಯದಿರುವ ಬಗ್ಗೆ ಸಣ್ಣ ಅಳುಕಿನೊಂದಿಗೆ ವಿಶ್ಲೇಷಣೆ ನಡೆಸಲಾಗಿದೆ. ದೆಹಲಿ ವರಿಷ್ಠರು ರಾಜ್ಯದಲ್ಲಿ ಪಕ್ಷದ ಈ ಹಿಂದಿನ ನಿರ್ವಹಣೆ ಆಧಾರದ ಮೇಲೆ ಮೂರು ಪ್ರಮುಖ ಪ್ರಶ್ನೆಗಳನ್ನು ರೂಪಿಸಿದ್ದು, ಅವುಗಳಿಗೆ ಉತ್ತರ ಕಂಡುಕೊಂಡೇ ಸಂಘಟನೆ ಬಲ ಪಡಿಸಬೇಕು. ಇಲ್ಲವಾದರೆ, ಸ್ವಂತ ಬಲದ ಮೇಲೆ ಅಧಿಕಾರಕ್ಕೆ ಬರುವುದು ಕಷ್ಟ ಎಂಬ ಕಾರ್ಯಸೂಚಿಯನ್ನು ರಾಜ್ಯ ನಾಯಕರಿಗೆ ನೀಡಿದ್ದಾರೆ. ಚಿಂತನ ಬೈಠಕ್​ನಲ್ಲಿ ಮುಂದಿನ ಗುರಿಯಷ್ಟೇ ಅಲ್ಲದೆ, ಹಿಂದಿನ ವೈಫಲ್ಯಗಳ ಬಗ್ಗೆಯೂ ಚರ್ಚೆ ನಡೆದಿದೆ. ಆ ವೈಫಲ್ಯಗಳನ್ನು ಸರಿಪಡಿಸಿಕೊಳ್ಳದಿದ್ದರೆ ಗುರಿ ಸಾಧನೆ ಅಷ್ಟು ಸುಲಭವಲ್ಲ ಎಂಬುದನ್ನು ಸಭೆಯಲ್ಲಿದ್ದ 41 ಜನರೂ ಸಮ್ಮತಿಸಿದ್ದಾರೆ. ಕಾಂಗ್ರೆಸ್​ಗೆ ಸರಿಯಾದ ಪ್ರತಿರೋಧ ನೀಡಬೇಕು. ನಮ್ಮ ಕಾರ್ಯಕರ್ತರು, ಶಾಸಕರು, ಸಚಿವರು ಒಂದು ಕ್ಷಣವೂ ಮೈಮರೆಯದೇ ಕೆಲಸ ಮಾಡುವಂತೆ ಸಜ್ಜುಗೊಳಿಸಬೇಕಾಗಿದೆ ಎಂದು ರ್ಚಚಿಸಲಾಗಿದೆ.

ಸಂಸದರಿಗೂ ಟಾಸ್ಕ್: ಪಕ್ಷಕ್ಕೆ ಮತಬಾರದ 25 ಬೂತ್​ಗಳನ್ನು ವಿಧಾನಸಭಾ ಕ್ಷೇತ್ರವಾರು ತಕ್ಷಣ ಗುರುತಿಸಬೇಕು. ಅಲ್ಲಿಂದ ಅಭಿಪ್ರಾಯ ಕ್ರೋಡೀಕರಿಸಿ ಅಂತಹ ಬೂತ್​ಗಳಲ್ಲಿ ಮನೆಮನೆಗೂ ಪಕ್ಷವನ್ನು ತಲುಪಿಸಬೇಕು. ಸರ್ಕಾರ ಕಾರ್ಯಕ್ರಮ, ಅಭಿವೃದ್ಧಿ ಯೋಜನೆ ಬಗ್ಗೆ ಮನವರಿಕೆ ಮಾಡಿಕೊಟ್ಟಾಗ ಮಾತ್ರ ಮತದಾರರ ಪರಿವರ್ತನೆ ಸಾಧ್ಯವೆಂಬ ಅಭಿಪ್ರಾಯ ಸಭೆಯಲ್ಲಿ ಕೇಳಿ ಬಂದಿದೆ. ಸಂಸದರು ಸಹ ತಮ್ಮ ಕ್ಷೇತ್ರ ವ್ಯಾಪ್ತಿಯಲ್ಲಿ ಕನಿಷ್ಠ 100 ಬೂತ್​ಗಳನ್ನು ಗುರುತಿಸಿ ಮತದಾರರ ಪರಿವರ್ತನೆಗೆ ಮುಂದಾಗಬೇಕಾಗಿದೆ ಎಂಬ ಟಾಸ್ಕ್ ನೀಡಲಾಗಿದೆ.

ಸಮನ್ವಯ ಸಮಿತಿ ಅಗತ್ಯ: ಚುನಾವಣೆಗೆ ಕೇವಲ ಎಂಟು ತಿಂಗಳು ಬಾಕಿ ಇರುವ ಸಂದರ್ಭದಲ್ಲಿ ಸರ್ಕಾರ ಹಾಗೂ ಪಕ್ಷದ ನಡುವೆ ಸಮನ್ವಯ ಸಾಧಿಸಲು ಸಮಿತಿಯೊಂದರ ಅಗತ್ಯವಿದೆಯೇ ಎಂಬ ಬಗ್ಗೆಯೂ ಚರ್ಚೆ ನಡೆದಿದೆ. ಕೋರ್ ಕಮಿಟಿ ಇದ್ದರೂ ಸಮನ್ವಯ ಸಾಧ್ಯವಾಗುತ್ತಿಲ್ಲ. ನಿಷ್ಠಾವಂತ ಕಾರ್ಯಕರ್ತರಿಗೆ ಯಾವುದೇ ಅಧಿಕಾರ ಸಿಗದೇ ಬೇಸರಗೊಂಡಿದ್ದಾರೆ. ಸಮನ್ವಯ ಸಮಿತಿ ಇದ್ದಿದ್ದರೆ ಇಂತಹ ಸಮಸ್ಯೆ ಬರುತ್ತಿರಲಿಲ್ಲ ಎಂಬ ಬಗ್ಗೆ ಚರ್ಚೆಯಾದರೂ ಯಾವುದೇ ತೀರ್ವನವಾಗಿಲ್ಲ.

ಎರಡು ತಿಂಗಳಷ್ಟೇ ಸಮಯ: ಚುನಾವಣೆಗೆ ಎಂಟು ತಿಂಗಳಿದ್ದರೂ ರಾಜ್ಯದಲ್ಲಿ ಪರವಾದ ವಾತಾವರಣ ಸೃಷ್ಟಿಸಿಕೊಳ್ಳಲು ಇರುವ ಅವಕಾಶ ಎರಡು ತಿಂಗಳಷ್ಟೇ. ಈ ಅವಧಿಯಲ್ಲಿ ಆ ಕೆಲಸ ಆಗದಿದ್ದರೆ ಪರಿಸ್ಥಿತಿ ಕಷ್ಟವಾಗುತ್ತದೆ. ಮೋದಿ ಹೆಸರು ಹೇಳಿದರೆ ಮತ ಬರುತ್ತದೆ ಎಂಬ ಅವಲಂಬನೆಯಿಂದ ಹೊರಬರಬೇಕಾಗಿದೆ. ಪಕ್ಷದ ಇಮೇಜ್ ಹೆಚ್ಚಿಸುವ ಕ್ರಿಯಾ ಯೋಜನೆಯೊಂದನ್ನು ತಕ್ಷಣ ಸಿದ್ಧಪಡಿಸಬೇಕೆಂದು ರಾಜ್ಯ ಘಟಕಕ್ಕೆ ಸೂಚಿಸಲಾಗಿದೆ.

ಕಾರ್ಯಕರ್ತರ ಕೋಪಕ್ಕೇನು ಕಾರಣ?: ಪಕ್ಷದ ಕಾರ್ಯಕರ್ತರು ಕಚೇರಿಗೆ ಬರುವುದಕ್ಕೂ ಕೆಲವರ ಅಪ್ಪಣೆ ಪಡೆಯಬೇಕಾಗಿದೆ ಎಂಬ ವಾತಾವರಣ ಇರುವ ಬಗ್ಗೆ ಅಸಮಾಧಾನ ವ್ಯಕ್ತವಾಗಿದೆ. ಮೊದಲು ಅಂತಹ ವ್ಯವಸ್ಥೆಯನ್ನು ತೆಗೆದು ಹಾಕಿ. ಕಚೇರಿಯಲ್ಲಿ ಕಾರ್ಯಕರ್ತರಿಗೆ ಮುಕ್ತ ವಾತಾವರಣ ಸೃಷ್ಟಿಸುವಂತೆ ಸಭೆಯಲ್ಲಿದ್ದ ಕೆಲವರು ರಾಜ್ಯಾಧ್ಯಕ್ಷರಿಗೆ ತಾಕೀತು ಮಾಡಿದ್ದಾರೆಂದು ಮೂಲಗಳು ಖಚಿತಪಡಿಸಿವೆ.

5-6 ಜಿಲ್ಲೆಯಲ್ಲಿ ಸಂಘಟನೆಗೆ ಆದ್ಯತೆ: ರಾಜ್ಯದಲ್ಲಿ ಐದಾರು ಜಿಲ್ಲೆಗಳಲ್ಲಿ ಪಕ್ಷದ ಸಂಘಟನೆ ಸೂಕ್ತವಾಗಿಲ್ಲ. ಮಂಡ್ಯ, ರಾಮನಗರ, ಹಾಸನ ಸೇರಿದಂತೆ ಕೆಲವು ಜಿಲ್ಲೆಗಳಲ್ಲಿ ಸಂಘಟನೆಯನ್ನು ಬಲಗೊಳಿಸುವ ಮೂಲಕ ಶಕ್ತಿ ತುಂಬಬೇಕಿದೆ. ಈ ಜಿಲ್ಲೆಗಳಲ್ಲಿ ಈ ಚುನಾವಣೆಯಲ್ಲಿ ಪ್ರತಿಜಿಲ್ಲೆಗೂ ಕನಿಷ್ಠ ಎರಡು ಕ್ಷೇತ್ರದಲ್ಲಿ ಗೆಲ್ಲಬೇಕು ಎಂಬುದನ್ನು ಸವಾಲಿನ ರೀತಿಯಲ್ಲಿ ತೆಗೆದುಕೊಳ್ಳಲಾಗಿದೆ.

ಮೂರು ಪ್ರಶ್ನೆಗೆ ಬೇಕಿದೆ ಉತ್ತರ

• 2008 ಮತ್ತು 2018ರ ಚುನಾವಣೆಯಲ್ಲಿ ಅತಿ ಹೆಚ್ಚು ಸ್ಥಾನ ಗೆದ್ದರೂ ಬಹುಮತ ದೊರೆಯದಿರಲು ಕಾರಣಗಳೇನು?
• ರಾಜ್ಯದ 77 ವಿಧಾನಸಭಾ ಕ್ಷೇತ್ರಗಳಲ್ಲಿ ಒಮ್ಮೆಯೂ ಬಿಜೆಪಿ ಗೆಲುವು ಸಾಧಿಸಲು ಸಾಧ್ಯವಾಗದಿರುವುದಕ್ಕೆ ಕಾರಣವೇನು?
• ಬಿಜೆಪಿ ಸತತ ಗೆಲ್ಲುತ್ತಿರುವ ಕ್ಷೇತ್ರಗಳಲ್ಲೂ ಹಲವು ಬೂತ್​ಗಳಲ್ಲಿ ಮತಗಳು ಸಿಕ್ಕದೇ ಇರುವುದಕ್ಕೆ ಕಾರಣಗಳೇನು?

ಹಿನ್ನಡೆಗೆ ಕಾರಣಗಳೇನು?

ಪಕ್ಷ ಗೆಲ್ಲದ ಹಾಗೂ ಗೆದ್ದರೂ ಕಡಿಮೆ ಮತಗಳಿಸುವ ಬೂತ್​ಗಳಿಂದ ಈ ಕೆಳಕಂಡ ಪ್ರಶ್ನೆಗಳಿಗೆ ಉತ್ತರ ಕಂಡುಕೊಂಡು ಮುಂದುವರಿಯಬೇಕೆಂದು ತಿಳಿಸಲಾಗಿದೆ.

• ಮತದಾರರಲ್ಲಿ ಪಕ್ಷದ ಬಗ್ಗೆ ಇರುವ ಅಭಿಪ್ರಾಯವೇನು? ಏನಾದರೂ ಬೇಸರ ಇದೆಯೇ?
• ಅಭ್ಯರ್ಥಿಗಳ ಬಗ್ಗೆ ಅಸಮಾಧಾನವಿದೆಯೇ?
• ಪಕ್ಷದ ಸಿದ್ಧಾಂತಗಳು ಇಷ್ಟ ಆಗುತ್ತಿಲ್ಲವೇ?

ಸಂಸದರಿಗೂ ಟಾರ್ಗೆಟ್

• ಸಂಸದರು ತಮ್ಮ ಕ್ಷೇತ್ರದಲ್ಲಿ ಕನಿಷ್ಠ ಪ್ರದರ್ಶನದ 100 ಬೂತ್​ಗಳನ್ನು ಗುರುತಿಸಬೇಕು
• ಕಾರ್ಯಕರ್ತರ ಅಸಮಾಧಾನ ಶಮನಕ್ಕೆ ವರದಿ ಸಲ್ಲಿಸಲು ಸೂಚನೆ

ಉತ್ತರ ನೀಡಲು ತಂಡ ರಚಿಸಿ

ಪ್ರತಿಪಕ್ಷದ ನಾಯಕ ಸಿದ್ದರಾಮಯ್ಯ ಮಾಡುವ ಟೀಕೆಗಳಿಗೆ ನೀಡುತ್ತಿರುವ ಪ್ರತಿರೋಧ ಸಾಲದು. ಅದಕ್ಕಾಗಿಯೇ ಕನಿಷ್ಠ 10 ಜನರ ಒಂದು ತಂಡವನ್ನು ರಚನೆ ಮಾಡಬೇಕು. ಅವರ ಟೀಕೆಗಳಿಗೆ ತಕ್ಷಣ ಆ 10 ಜನರು ಉತ್ತರ ನೀಡುವಂತಾಗಬೇಕು ಎಂಬ ಸಲಹೆಯನ್ನು ನೀಡಲಾಗಿದೆ.

ಯಾವ ವಲಯ? ಏನು ಕೆಲಸ?

• ಕಲ್ಯಾಣ ಕರ್ನಾಟಕ ಭಾಗದಲ್ಲಿ ಇನ್ನಷ್ಟು ಭದ್ರಪಡಿಸಬೇಕು, ಕಳೆದ ಬಾರಿ ಗೆದ್ದವರಲ್ಲಿ ಕೆಲವರು ಸೋಲುವ ಸಾಧ್ಯತೆ ಇದೆ. ಆ ರೀತಿ ಆಗದಂತೆ ಎಚ್ಚರವಹಿಸಬೇಕು. ಬೇರೆ ಪಕ್ಷದವರನ್ನು ಸೆಳೆಯಬೇಕು.
• ಕಿತ್ತೂರು ಕರ್ನಾಟಕದಲ್ಲಿ ಬಲವಾಗಿದ್ದ ಬುಡ ಅಲುಗಾಡುತ್ತಿದೆ. ಅದಕ್ಕೆ ಅವಕಾಶ ನೀಡಬಾರದು.
• ಮಧ್ಯ ಕರ್ನಾಟಕದಲ್ಲಿ ಹಾಲಿ ಶಾಸಕರಲ್ಲಿ ಕೆಲವರ ಬಗ್ಗೆ ನಕಾರಾತ್ಮಕ ಅಭಿಪ್ರಾಯವಿದ್ದು, ಹೊಸ ಮುಖಗಳಿಗೆ ಮಣೆ ಹಾಕಬೇಕು
• ಮಲೆನಾಡು-ಕರಾವಳಿಯಲ್ಲಿ ಪಕ್ಷದ ನೆಲೆ ಕಸಿಯುವ ಪ್ರತಿಪಕ್ಷದ ಪ್ರಯತ್ನಕ್ಕೆ ಅವಕಾಶ ನೀಡಬಾರದು
• ಹಳೇ ಮೈಸೂರು ಭಾಗದಲ್ಲಿ ಮೊದಲಿನಿಂದಲೂ ಹೆಚ್ಚಿನ ಸ್ಥಾನಗಳನ್ನು ಗೆಲ್ಲಲು ಸಾಧ್ಯವಾಗುತ್ತಿಲ್ಲ. ಈ ಬಾರಿ ಅವಕಾಶ ಸದುಪಯೋಗ ಮಾಡಿಕೊಳ್ಳಬೇಕು. ಆಪರೇಷನ್ ಕಮಲಕ್ಕೆ ಆದ್ಯತೆ ನೀಡಬೇಕು.
• ಬೆಂಗಳೂರಿನಲ್ಲಿ ಕಳೆದ ಬಾರಿ ಕಾಂಗ್ರೆಸ್ ಸೀಟು ಹೆಚ್ಚು ಗೆದ್ದಿದ್ದು, ಈ ಬಾರಿ ಅದಕ್ಕೆ ಅವಕಾಶ ನೀಡಬಾರದು.

https://www.vijayavani.net/woman-willingly-staying-with-man-cant-file-rape-case-if-relationship-turns-sour/

https://www.vijayavani.net/two-farmers-died-because-of-electric-shock/