ಮಾಯಾವತಿ ಸೊಸೆಗೆ ಕಿರುಕುಳ

ಲಖನೌ: ತಮ್ಮ ಪತಿ ‘ದೈಹಿಕವಾಗಿ ಅಸಮರ್ಥ’ ಎಂದು ಬಹುಜನ ಸಮಾಜ ಪಕ್ಷದ (ಬಿಎಸ್​ಪಿ) ನಾಯಕಿ ಹಾಗೂ ಉತ್ತರ ಪ್ರದೇಶದ ಮಾಜಿ ಮುಖ್ಯಮಂತ್ರಿ ಮಾಯಾವತಿ ಅವರ ಸೋದರಸೊಸೆ ಅಲೈಸ್ ಹೇಳಿದ್ದಾರೆ. ಮಗುವನ್ನು ಪಡೆಯಲು ಪತಿಯ ಅಣ್ಣನ ದೈಹಿಕ ಸಂಪರ್ಕ ಬೆಳೆಸುವಂತೆ ಅತ್ತೆ-ಮಾವ ಬಲವಂತಪಡಿಸುತ್ತಿದ್ದಾರೆ ಎಂದೂ ಹೇಳಿರುವ ಅವರು, ಪತಿ ಹಾಗೂ ಅತ್ತೆ-ಮಾವನ ವಿರುದ್ಧ ದೂರು ದಾಖಲಿಸಿದ್ದಾರೆ. ವರದಕ್ಷಿಣೆಗಾಗಿ ಪೀಡಿಸುತ್ತಿದ್ದಾರೆಂದೂ ಅಲೈಸ್ ಆರೋಪಿಸಿದ್ದಾರೆ.

ಅಲೈಸ್, ಮಾಯಾವತಿಯ ಆರು ಸಹೋದರರಲ್ಲಿ ಒಬ್ಬರಾದ ನರೇಶ್​ನ ಪುತ್ರಿ. 50 ಲಕ್ಷ ರೂಪಾಯಿ ವರದಕ್ಷಿಣೆ ಹಾಗೂ ಗಾಜಿಯಾಬಾದ್​ನಲ್ಲಿ ಒಂದು ಫ್ಲಾ್ಯಟ್ ನೀಡುವಂತೆ ಗಂಡನ ಮನೆಯವರು ಪೀಡಿಸುತ್ತಿದ್ದಾರೆ ಎಂದು ದೂರಿರುವ ಮಾಯಾವತಿಯ ಸೋದರಸೊಸೆ, ತನ್ನ ಪತಿ ವಿಶಾಲ್ ಸಿಂಗ್ ‘ನಪುಂಸಕ’ ಎಂದು ಹೇಳಿದ್ದಾರೆ. 2023 ನವೆಂಬರ್ 9ರಂದು ಅಲೈಸ್-ವಿಶಾಲ್ ಮದುವೆ ನಡೆದಿತ್ತು.

ಹಲವು ಬಾರಿ ದೂರು

ಸಂತ್ರಸ್ತೆ ಅಲೈಸ್​ರ ಅತ್ತೆ-ಮಾವ ಹಾಪುರ್​ನ ಕೊತ್ವಾಲಿ ಪ್ರದೇಶದ ನಿವಾಸಿಗಳಾಗಿದ್ದಾರೆ. ಸ್ಥಳೀಯ ಪೊಲೀಸ್ ಠಾಣೆ ಹಾಗೂ ಜಿಲ್ಲಾ ಪೊಲೀಸ್ ಮುಖ್ಯಸ್ಥರಿಗೂ ಹಲವು ಬಾರಿ ದೂರಿದ್ದರೂ ಯಾವುದೇ ಮೊಕದ್ದಮೆಯನ್ನು ದಾಖಲಿಸಲಾಗಿಲ್ಲ ಎಂದು ಅಲೈಸ್ ಆರೋಪಿಸಿದ್ದಾರೆ.

ಕೋರ್ಟ್ ಆದೇಶ: ನ್ಯಾಯಾಲಯವೊಂದರ ಆದೇಶದ ಮೇರೆಗೆ ಅಲೈಸ್​ರ ಪತಿ ಸಹಿತ ಏಳು ಆರೋಪಿಗಳ ವಿರುದ್ಧ ಕೊನೆಗೂ ಕೇಸ್ ದಾಖಲಿಸಲಾಗಿದೆ. ಅಲೈಸ್​ರ ಅತ್ತೆ ಪುಷ್ಪಾ ದೇವಿ, ಒಮ್ಮೆ ಬಿಎಸ್​ಪಿ ಟಿಕೆಟ್ ಮೇಲೆ ವಿಧಾನಸಭೆ ಚುನಾವಣೆಯಲ್ಲಿ ಸ್ಪರ್ಧಿಸಿದ್ದರು.