ಹಾಲಿವುಡ್ ಸೂಪರ್ಹೀರೋಗಳಿಗೆ ಸುವರ್ಣಕಾಲವಿದು. ಕಳೆದ ತಿಂಗಳು ರಿಲೀಸ್ ಆದ "ಸ್ಪೈಡರ್ಮ್ಯಾನ್: ಬ್ರ್ಯಾಂಡ್ ನ್ಯೂಡೇ' ಬಾಕ್ಸಾಫಿಸಿನಲ್ಲಿ ಭರ್ಜರಿ ಗಳಿಕೆ ಮಾಡುತ್ತಿದೆ. ಅದರ ಬೆನ್ನಲ್ಲೇ ಹಿಟ್ ಸೂಪರ್ಹೀರೋ ಸಿನಿಮಾ ಫ್ರಾಂಚೈಸಿಯಾದ "ಎಕ್ಸ್ ಮೆನ್' ತಂಡದ ಹೊಸ ಸದಸ್ಯರನ್ನು ಮಾರ್ವಲ್ ಪರಿಚಯಿಸಿದೆ. "ಎಕ್ಸ್ ಮೆನ್' ಪಾತ್ರಗಳನ್ನು ಜನ ಸ್ವೀಕರಿಸಿದ್ದನ್ನು ನೋಡಿ ಹ್ಯೂ ಜಾಕ್ಮನ್ ನಟಿಸಿದ್ದ "ವೂಲ್ವರಿನ್' ಮತ್ತು ರ್ಯಾನ್ ರೆನಾಲ್ಡ್ಸ್ನ "ಡೆಡ್ಪೂಲ್' ಕುರಿತ ಐದು ಸಿನಿಮಾಗಳು ಬಂದಿವೆ. ಅದನ್ನೂ ಸೇರಿ 2000ರಿಂದ 2020ರವರೆಗೆ ಒಟ್ಟು 13 "ಎಕ್ಸ್ ಮೆನ್' ಚಿತ್ರಗಳು ಬಂದಿದ್ದು, ಬಹುತೇಕ ಎಲ್ಲವೂ ಸೂಪರ್ಹಿಟ್ ಆಗಿವೆ. ಇದೀಗ ಸೂಪರ್ಹೀರೋ ಸಿನಿಮಾಗಳ ಕ್ರೇಜ್ ಹಿಂದೆಂದಿಗಿಂತಲೂ ಹೆಚ್ಚಾಗಿರುವುದನ್ನು ಮನಗಂಡು ಮಾರ್ವಲ್ ಸ್ಟುಡಿಯೋಸ್ ಹೊಸ "ಎಕ್ಸ್ ಮೆನ್' ಘೋಷಿಸಿದೆ. ಕಳೆದ ವರ್ಷ ತೆರೆಕಂಡ "ಥಂಡರ್ಬೋಲ್ಟ್ಸ್' ಖ್ಯಾತಿಯ ಜೇಕ್ ಶ್ರೀಯರ್ ಈ ಹೊಸ ಸೂಪರ್ಹೀರೋ ಚಿತ್ರಕ್ಕೆ ಆ್ಯಕ್ಷನ್&ಕಟ್ ಹೇಳಲಿದ್ದಾರೆ. ಸ್ಯಾಡಿ ಸಿಂಕ್ (ಜೀನ್ ಗ್ರೇ), ಕಿಟ್ ಕಾನರ್ (ಸ್ಕಾಟ್ ಸಮ್ಮರ್ಸ್), ಸಮಾರಾ ವೀವಿಂಗ್ (ಎಮ್ಮಾ ಫ್ರಾಸ್ಟ್), ಕ್ರಿಸ್ಟೋರ್ ಎಬೋಟ್ (ಪ್ರೊಫೆಸರ್ ಎಕ್ಸ್), ಮಾಯಾ ಬಾಯ್ಡ್ (ಸ್ಟಾಮ್ರ್), ಅಡಮ್ ಡೆವರ್ (ಮಿಸ್ಟರ್ ಸಿನಿಸ್ಟರ್), ಇಂಡೀ ನವರೆಟ್ಟೆ (ರೋಗ್) ಪಾತ್ರಗಳಿಗೆ ಆಯ್ಕೆಯಾಗಿದ್ದಾರೆ. ಹೊಸ ಮುಖಗಳ ಹೊಚ್ಚ ಹೊಸ "ಎಕ್ಸ್ ಮೆನ್' ಮೇ 2028ರಲ್ಲಿ ರಿಲೀಸ್ ಆಗಲಿದೆ.
