ರಾಷ್ಟ್ರಾದ್ಯಂತ ಪಡೆದಿತ್ತು ಖ್ಯಾತಿ: ಈ ಜಾನುವಾರು ಸಂತೆ ಪ್ರತಿ ಭಾನುವಾರ, ಸೋಮವಾರ ನಡೆಯುತ್ತಿತ್ತು. ಜಿಲ್ಲೆ, ರಾಜ್ಯ ಮಾತ್ರವಲ್ಲದೇ ರಾಷ್ಟ್ರಮಟ್ಟದಲ್ಲೂ ಖ್ಯಾತಿಗಳಿಸಿತ್ತು. ಹಾಸನ, ಗಂಡಸಿ, ಮಧುಗಿರಿ, ಚಿಂತಾಮಣಿ, ಚಿಕ್ಕಬಳ್ಳಾಪುರ, ತುಮಕೂರು, ಮಂಡ್ಯ, ಕೆ.ಆರ್.ಪೇಟೆ, ವಿಧುರಾಶ್ವತ್ಥ, ಆಂಧ್ರಪ್ರದೇಶದ ಹಿಂದುಪುರ, ಕೇರಳ ಮತ್ತಿತರ ರಾಜ್ಯಗಳಿಂದಲೂ ವ್ಯಾಪಾರಸ್ಥರು ನೂರಾರು ಎತ್ತುಗಳನ್ನು ತಂದು ಇಲ್ಲಿ ಮಾರಾಟ ಮಾಡುತ್ತಿದ್ದರು. ಉತ್ತರ ಕರ್ನಾಟಕ, ದಕ್ಷಿಣ ಕರ್ನಾಟಕ, ಮಧ್ಯ ಕರ್ನಾಟಕ, ಕರಾವಳಿ ಹಾಗೂ ಮಲೆನಾಡಿನ ಕೊಂಡಿಯಾಗಿದ್ದ ಈ ದನದ ಸಂತೆ ಈ ಭಾಗದ ರೈತರ ಜೀವನಾಡಿಯಾತ್ತು. ಪಟ್ಟಣದ ಹದಯ ಭಾಗವಾಗಿದ್ದ ಗಾಂಧಿ ನಗರದ ಹತ್ತು ಎಕರೆ ಪ್ರದೇಶಲ್ಲಿ ದನದ ಸಂತೆ ನಡೆಯುತ್ತಿತ್ತು. ನಂತರ ಅದನ್ನು ಹಿರೇಕೆರೂರು ರಸ್ತೆಯ ಎಪಿಎಂಸಿ ಮಾರುಕಟ್ಟೆ ಆವರಣಕ್ಕೆ ಸ್ಥಳಾಂತರಿಸಲಾಗಿತ್ತು. ಆ ಬಳಿಕ ತಡಗಣಿ ಎಪಿಎಂಸಿ ಮಾರುಕಟ್ಟೆ ಆವರಣಕ್ಕೆ ಸ್ಥಳಾಂತರಿಸಲಾಯಿತು.
