ಕಟ್ಟಡಗಳ ಅವಶೇಷಗಳಡಿ ಸಿಲುಕಿದ್ದ ಒಬ್ಬ ಬಾಲಕ ಮತ್ತು 62 ವರ್ಷದ ವ್ಯಕ್ತಿಯನ್ನು ಪರಿಹಾರ ಕಾರ್ಯಕರ್ತರು ಪವಾಡಸದೃಶ ರೀತಿಯಲ್ಲಿ ಪಾರು ಮಾಡಿದ್ದಾರೆ. ಆಗ್ನೇಯ ಟರ್ಕಿಯ ಹತಾಯ್ ಪ್ರಾಂತ್ಯದಲ್ಲಿ ಏಳು ವರ್ಷದ ಮುಸ್ತಾಫಾ ಮತ್ತು ನುರ್ದಾಗಿಯಲ್ಲಿ ನಫಿಜೆ ಯಿಲ್ಮಾಜ್ ಎಂಬುವವರನ್ನು ರಕ್ಷಿಸಲಾಗಿದೆ ಎಂದು ಸರ್ಕಾರಿ ಸುದ್ದಿ ಸಂಸ್ಥೆಯೊಂದು ವರದಿ ಮಾಡಿದೆ. ಭಾನುವಾರ ರಾತ್ರಿ ಪಾರು ಮಾಡುವವರೆಗೆ ಅವರಿಬ್ಬರೂ ಬೇರೆ ಬೇರೆ ಭಾಗಗಳಲ್ಲಿ ಅವಶೇಷಗಳಡಿ 163 ಗಂಟೆ ಕಾಲ ಸಿಲುಕಿ ಕೊಂಡಿದ್ದರು. ಇಬ್ಬರೂ ಜೀವಂತವಾಗಿ ಹೊರ ಬಂದಿದ್ದಾರೆ. ಟರ್ಕಿಯ ವಿವಿಧ ಸಂಘಟನೆಗಳ 32,000ಕ್ಕೂ ಅಧಿಕ ಹಾಗೂ 8,294 ಅಂತಾರಾಷ್ಟ್ರೀಯ ಕಾರ್ಯಕರ್ತರು ಶೋಧ ಮತ್ತು ರಕ್ಷಣೆ ಕಾರ್ಯದಲ್ಲಿ ತೊಡಗಿದ್ದಾರೆ.
