VIDEO| ಕೊರೊನಾ ವೈರಸ್​ ಹೆಸರಲ್ಲಿ ಜೋಕ್ಸ್​ ಮಾಡಲು ಹೋಗಿ 5 ವರ್ಷ ಜೈಲು ಶಿಕ್ಷೆಗೆ ಗುರಿಯಾದ ವ್ಯಕ್ತಿ!

ಮಾಸ್ಕೋ: ಚೀನಾದಲ್ಲಿ ಮೃತ್ಯುಕೂಪ ನಿರ್ಮಿಸಿರುವ ಕೊರೊನಾ ವೈರಸ್ ಈಗಾಗಲೇ ಸಾವಿರಕ್ಕಿಂತ ಹೆಚ್ಚು ಮಂದಿಯನ್ನು ಬಲಿ ಪಡೆದುಕೊಂಡು ಜಗತ್ತಿನಾದ್ಯಂತ ಇನ್ನಿಲ್ಲದ ಭೀತಿ ಸೃಷ್ಟಿಸಿದೆ. ಕೊರೊನಾ ಭೀಕರತೆಗೆ ಇಡೀ ವಿಶ್ವವೇ ಹೆದರುತ್ತಿರುವ ಸಮಯದಲ್ಲಿ ವ್ಯಕ್ತಿಯೊಬ್ಬ ಕೊರೊನಾ ಹೆಸರಲ್ಲಿ ಜೋಕ್ಸ್​ ಮಾಡಲು ಹೋಗಿ ಸಾರ್ವಜನಿಕರಲ್ಲಿ ಭಯ ಹುಟ್ಟಿಸಿದ ಆರೋಪದ ಮೇಲೆ ಪೊಲೀಸರಿಂದ ಬಂಧನಕ್ಕೊಳಗಾಗಿದ್ದಾನೆ.

ಬಂಧಿತನನ್ನು ಕಜಕಿಸ್ತಾನ ಮೂಲದ ಕರೊಮಟುಲ್ಲೊ ಝಬೊರೊವ್​ ಎಂದು ಗುರುತಿಸಲಾಗಿದ್ದು, ಸದ್ಯ ಐದು ವರ್ಷಗಳ ಜೈಲು ಶಿಕ್ಷೆಗೆ ಗುರಿಯಾಗಿದ್ದಾನೆ ಎಂದು ರಷ್ಯಾ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.

ವಿಡಿಯೋದಲ್ಲಿ ಏನಿದೆ?: ವೈರಲ್​ ಆಗಿರುವ ವಿಡಿಯೋದಲ್ಲಿ ಮಾಸ್ಕ್​ ಧರಿಸಿರುವ ಝಬೊರೊವ್ ಮೆಟ್ರೋ ರೈಲೊಂದರಲ್ಲಿ ಪ್ರಯಾಣಿಕರ ಬಳಿ ಬರುತ್ತಿದ್ದಂತೆ ಇದ್ದಕ್ಕಿದ್ದಂತೆ ಕುಸಿದು ಬೀಳುತ್ತಾನೆ. ಬಳಿಕ ಕೆಳಗೆ ಬಿದ್ದ ಆತ ಒದ್ದಾಡಲು ಆರಂಭಿಸುತ್ತಾನೆ. ನಂತರ ಆತನ ಸ್ನೇಹಿತರು ಪ್ರಯಾಣಿಕರಿಗೆ ಅವನಿಗೆ ಕೊರೊನಾ ವೈರಸ್​ ಸೋಂಕು ಇದೆ ಎಂದು ಕೂಗಿ ಹೇಳುತ್ತಾರೆ. ಇದರಿಂದ ಭಯಗೊಳ್ಳುವ ಪ್ರಯಾಣಿಕರು ಚೆಲ್ಲಾಪಿಲ್ಲಿಯಾಗಿ ಓಡುತ್ತಾರೆ.

ಈ ವಿಡಿಯೋ ಇತ್ತೀಚಿನ ಕೆಲ ದಿನಗಳಿಂದ ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗಿದೆ. ಫೆಬ್ರವರಿ 8 ರಂದು ರಷ್ಯಾ ಪೊಲೀಸರು ಝಬೊರೊವ್ ಎಂಬಾತನನ್ನು ಬಂಧಿಸಿದ್ದಾರೆ. ಸಾರ್ವಜನಿಕರಿಗೆ ಭಯ ಉಂಟುಮಾಡಿದ ಹಿನ್ನೆಲೆಯಲ್ಲಿ ಆತನ ಮೇಲೆ ರಷ್ಯಾ ಪೊಲೀಸರು ಗೂಂಡಾಗಿರಿ ಪ್ರಕರಣವನ್ನು ದಾಖಲಿಸಿದ್ದು, ಅದರನ್ವಯ ಝಬೊರೊವ್​ 5 ವರ್ಷ ರಷ್ಯಾ ಕಾರಾಗೃಹದಲ್ಲಿ ಕಂಬಿ ಎಣಿಸಬೇಕಾಗಿದೆ.

ಈ ವಿಡಿಯೋವನ್ನು ಫೆ.2ರಂದು ಝಬೊರೊವ್ ತನ್ನ ಸಾಮಾಜಿಕ ಜಾಲತಾಣ ಖಾತೆಯಲ್ಲಿ ಶೇರ್​ ಮಾಡಿಕೊಂಡು ಇದೊಂದು ಜೋಕ್ಸ್​ ಅಥವಾ ಪ್ರ್ಯಾಂಕ್ ಎಂದು ಬರೆದುಕೊಂಡಿದ್ದ. ಸದ್ಯ ಅದನ್ನು ಈಗ ತೆಗೆದುಹಾಕಲಾಗಿದೆ. ಝಬೊರೊವ್ ಬಂಧನದ ಬಳಿಕ ಆತನ ಆಪ್ತರಿಬ್ಬರನ್ನು ರಷ್ಯಾ ಅಧಿಕಾರಿಗಳು ಪತ್ತೆಹಚ್ಚಿದ್ದು, ಅವರನ್ನು ರಷ್ಯಾ ತ್ಯಜಿಸುವಂತೆ ರಷ್ಯಾ ಸಚಿವಾಲಯ ಆದೇಶಿಸಿದೆ.

ಕೊರೊನಾ ರೋಗದ ಬಗ್ಗೆ ಸಾರ್ವಜನಿಕರಿಗೆ ತಿಳುವಳಿಕೆ ಮೂಡಿಸಲು ಈ ರೀತಿ ಮಾಡಿರುವುದಾಗಿ ಝಬೊರೊವ್ ಪರ ವಕೀಲರು ವಾದಿಸಿದ್ದು, ಆತನ ಬಿಡುಗಡೆಗೆ ಯತ್ನಿಸುತ್ತಿದ್ದಾರೆ. (ಏಜೆನ್ಸೀಸ್​)