Anjali Anish - ಕನ್ನಡದ ಜತೆ ತಮಿಳು, ಮಲಯಾಳಂನಲ್ಲೂ ಬಿಜಿಯಾದ "ಮನದ ಕಡಲು' ನಟಿ

"ಪದವಿ ಪೂರ್ವ' ಮತ್ತು "ಮನದ ಕಡಲು' ಚಿತ್ರಗಳ ಬಳಿಕ ನಟಿ ಅಂಜಲಿ ಅನೀಷ್​ ಪರಭಾಷೆಗಳಿಗೆ ಹಾರಿದ್ದಾರೆ. ಹಾಗಂತ ಕನ್ನಡದಲ್ಲಿ ನಟಿಸುತ್ತಿಲ್ಲ ಅಂತಲ್ಲ. ಬದಲಾಗಿ ಕನ್ನಡದ ಜತೆಗೆ ತಮಿಳು, ಮಲಯಾಳಂನಲ್ಲೂ ಬಿಜಿಯಾಗಿದ್ದಾರೆ. ಸಂಭಾಷಣೆಕಾರ ಪ್ರಶಾಂತ್​ ರಾಜಪ್ಪ ಚೊಚ್ಚಲ ಬಾರಿಗೆ ಆ್ಯಕ್ಷನ್​-ಕಟ್​ ಹೇಳುತ್ತಿರುವ, ರಿಷಿ ಮತ್ತು ಪ್ರಕಾಶ್​ ಬೆಳವಾಡಿ ಮುಖ್ಯ ಭೂಮಿಕೆಯಲ್ಲಿ ನಟಿಸುತ್ತಿರುವ "ಅನಂತ ಪದ್ಮನಾಭ' ಚಿತ್ರಕ್ಕೆ ಅಂಜಲಿ ನಾಯಕಿಯಾಗಿ ಆಯ್ಕೆಯಾಗಿದ್ದಾರೆ. ಇತ್ತೀಚೆಗಷ್ಟೆ ನಟಿ ಚಿತ್ರತಂಡ ಸೇರಿದ ಕುರಿತು ವಿಡಿಯೋ ಝಲಕ್​ ಮೂಲಕ ಘೋಷಿಸಲಾಗಿದೆ. "ಕಥೆ ಇಷ್ಟವಾಯಿತು. ತುಂಬ ವಿಭಿನ್ನವಾದ ಸ್ಟೋರಿ. ಒಂದೇ ರೀತಿಯ ಕಥೆಗಳು ಹೆಚ್ಚು ಬರುತ್ತಿರುತ್ತವೆ. ಆದರೆ, ಈ ಕಥೆ ಡಿರೆಂಟ್​ ಆಗಿತ್ತು. ನನ್ನ ಪಾತ್ರವೂ ಇಷ್ಟವಾಯಿತು. ಕ್ರಿಯೇಟಿವಿಟಿ, ಕಂಟೆಂಟ್​ ವಿಷಯದಲ್ಲಿ ತುಂಬ ರಿಚ್​ ಸಿನಿಮಾ. ಒಂದೊಳ್ಳೆ ತಂಡ, ವಿಭಿನ್ನ ಕಥೆ, ಸವಾಲಿನ ಪಾತ್ರವಾದ ಕಾರಣ ಒಪ್ಪಿಕೊಂಡೆ. ಈಗಾಗಲೇ ಬಹುತೇಕ ಚಿತ್ರೀಕರಣ ಪೂರ್ಣಗೊಂಡಿದ್ದು, ಒಂದು ಹಾಡು ಹಾಗೂ ಮೂರು ದಿನಗಳ ಶೂಟಿಂಗ್​ ಮಾತ್ರ ಬಾಕಿ ಇದೆ. ಅವಕಾಶಗಳೇನೋ ಬರುತ್ತಿವೆ. ಸವಾಲಿನ, ವಿಭಿನ್ನವಾಗಿರುವ ಕಥೆ, ಪಾತ್ರಗಳನ್ನಷ್ಟೇ ನಾನು ಆಯ್ಕೆ ಮಾಡಿಕೊಳ್ಳುತ್ತಿದ್ದೇನೆ. ನಟಿಯಾಗಿ ಹೊಸ ಪ್ರಯತ್ನಗಳನ್ನು ಮಾಡುತ್ತಿದ್ದೇನೆ' ಎಂದು ಮಾಹಿತಿ ನೀಡುತ್ತಾರೆ.

ಕನ್ನಡದ ಜತೆಗೆ ತಮಿಳಿನಲ್ಲೂ ನಟಿಸುತ್ತಿರುವ ಅಂಜಲಿ, ಮಲಯಾಳಂ ಕಥೆಯನ್ನೂ ಓಕೆ ಮಾಡಿದ್ದಾರಂತೆ. ಈ ಬಗ್ಗೆ, "ಪರಭಾಷೆಗಳಿಂದ ಅವಕಾಶಗಳು ಬರುತ್ತಿದ್ದರೂ, ಲಾ ಓದುತ್ತಿದ್ದ ಕಾರಣ ಒಪ್ಪಿರಲಿಲ್ಲ. ಇದೀಗ ಡಿಗ್ರೀ ಮುಗಿಯಿತು. ಅದೇ ಸಮಯದಲ್ಲಿ ತಮಿಳಿನ ಒಂದು ಚಿತ್ರದಲ್ಲಿ ಅವಕಾಶ ದೊರೆಯಿತು. ಕಥೆ ಮತ್ತು ಪಾತ್ರ ಇಷ್ಟವಾದ ಕಾರಣ ಒಪ್ಪಿಕೊಂಡೆ. ಅರ್ಧ ಮಲೇಷಿಯಾ, ಇನ್ನರ್ಧ ಮಾರಿಷಸ್​ನಲ್ಲಿ ನಡೆಯುವ ಕಥೆ. ಈಗಾಗಲೇ ಶೇಕಡಾ 50ರಷ್ಟು ಶೂಟಿಂಗ್​ ಮುಗಿದಿದೆ. ನಾನು ಸದ್ಯ ಭಾನುವಾರದಿಂದ (ಮೇ 10) ಮಾರಿಷಸ್​ನಲ್ಲಿ ಶೂಟಿಂಗ್​ನಲ್ಲಿ ತೊಡಗಿದ್ದೇನೆ. ಮಲಯಾಳಂ ಸಿನಿಮಾ ಮಾತುಕತೆ ಕೂಡ ಆಗಿದ್ದು, ಇನ್ನಷ್ಟೇ ಚಿತ್ರೀಕರಣ ಪ್ರಾರಂಭವಾಗಬೇಕಿದೆ. ಆದರೆ, ಚಿತ್ರತಂಡಗಳಿಂದ ಅಧಿಕೃತ ಘೋಷಣೆ ಆಗುವವರೆಗೂ ನಾನು ಈ ಸಿನಿಮಾಗಳ ಕುರಿತು ಹೆಚ್ಚು ಮಾಹಿತಿ ನೀಡಲಾರೆ' ಎನ್ನುತ್ತಾರೆ.

ಕನ್ನಡದ "ಅಂಬಿ ನಿಂಗ್​ ವಯಸ್ಸಾಯ್ತೋ' ಸೇರಿ ಕೆಲ ಹಿಂದಿ ಸಿನಿಮಾಗಳು, ಜಾಹೀರಾತುಗಳು, ಮ್ಯೂಸಿಕ್​ ವಿಡಿಯೋಗಳಲ್ಲಿ ಸಹ&ನಿರ್ದೇಶಕಿಯಾಗಿ ಕೆಲಸ ಮಾಡಿ ಅನುಭವ ಪಡೆದಿರುವ ಅಂಜಲಿಗೆ ಆ್ಯಕ್ಷನ್​&ಕಟ್​ ಹೇಳಲು ಸಿದ್ಧತೆ ನಡೆಸುತ್ತಿದ್ದಾರಂತೆ. "ಗೆಳೆಯರ ಜತೆ ಸೇರಿ ನಾನೇ ಕಥೆ ಬರೆದು, "ಬದಲಾಗುವ ದಾರಿ' ಎಂಬ ಕಿರುಚಿತ್ರ ನಿರ್ದೇಶಿಸಿದೆ. ಸದ್ಯ ನಟನೆಯ ಜತೆಗೆ ಇನ್ನೊಂದು ಶಾರ್ಟ್​ ಫಿಲಂಗೆ ಸಿದ್ಧತೆ ನಡೆಸುತ್ತಿದ್ದೇನೆ. ನಟರದ್ದೇ ಬೇರೆ ಜೀವನ, ನಿರ್ದೇಶಕರದ್ದೇ ಬೇರೆ ಜೀವನ. ಒಬ್ಬೊಬ್ಬ ನಿರ್ದೇಶಕರೂ ಒಂದೊಂದು ರೀತಿ ಕೆಲಸ ಮಾಡುತ್ತಾರೆ. ಈಗ ನಿರ್ದೇಶಕರ ಜತೆ ಕೆಲಸ ಮಾಡುತ್ತಾ ನಿರ್ದೇಶನದ ಪಟ್ಟುಗಳನ್ನೂ ಕಲಿಯುತ್ತಿದ್ದೇನೆ' ಎಂದು ಹೇಳಿಕೊಳ್ಳುತ್ತಾರೆ.