ಬೆಂಕಿಯಲ್ಲಿ ಅರಳಿದ ಮಲ್ಲಿಕಾರ್ಜುನ ಖರ್ಗೆ

ಬೆಂಗಳೂರು: ಮಲ್ಲಿಕಾರ್ಜುನ ಖರ್ಗೆ ಬೆಂಕಿಯಲ್ಲಿ ಅರಳಿದವರು. ಚಿಕ್ಕ ಮಗುವಿದ್ದಾಗಲೇ ತಮ್ಮ ಕುಟುಂಬದ ಗುಡಿಸಲು ರಜಾಕಾರರ ದ್ವೇಷದ ಜ್ವಾಲೆಗೆ ಆಹುತಿಯಾದ ಪರಿಣಾಮ ನೋವಿನಲ್ಲಿ ಬೆಳೆದು ಬಂದವರು. ಪಕ್ಷ ನಿಷ್ಠೆಯಿಂದಾಗಿ ದೊಡ್ಡ ಹುದ್ದೆಗೆ ತಲುಪಿದ್ದಾರೆ.

ಕಲಬುರಗಿಯಲ್ಲಿ ವಿದ್ಯಾಭ್ಯಾಸ ಮಾಡುವಾಗಲೇ ನಾಯಕತ್ವದ ಗುಣವನ್ನು ಮೈಗೂಡಿಸಿಕೊಂಡು ಬಂದವರು ಖರ್ಗೆ. ಆನಂತರ ಕಾರ್ವಿುಕ ನಾಯಕರಾಗಿ ದುಡಿಯುವ ವರ್ಗಕ್ಕೆ ನ್ಯಾಯ ಕೊಡಿಸುವ ಕೆಲಸ ಮಾಡಿದರು. ಡಿ. ದೇವರಾಜ ಅರಸು ಯುವಕರನ್ನು ಗುರುತಿಸಿ ರಾಜಕೀಯಕ್ಕೆ ಕರೆತಂದವರಲ್ಲಿ ಖರ್ಗೆ ಸಹ ಒಬ್ಬರು. ಅರಸು ಗರಡಿಯಲ್ಲಿ ಬೆಳೆದು ಬಂದ ಖರ್ಗೆ, ಅಂಬೇಡ್ಕರ್ ಅವರ ತತ್ವ-ಸಿದ್ದಾಂತಗಳನ್ನು ಮೈಗೂಡಿಸಿಕೊಂಡು ವ್ಯಕ್ತಿತ್ವ ರೂಪಿಸಿಕೊಂಡು ಸದಾ ಬಡವರು ಹಾಗೂ ಶೋಷಿತರ ಪರ ದನಿ ಎತ್ತಿದವರು. ಕಾಂಗ್ರೆಸ್​ನ ನಿಷ್ಠಾವಂತ ಕಾರ್ಯಕರ್ತರಾದ ಅವರು, ಹೈಕಮಾಂಡ್ ನಿರ್ಧಾರಕ್ಕೆ ಎಂದೂ ಎದುರಾಡಿದವರಲ್ಲ. ಗಾಂಧಿ ಕುಟುಂಬದ ನಿಷ್ಠಾವಂತರೂ ಹೌದು. ತಮಗೆ ಸಿಕ್ಕ ಅವಕಾಶಗಳಲ್ಲಿ ಪರಿಶಿಷ್ಟರು, ಬಡವರ ಪರ ಕೆಲಸ ಮಾಡಿಕೊಂಡು ಬಂದ ಖರ್ಗೆ ಬುದ್ಧನ ಅನುಯಾಯಿ. ಅದರಿಂದಾಗಿಯೇ ಕಲಬುರಗಿಯಲ್ಲಿ ಸಿದ್ದಾರ್ಥ ವಿಹಾರ ಧಾಮ ಟ್ರಸ್ಟ್ ಮೂಲಕ ಬುದ್ಧ ವಿಹಾರ ನಿರ್ಮಾಣ ಮಾಡಿದ್ದಾರೆ. ಕರ್ನಾಟಕ ಪೀಪಲ್ಸ್ ಎಜುಕೇಷನ್ ಸೊಸೈಟಿಯಿಂದ ಶಿಕ್ಷಣ ಸಂಸ್ಥೆಗಳನ್ನು ಕಟ್ಟಿದ್ದಾರೆ.

ಹೈ-ಕಗೆ ವಿಶೇಷ ಸ್ಥಾನಮಾನ: ಹೈದರಾಬಾದ್ ಕರ್ನಾಟಕ ಭಾಗಕ್ಕೆ ಸಂವಿಧಾನದ 371 (ಜೆ) ತಿದ್ದುಪಡಿ ಮೂಲಕ ವಿಶೇಷ ಸ್ಥಾನಮಾನ ತಂದಿದ್ದು ಖರ್ಗೆ ಅವರ ದೊಡ್ಡ ಸಾಧನೆ. ಅದರಿಂದ ಆ ಭಾಗದ ಅಭಿವೃದ್ಧಿಗೆ ವಿಶೇಷ ಅನುದಾನ ಸಿಕ್ಕಿದ್ದು ಮಾತ್ರವಲ್ಲದೆ ಸರ್ಕಾರಿ ಹುದ್ದೆಗಳಲ್ಲಿ ಮೀಸಲಾತಿಯೂ ಸಿಕ್ಕಿತು.

ಕ್ರಿಕೆಟ್ ಪ್ರಿಯ: ಮಲ್ಲಿಕಾರ್ಜುನ ಖರ್ಗೆ ಅವರಿಗೆ ಕ್ರಿಕೆಟ್ ಎಂದರೆ ಪಂಚಪ್ರಾಣ. ಯಾವುದೇ ಮ್ಯಾಚ್​ಗಳನ್ನು ಎಂದಿಗೂ ತಪ್ಪಿಸಿಕೊಂಡವರಲ್ಲ. ವಿಧಾನಸಭೆಯಲ್ಲಿ ಗಂಭೀರ ಚರ್ಚೆಯಲ್ಲಿದ್ದಾಗ ಸಹ ಕ್ರಿಕೆಟ್ ಪಂದ್ಯಾವಳಿ ನಡೆಯುತ್ತಿದ್ದರೆ ತಮ್ಮ ಆಪ್ತ ಸಿಬ್ಬಂದಿ ಮೂಲಕ ಸ್ಕೋರ್​ಗಳನ್ನು ಕೇಳಿ ತಿಳಿಯುತ್ತಿದ್ದದ್ದು ಅವರ ವಿಶೇಷ. ಕ್ರಿಕೆಟ್ ಜತೆಗೆ ಹಾಕಿ ಹಾಗೂ ಕಬ್ಬಡಿ ಬಗ್ಗೆಯೂ ಅಷ್ಟೇ ಆಸಕ್ತಿ.

ಪತ್ನಿ, ಪರಿವಾರದ ಸಾಥ್: ಖರ್ಗೆ ಅವರ ರಾಜಕೀಯ ಯಶೋಗಾಥೆ ಹಿಂದೆ ಪತ್ನಿ ರಾಧಾಬಾಯಿ ಹಾಗೂ ಪರಿವಾರದವರ ಸಾಥ್ ಪ್ರಮುಖವಿದೆ. 1968ರ ಮೇ 13ರಂದು ಖರ್ಗೆ ಚಿತ್ತಾಪುರ ತಾಲೂಕಿನ ಗುಂಡಗುರ್ತಿ ದೊಡ್ಮನೆ ಕುಟುಂಬದ ರಾಧಾಬಾಯಿ ಜತೆಗೆ ವಿವಾಹವಾದರು. ರಾಹುಲ್, ಪ್ರಿಯಾಂಕ್, ಮಿಲಿಂದ್, ಜಯಶ್ರೀ, ಪ್ರಿಯದರ್ಶಿನಿ ಮಕ್ಕಳು. ನಾನಾ ಕೆಲಸಕಾರ್ಯ ನಿಮಿತ್ತ ಖರ್ಗೆ ಮನೆ ಬಿಟ್ಟು ಸುತ್ತಾಟ ಮಾಡುತ್ತಿದ್ದರು. ಈ ಸ್ಥಿತಿಯಲ್ಲಿ ಪತ್ನಿ ರಾಧಾಬಾಯಿ ಪತಿಯ ಕೆಲಸಕ್ಕೆ ಬೆಂಬಲಿಸುವ ಜತೆ ಜತೆಯಲ್ಲೇ ಎಲ್ಲ ಮಕ್ಕಳನ್ನು ಚೆನ್ನಾಗಿ ಓದಿಸಿ, ಸುಂಸ್ಕೃತರಾಗಿಸಿ ಬೆಳೆಸಿದರು. ಇಬ್ಬರೂ ಪುತ್ರಿಯರು ವೈದ್ಯರಿದ್ದಾರೆ. ದೊಡ್ಡ ಮಗ ರಾಹುಲ್ ಕಲಬುರಗಿ ಬುದ್ಧವಿಹಾರ ಟ್ರಸ್ಟ್ ಅಧ್ಯಕ್ಷರು. ಎರಡನೇ ಮಗ ಪ್ರಿಯಾಂಕ್ ಶಾಸಕ. ಮಿಲಿಂದ್ ಪುಣೆಯಲ್ಲಿ ಉನ್ನತ ಹುದ್ದೆಯಲ್ಲಿದ್ದಾರೆ. ಕುಟುಂಬದಲ್ಲಿ ಪ್ರಿಯಾಂಕ್ ಮಾತ್ರ ರಾಜಕೀಯಕ್ಕೆ ಬಂದಿದ್ದಾರೆ. ಖರ್ಗೆ ಯಶಸ್ಸಿನಲ್ಲಿ ಅರ್ಧಾಂಗಿನಿ ರಾಧಾಬಾಯಿ ಪಾತ್ರ ಅರ್ಧಕ್ಕೂ ಹೆಚ್ಚು. ಹೀಗಂತ ಅನೇಕ ಸಂದರ್ಭಗಳಲ್ಲಿ ಸ್ವತಃ ಖರ್ಗೆ ಹೇಳಿಕೊಂಡಿದ್ದಾರೆ.

ರಾಜ್ಯದ 2ನೇ, ದಕ್ಷಿಣದ ಹತ್ತನೇ ಅಧ್ಯಕ್ಷ

ಎಐಸಿಸಿಗೆ ರಾಜ್ಯದಿಂದ ಅಧ್ಯಕ್ಷರಾಗುತ್ತಿರುವ ಎರಡನೇಯವರು ಮಲ್ಲಿಕಾರ್ಜುನ ಖರ್ಗೆ. ದಕ್ಷಿಣದ ರಾಜ್ಯಗಳಿಂದ ಇದುವರೆಗೂ ಒಂಬತ್ತು ಮಂದಿ ಕಾಂಗ್ರೆಸ್​ನ ಅಧ್ಯಕ್ಷ ಸ್ಥಾನ ನಿರ್ವಹಿಸಿದ್ದು, ಖರ್ಗೆ 10ನೇಯವರಾಗಿದ್ದಾರೆ. ಎಸ್. ನಿಜಲಿಂಗಪ್ಪ ಅವರು 1968ರಿಂದ 1969ರ ತನಕ ಅಧ್ಯಕ್ಷರಾಗಿ ಸೇವೆ ಸಲ್ಲಿಸಿದ್ದರು. ಅದಕ್ಕೂ ಮೊದಲು ಹಾಗೂ ಆನಂತರ ಈ ಹುದ್ದೆಗೆ ರಾಜ್ಯದಿಂದ ಯಾರೊಬ್ಬರೂ ಆಯ್ಕೆಯಾಗಿರಲಿಲ್ಲ. ದಕ್ಷಿಣದ ರಾಜ್ಯಗಳಿಂದ ಪಾನಪಕ್ಕಂ ಆನಂದಚಾರ್ಲು ( 1891) ಈ ಹುದ್ದೆ ಅಲಂಕರಿಸಿದ ಮೊದಲಿಗರು. ಆಬಳಿಕ ಸಿ.ಶಂಕರನ್​ನಾಯರ್ (1897), ಸಿ. ವಿಜಯರಾಘವನ್ (1920), ಶ್ರೀನಿವಾಸ ಐಯ್ಯಂಗಾರ್ (1926), ನೀಲಂ ಸಂಜೀವರೆಡ್ಡಿ (1960-62), ಕೆ. ಕಾಮರಾಜ್ (1964-66), ಎಸ್.ನಿಜಲಿಂಗಪ್ಪ (1968-69), ಕಾಪು ಬ್ರಹ್ಮಾನಂದರೆಡ್ಡಿ (1977), ಪಿ.ವಿ. ನರಸಿಂಹರಾವ್ (1992-94) ಹಾಗೂ ಮಲ್ಲಿಕಾರ್ಜುನ ಖರ್ಗೆ (2022).

ಫಲಿತಾಂಶಕ್ಕೂ ಮುನ್ನ ನೂತನ ಅಧ್ಯಕ್ಷರ ಹೆಸರು ಘೋಷಿಸಿದ ರಾಹುಲ್ ಗಾಂಧಿ

ಆದೋನಿ(ಆಂಧ್ರಪ್ರದೇಶ): ಕಾಂಗ್ರೆಸ್ ಅಧ್ಯಕ್ಷ ಚುನಾವಣೆಯ ಫಲಿತಾಂಶ ಪ್ರಕಟವಾಗುವ ಅರ್ಧ ಗಂಟೆ ಮೊದಲೇ ರಾಹುಲ್ ಗಾಂಧಿ, ಮಲ್ಲಿಕಾರ್ಜುನ ಖರ್ಗೆ ಅವರನ್ನು ನೂತನ ಕಾಂಗ್ರೆಸ್ ಅಧ್ಯಕ್ಷ ಎಂದು ಉಲ್ಲೇಖಿಸಿದರು! ಆಂಧ್ರಪ್ರದೇಶದ ಕುರ್ನಲ್​ನಲ್ಲಿ ಭಾರತ್ ಜೋಡೊ ಯಾತ್ರೆ ಸಂದರ್ಭ ಫಲಿತಾಂಶ ಪ್ರಕಟವಾಗುವ ಅರ್ಧಗಂಟೆ ಮುನ್ನ ಸುದ್ದಿಗಾರರೊಂದಿಗೆ ಮಾತನಾಡುತ್ತಿದ್ದ ರಾಹುಲ್, ಪಕ್ಷದಲ್ಲಿ ನನ್ನ ಪಾತ್ರವೇನೆಂಬುದನ್ನು ನೂತನ ಅಧ್ಯಕ್ಷರು ನಿರ್ಧರಿಸುತ್ತಾರೆ ಎಂದು ಪ್ರಶ್ನೆಯೊಂದಕ್ಕೆ ಉತ್ತರಿಸಿದರು. ನಂತರ ಖರ್ಗೆ ಜೀ ಮತ್ತು ಸೋನಿಯಾ ಜೀ ಅವರನ್ನು ಕೇಳಿ ಎಂದು ಹೇಳಿದರು. ಪಕ್ಷದ ಸಂಘಟನೆ, ನೂತನ ಯೋಜನೆಗಳ ಕುರಿತು ನೂತನ ಅಧ್ಯಕ್ಷರೇ ನಿರ್ಧಾರ ಕೈಗೊಳ್ಳುತ್ತಾರೆ ಎಂದು ಹೇಳಿದರು.

ಸ್ವವಿವರ

• ಹೆಸರು: ಮಲ್ಲಿಕಾರ್ಜುನ ಖರ್ಗೆ
• ತಂದೆ: ಮಲ್ಲಪ್ಪ
• ತಾಯಿ: ಸಾಯಿಬವ್ವ
• ಹುಟ್ಟಿದ ದಿನಾಂಕ: 21-07-1942
• ಹುಟ್ಟಿದ ಸ್ಥಳ: ವರವಟ್ಟಿ, ಭಾಲ್ಕಿ ತಾಲೂಕು
• ವಿದ್ಯಾಭ್ಯಾಸ: ಬಿಎ, ಎಲ್​ಎಲ್​ಬಿ
• ಮದುವೆ: 13-5-1968
• ಪತ್ನಿ: ರಾಧಾಬಾಯಿ
• ಮಕ್ಕಳು: ಮೂರು ಗಂಡು, ಇಬ್ಬರು ಹೆಣ್ಣು ಮಕ್ಕಳು
• 1965-66: ಕಲಬುರಗಿ ವಿಜ್ಞಾನ, ಕಲಾ ಕಾಲೇಜಿನ ವಿದ್ಯಾರ್ಥಿ ಸಂಘದ ಪ್ರಧಾನ ಕಾರ್ಯದರ್ಶಿ
• 1966-67: ಕಾನೂನು ಕಾಲೇಜು ವಿದ್ಯಾರ್ಥಿ ಸಂಘದ ಉಪಾಧ್ಯಕ್ಷ
• 1969: ಕಲಬುಗರಿ ನಗರ ಕಾಂಗ್ರೆಸ್ ಅಧ್ಯಕ್ಷ
• 1972: ಮೊದಲ ಬಾರಿ ಶಾಸಕ
• 1976-78: ಪ್ರಾಥಮಿಕ ಶಿಕ್ಷಣ ರಾಜ್ಯ ಸಚಿವ
• 1979: ಆರ್​ಡಿಆರ್​ಪಿ ಸಚಿವ
• 1980-83: ಕಂದಾಯ ಸಚಿವ
• 1983: ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ
• 1985: ವಿಧಾನಸಭೆ ಪ್ರತಿಪಕ್ಷದ ಉಪನಾಯಕ
• 1990-92: ಕಂದಾಯ ಹಾಗೂ ಆರ್​ಡಿಪಿಆರ್ ಸಚಿವ
• 1992-94: ಸಹಕಾರ, ಬೃಹತ್ ಕೈಗಾರಿಕೆ ಸಚಿವ
• 1996-99: ವಿಧಾನಸಭೆ ಪ್ರತಿಪಕ್ಷದ ನಾಯಕ
• 1999-2004: ಗೃಹ, ಮೂಲಸೌಕರ್ಯ, ಸಣ್ಣ ನೀರಾವರಿ ಸಚಿವ
• 2004-06: ಸಾರಿಗೆ, ಜಲ ಸಂಪನ್ಮೂಲ, ಸಣ್ಣ ನೀರಾವರಿ ಸಚಿವ
• 2008-09: ವಿಧಾನಸಭೆ ವಿರೋಧ ಪಕ್ಷದ ನಾಯಕ
• 2005-08: ಕೆಪಿಸಿಸಿ ಅಧ್ಯಕ್ಷ
• 2009: ಲೋಕಸಭೆಗೆ ಆಯ್ಕೆ, ಕಾರ್ವಿುಕ ಸಚಿವ
• 2013-14: ರೈಲ್ವೆ ಸಚಿವ
• 2014-19: ಲೋಕಸಭೆಯಲ್ಲಿ ಕಾಂಗ್ರೆಸ್ ಗುಂಪಿನ ನಾಯಕ
• 2018: ಎಐಸಿಸಿ ಪ್ರಧಾನ ಕಾರ್ಯದರ್ಶಿ
• 2020: ರಾಜ್ಯಸಭೆಗೆ ಆಯ್ಕೆ, ಪ್ರತಿಪಕ್ಷದ ನಾಯಕ
• 2022: ಎಐಸಿಸಿ ಅಧ್ಯಕ್ಷರಾಗಿ ಆಯ್ಕೆ

https://www.vijayavani.net/husband-came-lifting-wife-and-took-darshana-of-hasanambe/

https://www.vijayavani.net/pramod-muthalik-reaction-on-chetans-comment-in-relation-to-kantara/