ಮೃಗಾಲಯದಲ್ಲಿ ವೀಕ್ಷಕರು ಎಸೆದ ಚೆಂಡನ್ನು ನುಂಗಿ ಸಾವನ್ನಪ್ಪಿದ ಪೋಲಾರ್ ಬೇರ್​!

ಮಾಸ್ಕೋ: ಬಳಸಿ ಬಿಸಾಡುವ ಪ್ಲಾಸ್ಟಿಕ್​, ರಬ್ಬರ್​ ಸಾಮಾಗ್ರಿಗಳನ್ನು ಒಂದು ವೇಳೆ ಪ್ರಾಣಿಗಳು ತಿಂದರೆ ಅವುಗಳ ಜೀವಕ್ಕೇ ಕುತ್ತು ಬರುತ್ತದೆ ಎನ್ನುವುದರ ಕುರಿತಾಗಿ ಅನೇಕ ಜಾಗೃತಿ ಅಭಿಯಾನಗಳು ನಡೆಯುತ್ತಲೇ ಇರುತ್ತವೆ. ಆದರೂ ಎಚ್ಚೆತ್ತುಕೊಳ್ಳದ ಜನರಿಂದಾಗಿ ಮೃಗಾಲಯದ ಪೋಲಾರ್​ ಬೇರ್​ ಒಂದು ಪ್ರಾಣ ಬಿಟ್ಟಿರುವ ಘಟನೆ ರಷ್ಯಾದಲ್ಲಿ ನಡೆದಿದೆ.

ರಷ್ಯಾದ ಯೆಕಟೆರಿನ್‌ಬರ್ಗ್‌ನಲ್ಲಿರುವ ಮೃಗಾಲಯದಲ್ಲಿರುವ ಗಂಡು ಪೋಲಾರ್​ ಬೇರ್​ (ಹಿಮಕರಡಿ) ಉಮ್ಕಾ ಸೋಮವಾರದಂದು ಊಟ ಮಾಡಲು ಮುಂದಾಗಿದೆ. ತನ್ನ ಕೇರ್​ ಟೇಕರ್​ ತಂದುಕೊಟ್ಟ ಊಟವನ್ನು ತಿನ್ನುವಾಗ ಅಲ್ಲಿಯೇ ಅಸ್ವಸ್ಥವಾಗಿ ಬಿದ್ದಿದೆ. 25 ವರ್ಷ ವಯಸ್ಸಾಗಿದ್ದ ಉಮ್ಕಾಗೆ ವೈದ್ಯರು ಚಿಕಿತ್ಸೆ ನೀಡುವಷ್ಟರಲ್ಲಿ ಅದು ಪ್ರಾಣ ಬಿಟ್ಟಿದೆ. ಅದರ ಮರಣೋತ್ತರ ಪರೀಕ್ಷೆ ಮಾಡಿದಾಗ ಅದರ ಹೊಟ್ಟೆಯಲ್ಲಿ ರಬ್ಬರ್​ ಬಾಲ್​ ಇರುವುದು ಕಂಡುಬಂದಿದೆ. ಅದೇ ಕಾರಣಕ್ಕೆ ಉಮ್ಕಾ ಪ್ರಾಣ ಬಿಟ್ಟಿರುವುದಾಗಿ ವೈದ್ಯರು ತಿಳಿಸಿದ್ದಾರೆ.

ಮೃಗಾಲಯಕ್ಕೆ ಬಂದ ವೀಕ್ಷಕರಲ್ಲಿ ಯಾರೋ ಪೋಲಾರ್​ ಬೇರ್​ನ ಗಮನ ಸೆಳೆಯಲು ಬಾಲ್​ ಎಸೆದಿರಬೇಕು. ಏನೋ ತಿಂಡಿ ಇರಬಹುದು ಎಂದು ತಪ್ಪು ತಿಳಿದ ಬೇರ್ ಅದನ್ನು ನುಂಗಿ ಸಾವನ್ನಪ್ಪಿರಬಹುದು ಎಂದು ಅಂದಾಜಿಸಲಾಗಿದೆ.

ಮೃಗಾಲಯದಲ್ಲಿ ಉಮ್ಕಾಗೆ ಐನಾ ಹೆಸರಿನ ಹೆಣ್ಣು ಪೋಲಾರ್​ ಬೇರ್ ಅತ್ಯಂತ ಒಳ್ಳೆಯ ಸ್ನೇಹಿತೆಯಾಗಿತ್ತು. ಉಮ್ಕಾ ಮೃತವಾದಾಗಿನಿಂದ ಐನಾ ಸಾಕಷ್ಟು ನೊಂದಿದೆ. ಒಬ್ಬಂಟಿಯಾಗಿ ನಿರಾಸಕ್ತಿಯಿಂದ ಕುಳಿತುಕೊಳ್ಳುತ್ತಿದೆ ಎಂದು ಮೃಗಾಲಯದ ಸಿಬ್ಬಂದಿ ತಿಳಿಸಿದ್ದಾರೆ. ಐನಾ ಬಗ್ಗೆ ಹೆಚ್ಚಿನ ಗಮನ ಕೊಡುವುದಾಗಿ ತಿಳಿಸಲಾಗಿದೆ. (ಏಜೆನ್ಸೀಸ್​)

https://www.vijayavani.net/m-kangana-ranaut-remembers-indira-gandhi/

https://www.vijayavani.net/m-deputy-chief-minister-family-members-no-more-in-mp/