ಪತಿಯಿಂದ ವಿಚ್ಛೇದನ ಪಡೆದು 14 ವರ್ಷದ ಮಗನೊಂದಿಗೆ ಪ್ರತ್ಯೇಕವಾಗಿ ನೆಲೆಸಿರುವ 35ರ ಹರೆಯದ ಮಹಿಳೆ ಲವ್ ಜಿಹಾದ್ ಜಾಲಕ್ಕೆ ಬಲಿಯಾಗಿರುವ ಮಹಿಳೆಯರಲ್ಲಿ ಒಬ್ಬರಾಗಿದ್ದಾರೆ. ನದೀಮ್ ಎಂಬಾತ ತನ್ನೊಂದಿಗೆ ಗೆಳೆತನ ಬೆಳೆಸಿ ಮದುವೆಯಾಗುವ ಆಮಿಷವೊಡ್ಡಿ ಅನೇಕ ಸಲ ಅತ್ಯಾಚಾರ ಎಸಗಿದ್ದಾನೆ ಎಂದು ಪೊಲೀಸರಿಗೆ ಸಲ್ಲಿಸಿರುವ ದೂರಿನಲ್ಲಿ ಮಹಿಳೆ ಆರೋಪಿಸಿದ್ದಾಳೆ. ಇಸ್ಲಾಂಗೆ ಮತಾಂತರಗೊಂಡರೆ ಹಾಗೂ ಮಗ ಮುಸ್ಲಿಂ ಸಂಪ್ರದಾಯದಂತೆ ಸುನ್ನತಿಗೆ ಒಳಗಾದರೆ ಮಾತ್ರವೇ ಮದುವೆಯಾಗುವುದಾಗಿ ನದೀಂ ನಂತರ ಷರತ್ತುಗಳನ್ನು ಹಾಕಿದ ಎಂದು ಮಹಿಳೆ ವಿವರಿಸಿದ್ದಾಳೆ. 12 ವರ್ಷದ ಹಿಂದೆ ವಿಚ್ಛೇದನವಾಗಿದ್ದ ಮಹಿಳೆಗೆ ಮೂರು ವರ್ಷದ ಕೆಳಗಡೆ ನದೀಂ ಪರಿಚಯವಾಗಿದ್ದ. ಆರಂಭದಲ್ಲಿ ಆಕೆಗೆ ಬೆಂಬಲವಾಗಿದ್ದ ನದೀಂ ಆಗಾಗ ಮನೆಗೂ ಬರಲಾರಂಭಿಸಿದ್ದ. ಇಬ್ಬರ ನಡುವೆ ಲೈಂಗಿಕ ಸಂಬಂಧವೂ ಬೆಳೆದಿತ್ತು. ಆದರೆ, ನದೀಂ ಅದಾಗಲೇ ಮದುವೆಯಾಗಿದ್ದ ವಿಚಾರ ಮಹಿಳೆಗೆ ತಡವಾಗಿ ಗೊತ್ತಾಗಿದೆ. ಇದೇ ಮೇ 13ರಂದು ಆಕೆಯ ಮನೆಯಲ್ಲೇ ಅತ್ಯಾಚಾರವೆಸಗಿದ ನದೀಂ, ಆ ದೃಶ್ಯವನ್ನು ಚಿತ್ರೀಕರಿಸಿಕೊಂಡು ಬೆದರಿಕೆ ಹಾಕಲು ಆರಂಭಿಸಿದ ಎಂದು ಎಫ್ಐಆರ್ನಲ್ಲಿ ತಿಳಿಸಲಾಗಿದೆ. ಬುಝಾ ಧರಿಸಬೇಕು, ಗುರುವಾರದ ಉಪವಾಸ ವೃತ ಮಾಡಬಾರದು ಹಾಗೂ ತನ್ನ ಅನುಮತಿಯಿಲ್ಲದೆ ಮನೆಯಿಂದ ಹೊರಗೆ ಹೋಗಬಾರದೆಂದು ಧಮಕಿ ಹಾಕಲು ಆರಂಭಿಸಿದ್ದಾನೆ ಎಂದು ಆಕೆ ಗೋಳನ್ನು ವಿವರಿಸಿದ್ದಾಳೆ. ಇದಕ್ಕೆಲ್ಲ ಸೊಪ್ಪು ಹಾಕದಿದ್ದಾಗ ನದೀಂ ಕೆಟ್ಟದಗಿ ನಡೆದುಕೊಳ್ಳಲು ಆರಂಭಿಸಿದ್ದರಿಂದ ಪೊಲೀಸರ ಮೊರೆ ಹೋಗಿದ್ದಾಗಿ ತಿಳಿಸಿದ್ದಾಳೆ.
