"ಸ್ಪೆಷಲಿಸ್ಟ್​ ಎಲ್ಲೋ, ಐಸಿಯು ಎಲ್ಲೋ..." ಅಧಿಕಾರಿಗಳಿಗೆ ಸಿಎಂ ಯೋಗಿ ಆದಿತ್ಯನಾಥ್​ ಸೂಚನೆ

ಲಕ್ನೌ: ಆಸ್ಪತ್ರೆಗಳಲ್ಲಿ ತೀವ್ರ ನಿಗಾ ವಿಭಾಗ (ಐಸಿಯು) ಎಂದಮೇಲೆ ಸ್ಪೆಷಲಿಸ್ಟ್​ ವೈದ್ಯರೂ ಅಲ್ಲೇ ಇರಬೇಕು. ಇರದಿದ್ದರೆ ಅವಾಂತರ ಉಂಟಾಗಬಹುದು. ಆದರೆ ಉತ್ತರಪ್ರದೇಶದಲ್ಲಿ ಸ್ಪೆಷಲಿಸ್ಟ್​ ಎಲ್ಲೋ, ಐಸಿಯೋ ಎಲ್ಲೋ...

ಹೌದು.. ಐಸಿಯುಗಳಲ್ಲಿ ತಕ್ಷಣಕ್ಕೆ ಸ್ಪೆಷಲಿಸ್ಟ್​ಗಳ ಸಲಹೆ-ಸೇವೆ ಸಿಗದೆ ರೋಗಿಗಳಿಗೆ ಸಮಸ್ಯೆ ಉಂಟಾಗಬಾರದು ಎಂಬ ಹಿನ್ನೆಲೆಯಲ್ಲಿ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್​ ಹೊಸದೊಂದು ವ್ಯವಸ್ಥೆಗೆ ಮುಂದಾಗಿದ್ದಾರೆ.

ಕರೊನಾ ಹಿನ್ನೆಲೆಯಲ್ಲಿ ಸಭೆ ನಡೆಸಿದ ಅವರು, ಎಲ್ಲ ಮೆಡಿಕಲ್​ ಕಾಲೇಜುಗಳಿಗೆ ವಿಶೇಷ ಟೆಕ್ನಾಲಜಿ ಮೂಲಕ ವರ್ಚುವಲ್​ ಐಸಿಯು ಲಿಂಕ್​ ಮಾಡುವ ಪ್ರಕ್ರಿಯೆ ಆರಂಭಿಸಲು ಸೂಚನೆ ನೀಡಿದ್ದಾರೆ. ಐಸಿಯುನಲ್ಲಿ ಗಂಭೀರ ಪರಿಸ್ಥಿತಿಯಲ್ಲಿರುವ ರೋಗಿಗಳಿಗೆ ತುರ್ತು ಸಂದರ್ಭದಲ್ಲಿ ಇದರಿಂದ ಸ್ಟೆಷಲಿಸ್ಟ್​ಗಳ ಸಲಹೆ-ಸೇವೆ ಸಿಗುತ್ತದೆ ಎಂಬ ಹಿನ್ನೆಲೆಯಲ್ಲಿ ಅವರು ಅಧಿಕಾರಿಗಳಿಗೆ ಈ ಸೂಚನೆ ನೀಡಿದ್ದಾರೆ.

ಇನ್ನು ಕಳೆದ ಒಂದು ವಾರದಿಂದ ಪ್ರತಿದಿನ ನೂರಕ್ಕೂ ಹೆಚ್ಚು ಸೋಂಕು ಪ್ರಕರಣ ಪತ್ತೆ ಆಗುತ್ತಿರುವ ಜಿಲ್ಲೆಗಳಲ್ಲಿ ಕರೊನಾ ನಿಯಂತ್ರಣಕ್ಕೆ ವಿಶೇಷ ನಿಗಾ ವಹಿಸುವಂತೆಯೂ ಸೂಚನೆ ನೀಡಿದ್ದಾರೆ. (ಏಜೆನ್ಸೀಸ್​)