ನವದೆಹಲಿ: ಒಂದೇ ದಿನದ ಅವಧಿಯಲ್ಲಿ ಅತಿ ಹೆಚ್ಚು ಜೀವ ವಿಮಾ ಪಾಲಿಸಿಗಳನ್ನು ಮಾರಾಟ ಮಾಡಿ ಗಿನ್ನೆಸ್ ದಾಖಲೆ ಸೃಷ್ಟಿಸಿರುವುದಾಗಿ ಭಾರತೀಯ ಜೀವವಿಮಾ ನಿಗಮ (ಎಲ್ಐಸಿ) ಶನಿವಾರ ತಿಳಿಸಿದೆ. 2025ರ ಜ. 20ರಂದು ಮಾಡಿದ ಈ ಐತಿಹಾಸಿಕ ಸಾಧನೆಯನ್ನು ಗಿನ್ನೆಸ್ ಸಂಸ್ಥೆ ಪರಿಶೀಲಿಸಿ ಪುರಸ್ಕರಿಸಿದೆ ಎಂದು ಎಲ್ಐಸಿ ಪ್ರಕಟಣೆ ತಿಳಿಸಿದೆ. ಅಂದು ಎಲ್ಐಸಿಯ 4,52,839 ಏಜೆಂಟರು ದೇಶಾದ್ಯಂತ ಒಟ್ಟು 5,88,107 ಜೀವ ವಿಮಾ ಪಾಲಿಸಿಗಳನ್ನು ಮಾರಾಟ ಮಾಡಿದ್ದಾರೆ. ಕೇವಲ 24 ಗಂಟೆಗಳಲ್ಲಿ ಇಷ್ಟು ದೊಡ್ಡ ಸಂಖ್ಯೆಯಲ್ಲಿ ಪಾಲಿಸಿಗಳನ್ನು ಮಾಡಿಸಿರುವುದು ಜೀವವಿಮಾ ಉದ್ಯಮದಲ್ಲೇ ಒಂದು ಐತಿಹಾಸಿಕ ಮೈಲಿಗಲ್ಲು ಎಂದು ಕಂಪನಿ ಹೇಳಿದೆ. ಎಲ್ಐಸಿ ವ್ಯವಸ್ಥಾಪಕ ನಿರ್ದೇಶಕ ಹಾಗೂ ಮುಖ್ಯ ಕಾರ್ಯ ನಿರ್ವಾಹಕ ಅಧಿಕಾರಿ ಸಿದ್ಧಾರ್ಥ ಮೊಹಾಂತಿ ಅವರು ಜ. 20ರಂದು ‘ಮ್ಯಾಡ್ ಮಿಲಿಯನ್ ಡೇ’ ಅಂಗವಾಗಿ ಪ್ರತಿಯೊಬ್ಬ ಏಜೆಂಟರೂ ಕನಿಷ್ಠ ತಲಾ ಒಬ್ಬರ ಪಾಲಿಸಿಯನ್ನಾದರೂ ಮಾಡಿಸಬೇಕು ಎಂದು ಕರೆ ನೀಡಿದ್ದರ ಫಲವಾಗಿ ಈ ದಾಖಲೆ ನಿರ್ವಣವಾಗಿದೆ.
